އިންތިޚާބީ ރައީސް ޑރ. މުއިއްޒުއަކީ އެއްވެސް ގައުމަކާއި ދެކޮޅުވެސް އަދި އެއްކޮޅުވެސް ބޭފުޅެއް ނޫންކަމަށާއި އެމަނިކުފާނަކީ "ޕްރޯ މޯލްޑިވްސް" ބޭފުޅެއް ކަމުގައި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ ސްރީ ލަންކާއަށް ކުރެއްވި ނުރަސްމީ ދަތުރުފުޅެއްގައި ވެރިރަށް ކޮލަމްބޯގައި އޮތް ޖިއޯ ޕޮލިޓިކް އިވެންޓެއްގައި ވާހަކަފުޅު ދައްކަވަމުންނެވެ.

މިއިވެންޓުގައި ވާހަކަ ދައްކަވަމުން ނަޝީދު ވިދާޅުވީ ޑރ. މުއިއްޒުއަކީ ވަކިއަތަކަށް ނުޖެހޭ ގައުމީވަންތަ ބޭފުޅެއް ކަމަށާއި، ފާއިތުވެދިޔަ ސަރުކާރުތަކުގައި ފެނިގެންދިޔައީ އެމަންޒަރު ނޫންކަމުގައެވެ. އެގޮތުން ކުރީގެ ރައީސް ޔާމިންގެ ސަރުކާރުން ޗައިނާއާއި ޚާއްސަ ގުޅުމެއް ބޭއްވިއިރު މި ސަރުކާރުން އިންޑިއާއާއި ޚާއްސަ ގުޅުމެއް ބާއްވާފައިވާކަމަށް ނަޝީދު ވިދާޅުވިއެވެ.

އަދި ނަޝީދު ވިދާޅުވީ އިންތިޚާބީ ރައީސް އެއްވެސް ގައުމެއްގެ މެދުގައި ތަފާތުކުރުންތަކެއް ނުގެންގުޅޭނެ ކަމަށާއި، އިންތިޚާބީ ރައީސްގެ ވެރިކަމުގައި ގައުމުތަކުގެ މެދުގައި އޮންނަ ގުޅުންތަކަށް ހެޔޮ ބަދަލުތަކެއް އަންނާނެ ކަމުގައެވެ.

ރިޔާސީ އިންތިޚާބު ކާމިޔާބު ކުރެއްވުމަށްފަހު ޑރ. މުއިއްޒު ވިދާޅުވެފައިވަނީ އެމަނިކުފާނަކީ ހަމައެކަނި "މޯލްޑިވްސް ޕްރޯ" ބޭފުޅެއްކަމުގައެވެ. އަދި ވިދާޅުވެފައިވަނީ އެމަނިކުފާނަކީ އިންޑިއާވެސް އަދި ޗައިނާވެސް ޕްރޯ ބޭފުޅެއް ނޫންކަމަށާއި، އެއްވެސް ގައުމަކާ އެކީ ދެކޮޅުވެރިކަމެއްވެސް ނުބާއްވާނެ ކަމުގައެވެ.

ޑރ. މުއިއްޒު ރިޔާސީ އިންތިޚާބު ކާމިޔާބު ކުރެއްވުމުގެ ކުރިން ގިނަ ބަޔަކު ސިފަކުރަމުން އައިސްފައިވަނީ އެމަނިކުފާނަކީ އިންޑިއާއާއި ދެކޮޅު، ޗައިނާއާއި އެއްކޮޅު ބޭފުޅެއްގެ ގޮތުގައެވެ.