ރައީސް އިބުރާހިމް މުހައްމަދު ސާލިހުގެ ވެރިކަމުގެ ދައުރު ފެށިގެންދިޔައީ އެމްޑީޕީ ވަރުގަދަ ޕާޓީއެއްގެ ގޮތުގައި އޮވެ، ސަރުކާރުގެ ދެމެހެއްޓުމަށްޓަކާވެސް އެމްޑީޕީގެ ދެ ބާނީންގެ ގޮތުގައި ސިފަކުރެވޭ ރައީސް ސާލިހާއި ރައީސް ނަޝީދު ކަމަރު ބަންނަވައިގެން ތިއްބަވައިގެންނެވެ.

ދެ ބޭފުޅުންވެސް އެއްއޮޑިއެއްގައި، ބަދަހިކަމާއެކު ތިބެ ދަތުރުކުރުމަށް އަހުދުވެގެންނެވެ. އަދި އެ ދަތުރު ކާމިޔާބުކަމާއެކު ނިންމުމަށް އަޒުމު ކަނޑައަޅާ، 2018 ވަނަ އަހަރުގެ ރިޔާސީ އިންތިޚާބު ކާމިޔާބުކޮށް، 19 ވަނަ މަޖިލިހުގެ ސުޕަރ މެޖޯރިޓީވެސް ހޯދާފައި ވެއެވެ.

އެހެންނަމަވެސް، ސިޔާސީ ގޮތުން ހަލަބޮލި، އެހާމެ ގޮންޖެހުން ބޮޑު ދައުރެއް މިއަދު އެމްޑީޕީގެ ސަރުކާރުން ނިންމާލާއިރު، ފަހަތަށް އެނބުރި ބަލާލީމާީ ފެންނާން އޮތީ، އެމްޑީޕީއަށާއި އަދި އެޕާޓީގެ ދެބާނީން ކަމުގައިވާ ރައީސް ނަޝީދަށާއި ރައީސް ސާލިހުގެ ހިތްޕުޅަށްވެސް ފިނިކަން ލިއްބައިދޭނެ 5 އަހަރުގެ ގޮތުގައިކަމަށް ދެންނެވޭކަށް ނެތެވެ.

ދައުރުގެ ތެރޭގައި ސިޔާސީ އެތައް ހަގުރާމައެއް ކޮށް، ޕާޓީގެ އެތެރޭގެ އިންތިޚާބުތަކުގައި ޚުދު ދެބޭފުޅުންމެ ވާދަކޮށް، އެއްބޭފުޅަކު އަނެއް ބޭފުޅެއްގެ މައްޗަށް ހޯދި ކާމިޔާބާއި ނާކާމިޔާބީތަކާއެކު، ފެންނާން އޮތީ ދެބޭފުޅުންގެ ހަތުރުވެރިކަމުގެ ނަތީޖާއެއްގެ ގޮތުން، އެމްޑީޕީއަށް ވެރިކަންވެސް ގެއްލިގެން ދިޔަ މަންޒަރެވެ.

ރައީސް ސާލިހަށް ދެވަނަ ދައުރެއް ކަށަވަރު ނުކުރެވި ދިޔައީއެވެ. ރައީސް ނަޝީދަށް ދައުރު ނިންމާލަން ޖެހުނީ %7ގެ ލެގަސީއަކާއެކީއެވެ. ދެބޭފުޅުންވެސް ޒާތީ ދުޝްމަނުންނަށް ބަދަލުވެ، ދެބޭފުޅުންގެވެސް ވަށާލާފައި މިއަދު އޮތީ ނިމުމެއްނުވާ ހަސަދައާއި ފިތުނައެވެ.

ހަމައެއާއެކު، ރައީސް ސާލިހުގެ ރިޔާސީ ދައުރު އަންނަ ނޮވެމްބަރުމަހުގެ 17 ގައި ނިމިގެންދާއިރު، އެމްޑީޕީގެ މިހާރުގެ އެންމެ ބޮޑު އަމާޒަކީ ނަޝީދު މަޖިލިހުގެ ރިޔާސަތުން ދުރު ކުރުމުވެ. އާ ރައީސް ހުވާކުރެއްވުމުގެ ރަސްމިއްޔާތުގައި މަޖިލިސް ރިޔާސަތުގައި ނަޝީދުއަށް އިން ނުދިނުމެވެ. އެއީ ކޮންމެފަދަ އަގެއް ދައްކައިގެންވެސް މެއެވެ.

ނަޝީދު ރިޔާސަތުން ދުރުކުރުމަށް އެމްޑީޕީން ސުޕްރިމް ކޯޓަށް!

