ބޮލީވުޑްގެ އެންމެ ފުރަތަމަ ސްޕަހީރޯ ފިލްމް "ކްރިޝް" ގެ 4 ވަނަ ބައި ނުވަތަ 4 ވަނަ ފިލްމް ގެ ޝޫޓިން އަންނަ 2024 ވަނަ އަހަރުގެ ފެބްރުއަރީ ހިސާބުގައި ފެށުމަށް މަސައްކަތް ކުރަމުން އަންނަ ކަމަށް ރިޕޯޓްތަށް ބުނެފިއެވެ.
ލީޑުން ރިތިކް ރޯޝަން ފެނިގެންދާ މި ފިލްމް އަކީ އޭނާގެ ބައްޕަގެ އުފެއްދުމެކެވެ. އެ ފިލްމުގެ ސްކްރިޕްޓް ލިޔުމުގެ މަސައްކަތް މިހާރު އަންނަނީ ކުރަމުންނެވެ. އެ ފިލްމުގެ ސްކްރިޕްޓް ލިޔަނީ ފުރަތަމަ ތިން ފިލްމުގެ ސްކްރިޕްޓް ވެސް ލިޔުނު، ރިތިކްގެ ބައްޕަ، ރާކޭޝް ރޯޝަން އެވެ. އަދި މިފަހަރު ވެސް ޑައިރެކްޓަރަކީ ހަމަ އޭނާ އެވެ.
މި ސީރީޒް ގެ ފިލްމް ތަކަކީ ބެލުންތެރިންގެ ބޮޑު ތަރުހީބެއް ލިބެމުން އަންނަ ވަރަށް ކާމިޔާބު ފިލްމް ތަކެކެވެ. މި ފިލްމް އާއި ގުޅޭ ގޮތުން މިހާތަނަށް އަދި މާގިނަ މައުލޫމާތެއް ހިއްސާކޮށްފައިއެއް ނުވެއެވެ.
ނަމަވެސް މައުލޫމާތު ލިބޭ ގޮތުގައި މި ފިލްމްގެ ލީޑުން ރިތިކް އާއި އެކުގައި ޕްރިޔަންކާ ފެނުމުގެ ފުރުސަތު ބޮޑެވެ. ޕްރިޔަންކާ އަކީ މި ސީރީޒް ގެ ދެވަނަ އަދި ތިންވަނަ ފިލްމް އިން ރިތިކް ގެ ބަތަލާގެ ގޮތުގައި ފެނިގެންދިއަ ބަތަލާއެވެ. ޕްރިޔަންކާ އަށް މި ރޯލު ހުށައަޅައި މިހާރު އަންނަނީ މި މަޝްވަރާ ކުރަމުންނެވެ.
"ކްރިޝް" ފްރެންޗައިޒްގެ ފިލްމުތައް ފެށީ މީގެ 20 އަހަރު ކުރިންނެވެ. އެންމެ ފުރަތަމަ ގެނެސްދިން ފިލްމަކީ "ކޮއި މިލް ގަޔާ" އެވެ. 2003 ވަނަ އަހަރުގެ ގެނެސްދިން އެ ފިލްމްގެ ލީޑުން ފެނިގެން ގޮސްފައިވަނީ ބަތަލާ ޕްރިތީ ޒިންތާއެވެ. އެ ސިލްސިލާގެ ދެވަނަ ފިލްމް ގެނެސްދީފައި ވަނީ 2006 ވަނަ އަހަރުގައިއެވެ. އަދި "ކްރިޝް" ގެ ތިންވަނަ ފިލްމް ގެނެސްދިފައިވަނީ 2013 ވަނަ އަހަރުގައިއެވެ.
