އާދެ! މިދުވަސްވަރަކީ ފަލަސްތީނުގެ ބިމުގައި އަނިޔާވެރިކަމާއެކު ވަކިހިއްޕާލާފައިވާ އިޒްރޭލުގެ ނުބައިކަން ޙައްދުފަހަނައަޅައިގޮސް، ފަލަސްތީނުގެ އެތައް ބަޔަކު މަރަމުންދާ ދުވަސްވަރެކެވެ.

އެތަކެއް މުސްލިމުންތަކެއްގެ ފުރާނަތައް އެއްވެސް ކުށެއްނެތި، އެބައިމީހުންގެ ގޯތި ގެދޮރުގައި ތިއްބައި ބޮންއަޅައި ނެތިކޮށްލަނީއެވެ. މަރަނީއެވެ. ޤަތުލު ޢާންމު ހިންގަނީއެވެ. އެތައް ބަޔަކު މިހާރުވެސް ޝަހީދުވެއްޖެއެވެ. ޝަހީދުންގެ ތަފާސްހިސާބުތަކަށް ބަލާއިރު ފަލަސްތީނުގެ ބިމުން ފޭރިނުގަނެވި ބާކީ އޮތް ބިންކޮޅުގައި ތިބި ޣައްޒާގެ އަހުލުވެރިންގެ ތެރެއިން 8000 އިން މައްޗަށް ޝަހީދުންގެ ޢަދަދު ހިނގައްޖެއެވެ.

ހުރިހިތާމައެއްގެ ބޮޑުކަމާއެވެ. އިންސާނީ ޙައްޤަށް ދަޢުވާކުރާ ފަރާތްތަކުން މިއަދު އެއޮއްގެން އެތައް ކުޑަކުދިންނެއް ޝަހީދުކުރަނީއެވެ. ބޮޑެތި ފިރިހެނުންނަށް ޢާންމުކޮށް ބަޔަކު ރަޙުމް ނުކުރިޔަސް، ދުނިޔޭގެ އެއްވެސް ތަނެއްގައި އެއްވެސް ޒަމާނެއްގައި ކުޑަކުޑަ ތުއްތު މަޢުޞޫމުކުދިންނަށް، މިހާއަނިޔާވެރިވި ވާހަކަ އަޑުއެހީމުތޯއެވެ! ހަމަގައިމުވެސް މިފަހަކުން އަދި އަޅުގަނޑެއް ނާހަމެވެ.

މަޢުޞޫމު ތުއްތު ކުދިން ރަޙުމެއްނެތި މެރުމަކީ މިއީކީ ސަލާމަތް ބުއްދި ހުރި އެއްވެސް އިންސާނަކު ނުކުރާނެ ވަރުގެ ބޮޑު ކުށެކެވެ. ނަމަވެސް މިއަދު އެޖަރީމާވެސް އެއޮއްގެން އިޒްރޭލުން ހިންގަނީއެވެ. ހުޅަނގުގެ މުނާފިޤު ޤައުމުތަކުން ދީފައިވާ ހަތިޔާރުގެ ބޭނުންކޮށްގެންނެވެ. އަދި އެބައިމީހުންގެ ފުރިހަމަ އެއްބާރުލުމާއެކުވެސް މެއެވެ. އަދި ނުވިތާކަށް މިކަންތައްތައް ދިފާޢުކުރުމަށް ލަދުކުޑަކަމާއި އެކު ވާހަކަދައްކައި ހަދަނީއެވެ.

މިއަދު ކުޑަކުޑަކުދިން ޙައްޤަކާއި ނުލައި އެބައިމީހުންގެ ގޯތިގެދޮރުގައި ތިއްބައި މެރުމަކީ ހުޅަނގުގެ ޤައުމުތަކުގެ ވެރިންނަށް ވަރަށް އާދައިގެ ކަމެކެވެ. ނަމަވެސް މިއަދު މިއީކީ އިއްޔެއެއް ނޫނެވެ. މިޒަމާނަކީ ކުރީގެ ޒަމާނެއްވެސް ނޫނެވެ. އިޒްރޭލުން ބޮޑެތި އެތައް ޖަރީމާއެއް ހިންގާތާ ހަތްދިހަ އެތައް އަހަރެއް ވެއްޖެއެވެ. ނަމަވެސް މީގެ ކުރީގައި ޓެކްނޮލޮޖީގެ ކުރިއެރުން ދުނިޔޭގައި ޢާންމުވެފައި ނުވާތީ ދުނިޔޭގެ ކަންކޮޅުތަކުގައި ދިރިއުޅޭ ފަރާތްތަކަށް އެކަން ހުޅަނގުން ދިޔައީ އޮޅުވާލަމުންނެވެ.