ރައްޔިތުންގެ މަޖިލިސް ނުހުއްޓުވޭނެ ކަމަށާއި، މިހާރު އެޖެންޑާ ކޮށްފައިވާ ނަޝީދުގެ އިތުބާރު ނެތްކަމުގެ މައްސަލަ ކުރިޔަށް ނުގެންގޮސް މަޖިލިހުގެ އެހެން މަސައްކަތެއް ނުކުރެނޭކަމަށް ކަނޑައަޅާ ދިނުމަށް އެމްޑީޕީން މިހަރުވަނީ ދުސްތޫރީ މައްސަލައެއް ސުޕްރިމް ކޯޓަށް ހުށަހަޅާފައެވެ.

ނަޝީދު ރިޔާސަތުން ދުރުކުރުމަށް އެމްޑީޕީން ސުޕްރީމް ކޯޓަށް ގޮސްފައިވަނީ، މަޖިލިސް ރައީސްގެ މައްޗަށް އިތުބާރު ނެތްކަމުގެ މައްސަލަ މަޖިލިހުގައި ކުރިޔަށް ގެންދާން ޖެހޭނީ ރައްޔިތުންގެ މަޖިލިހުގެ ނާއިބު ރައީސް ރިޔާސަތު ބަލަހައްޓާ ޖަލްސާއެއްގައިކަމަށް މަޖިލިސް ގަވާއިދުގައި ބުނެފައި ވަނިކޮށް، ނާއިބު ރައީސް އީވާ އާލާސްކަންފުޅާ އުޅުއްވާކަމަށް ވިދާޅުވެ، މަޖިލިހަށް ސަލާމް ބުނުމާއެކު، އީވާ ސަލާމުގައި ހުންނަވަނިކޮށް ނަޝީދުގެ އިތުބާރު ނެތްކަމުގެ މައްސަލަ ކުރިޔަށް ނުގެންދެވޭނެކަމަށް މަޖިލިސް އިދާރާއިން ނިންމުމާއި ގުޅިގެންނެވެ.

ރައްޔިތުންގެ މަޖިލިހުގެ ރައީސްގެ އިތުބާރު ނެތްކަމުގެ މައްސަލަ އިއްޔެއަށް އެޖެންޑާ ކޮށްފައިވަނިކޮށް، އީވާ ސަލާމް ބުނުމާއެކު ޖަލްސާ ނިންމާލުމަށް މަޖިލިސް އިދާރާއިން ނިންމި ނިންމުމާ ދެކޮޅަށް އެމްޑީޕީގެ މެމްބަރުން އިހުތިޖާޖުކޮށް އިދާރީ މުވައްޒަފުންގެ ތަކެއްޗަށްވެސް ގެއްލުން ދީފައި ވެއެވެ.

މަޖިލިހުގެ ޑިމޮކްރެޓްސް ޕާޓީގެ މެމްބަރުން ވިދާޅުވަމުން ގެންދަވަނީ، މަޖިލިސް ރައީސްގެ އިތުބާރު ނެތްކަމުގެ މައްސަލަ އޮއްވާ މަޖިލިސް ރައީސަށް ޖަލްސާގެ ރިޔާސަތުގައި ނީންނެވޭނެ ކަމުގައެވެ. މަޖިލިހުގެ ގަވާއިދުގައި އޮތް ގޮތުން މަޖިލިހުގެ ނާއިބު ރައީސްގެ އިތުބާރު ނެތްކަމުގެ މައްސަލަ ކުރިޔަށް ގެންދާން ޖެހެނީ އެމަޖިލިހުގެ ނާއިބު ރައީސް ރިޔާސަތު ބަލަހައްޓާ ޖަލްސާއެއްގައެވެ.

އެމްޑީޕީން އެދެނީ ދެކަމެއް ސުޕްރިމް ކޯޓުން ނިންމައި ދިނުމަށް!

މިމައްސަލައާއި ގުޅިގެން، އެމްޑީޕީން ސުޕްރިމް ކޯޓަށް ހުށަހެޅި ދުސްތޫރީ މައްސަލާގައި އެދިފައިވަނީ ދެ ކަމެއް އެ ކޯޓުން ނިންމައި ދިނުމަށެވެ.

