ރައްޔިތުންގެ މަޖިލީހުގެ ކުރީގެ މެންބަރު ސައުދުﷲ ޙިލްމީ ކުރިއަށް އޮތް މަޖިލިސް އިންތިޚާބުގައި ވާދަކުރައްވަން ނިންމަވައިފިއެވެ.
ސަޢުދުﷲއަކީ 18 ވަނަ ރައްޔިތުންގެ މަޖިލީހުގެ މެންބަރެކެވެ. އެ މަޖިލީހުގައި ތިނަދޫ އުތުރު ދާއިރާގެ މެންބަރުކަން ކުރެއްވީ ޕީޕީއެމް މެންބަރެއްގެ ގޮތުގައެވެ. ޕާޓީ ބަދަލުކުރެއްވުމުން 2018 ވަނަ އަހަރު ގޮނޑި ގެއްލުނުކަމަށް އިލެކްޝަންސް ކޮމިޝަނުން ކަނޑައެޅި 12 މެންބަރުންގެ ތެރޭގައިވެސް ސައުދުﷲ ހިމެނިވަޑައިގަންނަވައެވެ.
ކުރިއަށް އޮތް މަޖިލިސް އިންތިޚާބުގައިވެސް ސައުދުﷲ ވާދަކުރައްވަން ނިންމަވާފައިވަނީ ތިނަދޫ އުތުރު ދާއިރާއަށެވެ. އެކަން އިއުލާންކުރެއްވީ ރޭ ތިނަދޫގައި ބޭއްވި ޖަލްސާއެއްގައެވެ. މިފަހަރުގެ އިންތިޚާބުގައިވެސް ސައުދުﷲ ވާދަކުރައްވަނީ ޕީޕީއެމްގެ މެންބަރެއްގެ ގޮތުގައެވެ. ސަޢުދުﷲ އަލުން ޕީޕީއެމާއި ގުޅިވަޑައިގެންފައިވަނީ ނިމިދިޔަ ރިޔާސީ އިންތިޚާބުގެ ކެމްޕެއިންގެ ތެރޭގައެވެ. ސަޢުދުﷲ ތާޢިދުކުރެއްވީ ޑރ. މުޙައްމަދު މުޢިއްޒަށެވެ. އަދި ކެމްޕެއިންގައިވެސް ބައިވެރިވެވަޑައިގެންފައިވެއެވެ.
ކުރިއަށް އޮތް މަޖިލިސް އިންތިޚާބުގައި ޕީޕީއެމް ޕީއެންސީން ވާދަކުރަނީ އެކުގައެވެ. އަދި އެ ކޯލިޝަނުގެ ޕްރައިމަރީ ޖެނުއަރީ 20ގައި ބޭއްވުމަށް ވަނީ ނިންމާފައެވެ.
20 ވަނަ ރައްޔިތުންގެ މަޖިލީހުގެ އިންތިޚާބު މާރޗް މަހުގެ ފަހުކޮޅު ނުވަތަ އޭޕްރީލް މަހުގެ ކުރީކޮޅު ބޭއްވުމަށް އިިލެކްޝަންސް ކޮމިޝަނުން ވަނީ ނިންމާފައެވެ.