ހުޅަނގުގެ މީޑިޔާތަކާއި، އެބައިމީހުންގެ ޓީވީ ޗެނަލްތަކުން ގެންނަ ޚަބަރުތަކަކީ އެންމެ "އޮތެންޓިކް' ޚަބަރު ސޯސްތައް ކަމުގައި މީހުން ދުށްޓެވެ. ކަންމިހެން އޮތުމުން މީގެކުރީގައި ދުނިޔެ އޮތީ ޣާފިލުކަމެއްގައެވެ. އަދި ބޮޑު އޮޅުވާލުމެއްގެ ތެރޭގައެވެ. ނަމަވެސް މިއަދު އިޒްރާއީލުން ހިންގާ ޖަރީމާތައް ފޮރުވޭނޭ ގޮތެއް ނެތެވެ. ފަސްއެޅޭނޭ ގޮތެއްނެތެވެ. ސޯޝަލްމީޑިޔާ ފުޅާވެ، އަދި ސޯޝަލްމީޑިޔާގެ ޒަރީޢާއިން އިޒްރޭލާއި، އެމެެރިކާ އިސްވެ ހުޅަނގުގައުމުތަކުން ހިނގާ ޖަރީމާތައް ފަޟީޙަތްވެއްޖެއެވެ. އަދި ދުނިޔޭގެ ހުރިހާ ކަންކޮޅެއްގައި މިދޮގުތަކާއި ދެކޮޅަށް، ޢަދުލުވެރިކަމާއި އިންސާނިއްޔަތުކަމުގެ ލޭ ހިނގާ ފަރާތްތަކުން އެއޮއްގެން މުޒާހަރާތައް ކުރަނީއެވެ.

ސޯޝަލްމީޑިޔާގެ ވަސީލަތްތަކުގައި ހުންނަ އެތައް ކޮންޓެއްޓެއް، ޔަހޫދީވެރިންތައް އަދި އެމީހުންގެ އަޢުވާނުންތައް، އެމީހުންގެ އަގުވެއްޓިދާނެތީ ފުހުނަސް، ﷲ ގެ ރަޙުމަތާއެކު އޭގެ ބައެއް ވެރިންނަކީ ކާފިރުން ކަމަށްވިޔަސް، ޢަދުލުވެރިކަމަށް ލޯބިކުރާ ބައެކެވެ. އެހެންވެ މިއަދާއި ހަމަޔަށްވެސް ހުރިހާ ކޮންޓެއްޓެއް ބްލޮކްނުކުރެވިގެން އެއޮއްގެން، އިޒްރޭލާއި އެމެެރިކާ ރުޅިގަދަވަނީއެވެ. ރުޅިގަދަވާނެ ވަރަކަށް ރުޅިގަދަވާށެވެ! އަދި ތިޔަ ރުޅީގައި ތިޔަކާފިރުތަކުން މަރުވާށެވެ! އޭރުން ގަދަފަދަ ވަންތަ އިލާހުގެ ޙަޟްރަތުގައި ހުރި ޢަޛާބުގެ ރަހަ އަދި ދެކޭނެއެވެ.

ތާރީޚީގޮތުން ފަލަސްތީނުގެ އަހުލުވެރިންނަކީ ކޮންބައެއް؟

ފަލަސްތީނު ބިން އިސްތިޢުމާރުކުރިތާ މިހާރު 73 އަހަރުވެއްޖެއެވެ. ޔަހޫދީންގެ ދަޢުވާއަކީ އެބިމަކީ އެބައިމީހުންގެ ބިމެއްކަމަށް ބުނުމެވެ. އަދި މިދަޢުވާކޮށް ޝުބުހަ އުފައްދައި މުސްލިމުންގެ ތެރޭގައި ހުރި ބައެއް މޮޔައިންވެސް މިބަހަށް ހެއްލި އިޒްރޭލަށް ވަކާލާތުކޮށްދޭތަން ފެނިއްޖެއެވެ.

