ބޮލީވުޑްގެ ސްޕަސްޓާރު ސަލްމާން ހާންގެ ކުރިއަށް އޮތް ފިލްމްގައި ދައްކުވައިދެނީ "ނޮވެމްބަރު 3″ އާ ހާދިސާއާ ގުޅޭ ކަންތަށް ތަކެއް ކަމަށް ބޮލީވުޑްގެ ހަބަރުތަށް ގެނެސްދޭ ނޫސްތަކުން ބުނެފިއެވެ.
"ނޮވެމްބަރު 3″ ގެ ހާދިސާ އަކީ ދިވެހިންގެ ހިތުން ދުވަހަކުވެސް ފިލައިގެން ދާނެ ހާދިސާއެއް ނޫނެވެ. މި ވަތަނީ ފިލްމުގައި، ޓެރަރިސްޓުންގެ ބަޔަކު ރާއްޖޭގެ ވެރިކަން ވައްޓާލަން، ވެރިރަށް މާލެ އަށް އަރައި ނޮވެމްބަރު 3، 1988 ގައި ހިންގި އުދުވާނީ ހަމަލާއާ ގުޅިގެން އިންޑިއާ އިން އެހީތެރިކަން ފޯރުކޮށް ދޭން ހިންގި "އޮޕަރޭޝަން ކެކްޓްސް" އަށް ވަރަށް ބޮޑަށް އަލިއަޅުވާނެ ކަމަށް ވެއެވެ.
މި ފިލްމް އަކީ ޑައިރެކްޓަރު ކަރަން ޖޯހަރު ގެ ދަރްމާ ޕްރޮޑަކްޝަން އަށް ސަލްމާން ކުޅެދޭ ފުރަތަމަ ފިލްމް އެވެ. މި ފިލްމް ގެ ޑައިރެކްޓަރަކީ ވިޝްނޫވަރުދާން އެވެ. އެއީ ދަރުމާގެ 2021 ގެ ކާމިޔާބު ބައޮގްރަފިކަލް ހަނގުރާމަ ފިލްމު "ޝޭރުޝާ" ގެ ޑައިރެކްޓަރުވެސް މެއެވެ. ނަމަވެސް ފިލްމް އާއި ބެހޭގޮތުން މިހާތަނަށް އެއްވެސް މައުލުމާތެއް ހިއްސާ ކޮށްފައިއެއް ނުވެއެވެ.
ނަމަވެސް ސަލްމާން ވަރުގަދަ ފިލްމް އަކަށް ތައްޔާރު ވަމުން އަންނަ ކަމަށް މީގެ ދުވަސްކޮޅެއް ކުރިން ފެށިގެން އަންނަނީ މީޑިއާ އިން ރިޕޯޓް ކުރަަމުންނެވެ. އެގޮތުން އެންމެ ފަހުން އޭނާ ފެނިގެން ގޮސްފައިވަނީ ވަރަށް ތުނިކޮން ބޯ ކޮށައި އާމީ ކަޓެއްގައި ހުއްޓައިއެވެ.
ސަލްމާންގެ އާ ފިލްމުގެ ވާހަކަ ރާއްޖޭގެ "ނޮވެމްބަރު 3″ އާ ގުޅުވާފައިވާ އިރު، އެ ހާދިސާ އަކީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަން ވައްޓާލަން ހާޖަރާގެ އަބްދުﷲ ލުތުފީ އިސްކޮށް ހުރެގެން އަވައްޓެރި ސްރީ ލަންކާގެ ތަމަޅަ ޓައިގަރުންތަކެއް ގޮވައިގެން މާލެ އަރައި ދިން އުދުވާނީ ހަމަލާއެކެވެ. ރާއްޖޭގެ ތާރީހުގެ ކަޅު ސަފުހާއެއްގެ ގޮތުގައި ފާހަގަކޮށްލެވޭ އެ ހާދިސާ އަކީ 19 ދިވެއްސަކު ޝަހީދު ވެސް ވި ހާދިސާއެކެވެ.
