އިންތިޚާބީ ރައީސް ރައީސް ޑރ.މުޙައްމަދު މުޢިއްޒު ވަޢުދުވެވަޑައިގެންފައިވާ އައްޑޫ ސިޓީ ހިތަދޫއާއި ހުޅުމީދޫ ގުޅުވާލާ ބްރިޖު މަޝްރޫޢުގެ ސާރވޭއަށް އަންނަ އަހަރުގެ ބަޖެޓުގައި ފައިސާ ހިމަނައިފިއެވެ.

އައްޑޫ ސިޓީގެ ގުޅިފައިވާ ރަށްތަކާއި ވަކިން އޮންނަ ހުޅުމީދޫ ގުޅުވާލުމަކީ އިންތިޚާބީ ރައީސްގެ ވަޢުދުފުޅެކެވެ. އެ މަޝްރޫޢުއަށް އަންނަ އަހަރަށް ލަފާކޮށް މަޖިލީހަށް ހުށައެޅި ބަޖެޓުގައި ވަނީ ފައިސާ ހިމަނާފައެވެ. އެގޮތުން އެ މަޝްރޫޢުގެ ސާރވޭއަށް 30 މިލިއަން ރުފިޔާ ކަނޑައަޅާފައިވެއެވެ.

އައްޑު ސިޓީގެ ރައްޔިތުން ޚާއްސަކޮށް، ހުޅުދޫ މީދޫ ރައްޔިތުން، ހިތަދޫއާއުި ބްރިޖަކުން ގުޅާލުމަށް ކުރަމުންދާ އުންމީދަށް ނިމުން ގެނެސް އެކަން ކޮށްދެއްވާނެ ކަމުގެ ޔަގީކަން އިންތިޚާބުގެ ކެމްޕެއިންގައި މުއިއްޒު ވަނީ ދެއްވާފައެވެ. އެގޮތުން މުއިއްޒު ކެމްޕެއިންގައި އެރަށަށް ވަޑައިގަތުމުން  ޝަރަފްގައި ހުޅުދޫގައި، ބޭއްވި ޖަލްސާގައި ތައްޔާރުކޮށްފައިވާ ޕޯޑިއަމް ތައްޔާރު ކޮށްފައިވަނީ ބްރިޖަކާއިއެކުއެވެ. ރަމްޒީ މިބުރިޖުން ދިން މެސެޖަކީ ބްރިޖަކަށް އައްޑޫ ރައްޔިތުން އުންމީދު ކުރާ ވަރެވެ. ބްރިޖުމަތީ އައްތަ އަޅުވައި ހުންނަވާ ހުޅުދޫ ރައްޔިތުންގެ ކުރިމަތީގައި ވަރަށް ޖޯޝާއިއެކު މުއިއްޒު ވިދާޅުވީ ބްރިޖުގެ ހުވަފެން އައްޑޫ ސިޓީގެ ރައްޔިތުންނަށް ހަގީގަތަކށް ހަދައި ދެއްވާނެކަމަށެވެ.

އަޅުގަނޑު އައްޑޫ ސިޓީގެ ރައްޔިތުންނަށް ޔަގީންކަމާއިއެކު މިދަންނަވަނީ ބްރިޖެއް އެޅޭނީ އެކަމަށް ވައުދުވެ އެކަން ކޮށްދެވާފައިވާ ބަޔަކަށޭ، ބުރިޖެއް އަޅަންބުނެ ނޭޅުނު ބަޔަކަށް އެކަމެއް ނުވާނެ. އައްޑޫ ސިޓީގެ ހިތަދޫއާއި ހުޅުދޫ މީދޫ ގުޅުވައިދޭ 15 ކިލޯ މީޓަރުގެ ބްރިޖް އަޅައިދީ އައްޑޫ ސިޓީ ރައްޔިތުންގެ ހުވަފެން ޙަޤީޤަތަކަށް ހަދައިދޭނަން.

– މުއިއްޒު މިހެން ވިދާޅުވުމާއިއެކު ޖަލްސާގައި ތިބި އައްޑޫ ރައްޔިތުން ހަޅޭކުގެ އަޑާއިއެކު އަތްޖަހައި މުއިއްޒުއަށް ވޯޓު ދިނުމަށް ގޮވާލިއެވެ.

ބްރިޖު އަޅާނެކަމަށް މިސަރުކާރުންވެސް ކުރިން ބުނެފައިވެއެވެ.ނަމަވެސް އެ މަޝްރޫޢުގެ މާބޮޑު މަސައްކަތެއް ކުރިއަށް ގޮސްފައެއް ނުވެއެވެ.