ނަމަވެސް ދަންނަވަންތޯއެވެ. މިއީ ބޮޑު އޮޅުވާލުމަކާއި މަކަރެކެވެ. ތާރީޚިގޮތުން ވާރިދުވެފައިވާ ޙަޤީޤަތްތަކަށް ބަލާއިރު، އެބިމަކީ ކަންޢާންގެ ބިމެކެވެ. އެތަނުގައި މީގެ 6،000 އަހަރުކުރިން، (ޢީސާގެފާނުންގެ ޢީދުމީލާދުގެ 4،000 އަހަރުކުރިން) ދިރިއުޅުނީ ކަންޢާނުންނެވެ. ކަންޢާނުންނަކީ ޢަރަބި ޖަޒީރާއިން މައްޗަށް، އުތުރަށް، ހިޖުރަކުރިމީހުންނެވެ. އޭރު ބައިތުލް މަޤްދިސްގެ ބިމުގައި އެހެންބަޔަކު ދިރިނޫޅެއެވެ. އެތަނުގައި އެންމެ ފުރަތަމަ ވަޒަންވެރިވީ ކަންޢާނުންނެވެ.

އިބްރާހީމްގެފާނުން، އަދި އެކަލޭގެފާނުންގެ ޛުއްރިއްޔަތު، އާދެ ދަރިކަލުން އިސްޙާޤްގެފާނުންގެ ދަރިކަލުން ޔަޢުޤޫބުގެފާނު (ޢަލައިހިމުއްސަލާމް ޖަމީޢަން) ދިރިއުޅުއްވީ މީލާދީން 1،700 ވަރަކަށް އަހަރު ކުރިންނެވެ. ޔަޢުނީ ކަންޢާނުން، ކަންޢާންބިމުގައި އުޅޭތާ 2300 އަހަރުފަހުންނެވެ. ދެން ޔަޢުޤޫބުގެފާނުުންނަށްފަހު، ޔޫސުފްގެފާނުންގެ ދުވަސްވަރު، އިސްރާއީލްގެ ފާނު، އާދެ ޔަޢުޤޫބުގެފާނާއި، އަދި އެކަލޭގެފާނުންގެ ދަރިފަސްކޮޅު ބަދަލުވެލެއްވީ މިޞްރަށެވެ. އަދި މިޞްރުގައި އެދަރިކޮޅު 400 އަހަރުވަންދެން ތިއްބެވެ.

މި ދުވަސްވަރު ބަނީއިސްރާއީލުންނާއިމެދު ފަހުން އައި ފިރުޢައުނުން ކަންތައްކުރީ ވަރަށް އިހާނެތި ކޮށެވެ. އެހެންވެ އެމީހުންގެތެރެއިން މޫސާ ޢަލައިހިއްސަލާމް ﷲ ތަޢާލާ ފޮނުއްވެވިއެވެ. އެކަލޭގެފާނުން ވަޑައިގެން ބަނީއިސްރާއީލުންނަށް ދީނަށްގޮވާލައްވާ، އެމީހުންނަށް ދިމާވެފައިވާ ނިކަމެތިކަމުން މިންޖުކޮށްދެއްވުން އެދި، ﷲ ގެ ޙަޟްރަތަށް ދުޢާކޮށްދެއްވައި، އެމީހުން ގޮވައިގެން ބޮޑު މުޢުޖިޒާތްކަމުގައިވާ ކަނޑުފެޅުއްވުމުގެ ޙާދިސާއާއި، ހިލައިން ފެނުގެ އާރުތަށް ނެރުއްވި ހާދިސާއަށްފަހުވެސް، އާދެ މިހުރިހާ ކަމެއް ބަނީ އިސްރާއީލުންގެ ލޯކުރިމަތީގައި ހިނގާފައިވާހިނދު ވެސް އޭގެ ފަހުން ސާމިރިއްޔޭ ކިޔާ ޝައިޠާނަކު އެމީހުންނަށް ގެރިއެއް ދައްކާލާއިރަށް އެމީހުންގޮސް އެއަށް އަޅުކަންކުރިއެވެ.