ފުރަތަމަ ކަމަކީ މަޖިލިހުގެ ރައީސް މަގާމުން ދުރުކުރުމުގެ މައްސަލަ ކުރިޔަށް ގެންދިއުމަށް މަޖިލިހުގެ ނާއިބު ރައީސަށް ނާދެވިއްޖެ ހާލަތުގައި، މަޖިލިހުގެ ގަވާއިދުގެ 44 ވަނަ މާއްދާގައިވާ ގޮތުގެ މަތިން، މަޖިލިހުގެ ޖަލްސާ ކުރިޔަށް ގެންދެވޭކަމަށް ކަނޑައަޅާ ދިނުމަށެވެ.

ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގެ ހ. ގައި އޮންނަނީ، މަޖިލިސް ރައީސާއި ނާއިބު ރައީސަށް ރިޔާސަތު ނުބެލެހެއްޓޭ ހާލަތުގައި، ރިޔާސަތު ބެލެހެއްޓުމަށް މަޖިލިހުގެ 5 މެމްބަރަކު ތިއްބަވާގޮތަށެވެ. އަދި ޖަލްސާތަކުގެ ރިޔާސަތު ބެލެހެއްޓުމުގެ ފުރުސަތު ދޭން ޖެހެނީ އެ މެމްބަރުންގެ ސީނިއަރިޓީއަށް ބަލައިގެންނެވެ.

އެމްޑީޕީން ސުޕްރިމް ކޯޓަށް ހުށަހެޅި މައްސަލާގެ ދެވަނަ ކަމެއްގެ ގޮތުގައި އެދިފައިވަނީ މަޖިލީހުގެ ރައީސްގެ އިތުބާރު ނެތް ކަމުގެ މައްސަލާގައި ގޮތެއް ނިންމުމަށްފަހު ނޫނީ މަޖިލިހުގެ އެހެން މަސައްކަތަކަށް ނުދެވޭކަމަށް ކަޑައަޅައި ދިނުމަށެވެ.

މިމައްސަލައާއި ގުޅޭގޮތުން، އެމްޑީޕީގެ ވަކީލުން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އޮފީހުގެ ކުރީގެ ލީގަލް ކައުންސެލް އަފީފު ވިދާޅުވީ އިއްޔެގެ މަޖިލިސް ޖަލްސާ ހުއްޓުވާފައިވަނީ ގާނޫނު އަސާސީވެސް އަދި މަޖިލިސް ގަވާއިދުވެސް ތަސައްވަރުކޮށްފައި އޮތް އުސޫލަކުން ނޫންކަމުގައެވެ.

އަދި މަޖިލިސް ޖަލްސާތައް ހުއްޓުވާފައި ބޭއްވުމަކީ ޕާލަމެންޓްރީ ޕްރެކްޓިސްގައި އޮންނަ އުސޫލެއް ނޫންކަމަށްވެސް އޭނާ ވިދާޅުވިއެވެ.

ރައްޔިތުންގެ މަޖިލީހެއް ނުހުއްޓޭނެ. ރައްޔިތުންގެ މަޖިލީހަކީ އުވާލެވޭވެސް ތަނެއް ނޫން. އެހެންވީމާ ރައްޔިތުންގެ މަޖިލީހުގެ މަސައްކަތްތައް ދާން ޖެހޭ ގޮތަށް ގަވައިދުތައް ހެދި ބައްޓަން ކުރެވިފައި އޮއްވާ އެކަން ނުކުރެވޭ ގޮތަށް މަޖިލީހުން ގާނޫނުތަކާ ގަވައިދުތައް މާނަކުރެވިގެންވާނެ ކަމަކަށް އަޅުގަނޑު ނުދެކެން.

އަފީފު ވިދާޅުވިއެވެ.

މަޖިލިސް ރައީސް މަގާމުން ވަކިކުރާ ހާލަތުގައި ނާއިބު ރައީސަށް ޖަލްސާއަށް ވަޑައިގެންނެވޭ ގޮތް ނުވެއްޖެނަމަ ދެން އަމަލުކުރާނެ ގޮތެއް މަޖިލިސް ގަވާއިދުގައި ނެތްކަމަށް މަޖިލިހުގެ އިދާރާއިން ބުނާކަމަށް ވިދާޅުވަމުން އޭނާ ވިދާޅުވީ އެއީ ރަގަޅު ވާހަކައެއް ނޫންކަމުގައެވެ.

އަދި އޭނާ ވިދާޅުވީ އެ ހާލަތުގައި ހަދަންޖެހޭ ގޮތް ރައްޔިތުންގެ މަޖިލީހުގެ 44 ވަނަ މާއްދާގެ ހ. ގައި އެ އެބައޮތް ކަމަށެވެ. އެއީ މަޖިލިސް ރައީސާއި ނާއިބު ރައީސަށް ރިޔާސަތު ނުބެލެހެއްޓޭ ހާލަތުގައި، ރިޔާސަތު ބެލެހެއްޓުމަށް މަޖިލިހުގެ 5 މެމްބަރަކު ތިއްވާގޮތަށް މަޖިލިހުގެ ގަވާއިދުގައި އޮންނަ އޮތުމެވެ.