އަނެއްކާވެސް އެބައިމީހުންނަށް ތައުބާލައްވައި، މޫސާގެފާނުންގެ ޒަޢާމަތުގައި ބައިތުލް މަޤްދިސް ފަތަޙަކުރެއްވުމަށް ﷲ އެންގެވުމުން އަނެއްކާ އެބައިމީހުން ބުނީ، "ކަލޭގެފާނާއި، ކަލޭގެފާނުންގެ އިލާހާ ގޮސް ހަނގުރާމަކުރާށޭ…" އެވެ. މިފަދަ ކުފުރުވެރިކޮށް އެބައިމީހުން އެކަމަށް އިންކާރުކުރެއްވުމުން، ﷲ ތަޢާލާ ވަނީ އެބައިމީހުންނަށް އެތަން 40 އަހަރަށް ޙަރާމްކުރައްވާފައެވެ.

އެއަށްފަހު ތީހުގެ ދުވަސްވަރުގައި މޫސާގެފާނުގެ އަވަހާރަވެ ވަޑައިގަތެވެ. ދެން ޔޫޝަޢް ބިން ނޫން، އެބައިމީހުންނާއިގެން އެރަށް ފަތަހަ ކުރެއްވެވިއެވެ. އެރަށް އެބައިމީހުންނަށް އެހިނދަށް ދެއްވީ ފަހަރެއްގައިވެސް އަބަދުގެ އަބަދަކަށް ނޫންވެ. އެރަށް އެބައިމީހުންނަށް އެކަލާނގެ ދެއްވީ ބޮޑު ޝަރުޠެއްގެ މަތިންނެވެ. އެއީ އެބައިމީހުން ސީދާވެގެންވާ ތެދުމަގުގެ މަތީގައި ސާބިތުވުމެވެ. ނޫންނަމަ އެމީހުންވެސް ކުރީގެ އުންމަތްތަކުގެ މީހުން ޖެހުނު ކަންތައްތައް އެބައިމީހުންނަށްވެސް ޖެހޭނެ ކަމަށެވެ.

މިވާހަކަ އެބައިމީހުންގެ އަތުގައި މިއަދު އޮތް އެޑިޓެޑް ވާޝަން ގައިވެސް އެބައޮތެވެ. ދެން ކަންވީ ކިހިނަކުންތޯއެވެ. މި ޢަހުދުކަށަވަރާއެކު އެބައިމީހުން ފަށައިގަތްދަތުރު ނިމުނީ ތައުރާތު މަސްހުނި ގަނޑެއް މޮޑޭހެން މޮޑެ، އެއްބަޔަކު އަނެއްބަޔަކަށް ޖެހިގަނެ، ހަނގުރާމަކޮށް ޢަދާވާތްތެރިވިބައެއް ކަމުގައި ވެގެންނެވެ. އަދި އިންޖީލުގެ އަހުލުވެރިން އިންޖީލާވެސް ކުޅުނީއެވެ. އެދެމާތް ފޮތަށް އެބައިމީހުން ހިތަށްއެރި އެއްޗެއް އިތުރުކޮށް މަދުކޮށް މާތް ﷲ ބާވައިލެއްވި ފޮތުގެ ޙުރުމަތަށްވެސް އަރައިގަތީއެވެ.

އަދި ޞާލިޙް ވަލީވެރިއެއްކަމުގައިވާ ޢުޒައިރަކީ ކަލާނގެ ދަރިކަލެއްކަމަށް ބުނެ، ޔަހޫދީން ﷲ ގެ ދީނުންވެސް ބޭރުވެއްޖެއެވެ. އަދި އިންޖީލުގެ އަހުލުވެރިން ޢީސާގެފާނަކީ ކަލެއް ކަމަށް ނުވަތަ ކަލާނގެ ދަރިކަލެއްކަމަށް ދަޢުވާކޮށް ﷲ ގެ އެއްކައުވަންތަކަމަށް ސީދާ ކާފިރްވީއެވެ.

ވީމާ ޔަހޫދީންނަކަށް ބައިތުލް މަގްދިސް ޙައްޤުވާނެ ހަމައެއްވެސް ގޮތެއް ތާރީޚީގޮތުންވިޔަސް ނުވަތަ ދީނީގޮތުންވިޔަސް ނެތެވެ! މިއަދު އެފެންނަނީ ކުފުރުގެ ގިނައަހުލުވެރިން އެއްކޮޅަކަށް ޢަރައި ބާރުގެ ބޭނުން ނަހަމަގޮތުގައި ހިފާ ލާއިންސާނިއްޔަތުގެ ރިވެތި ނަމޫނާއެކެވެ.