ދައުރު ނިމުމުގެ ކުރިން، ފަހު ތަޅާލުން!

ރައީސް ސާލިހާއި، ރައީސް ނަޝީދުއާއި ދެބޭފުޅުންގެ މެދުގައި، ނިމިދާ ރިޔާސީ ދައުރުގައި އުފެދުނު ސިޔާސީ ޚިޔާލުތަފާތުވުންތައް، ޕާޓީގެ އެތެރޭގައި އުފެދުނު ފިތުނައަކަށް ބަދަލުވެ، އޭގެ ނަތީޖާއެއްގެ ގޮތުން ޕާޓީ ބައިބައިވެ، ދެބޭފުޅުން ޕާޓީގެ އެތެރޭގައި އޮތް ރިޔާސީ ޕްރައިމަރީގައި ވާދަވެސް ކޮށްފައި ވެއެވެ.

އަދި އެއަށްފަހު، ރިޔާސީ ޕްރައިމަރީން ނަޝީދު ބަލިވެ، ޕާޓީގެ ރިޔާސީ ޓިކެޓް ރައީސް ސާލިހުގެ އަތްޕުޅަށް އެރުމަށްފަހު އެމްޑީޕީ ދޫކޮށް ނަޝީދު އާ ޕާޓީއެއް ހައްދަވާ، މަސައްކަތް ކޮށްފައިވަނީ ރިޔާސީ އިންތިޚާބުން އެމްޑީޕީ ބަލި ކުރުމަށެވެ. އެކަން ނަޝީދަށް ހާސިލު ކުރެވިއްޖެ ކަމުގައި އެއްގޮތަކުން ވިސްނާއިރު ބެލެވެން އޮތްއިރު، ރިޔާސީ އިންތިޚާބުގެ ނާކާމިޔާބީއަށްފަހު އެމްޑީޕީގެ މިހާރުގެ އެންމެ ބޮޑު އަމާޒެއްގެ ގޮތުގައި ފެންނާން އޮތީ މަޖިލިހުގެ ރިޔާސަތުން ނަޝީދު ދުރުކުރުމެވެ. އާ ރައީސް ހުވާކުރުމުގެ ރަސްމިއްޔާތުގެ މަޖިލިސް ރިޔާސަތުގައި ނަޝީދަށް އިނދެވުނަ ނުދިނުމެވެ.

އެއީ އެކަމަށްޓަކާ ގިރާކުރާން ޖެހުނު ކޮންމެ ގޮންޖެހުމެއް ގިރާކޮށްގެން ނަމަވެސްމެއެވެ. އެގޮތުން، ނަޝީދު ރިޔާސަތުން ދުރުކުރުމުގެ ޖަލްސާއަށް މަޖިލިސް ނާއިބު ރައީސް އީވާ ހުރަސް އަޅުއްވަމުން ގެންދަވާކަމަށް ކުރެވޭ ތުހުމަތުތަކާއެކު، ނަޝީދުގެ ރިޔާސަތު ބަދަލުކުރުމަށް އެންމެފަހުން އެމްޑީޕީން ވަނީ ސުޕްރިމް ކޯޓަށް ގޮސްފައެވެ.

ރައީސް ސާލިހުގެ ދައުރުގެ ތެރޭގައި ނަޝީދުއާއި ދެބޭފުޅުންގެ މެދުގައި އުފެދުނު ސިޔާސީ ތަޅާފޮޅުންތަކުގައ ދެބޭފުޅުންވެސް އެއް ބޭފުޅަކު އަނެއް ބޭފުޅެއްގެ މައްޗަށް ހޯދަމުންދާ ކާމިޔާބީތަކާއި، ލިބެމުންދާ ނާކާމިޔާބީގެ އެންމެ ފަހުގެ ބޮޅެއްގެ ގޮތުގައި ފެނިގެންދާނީ ނަޝީދު މަޖިލިސް ރިޔާސަތުން ދުރުކުރުމުގެ މައްސަލަ ކަމުގައި ދަންނަވާން ޖެހެއެވެ. ގިނަބަޔަކު މިހާރު ތިބީ، މި "ފަހުތަޅާލުމުން" ނިކުންނަ ނަތީޖާއެއްގެ އިންތިޒާރީގައެވެ.