ޙުކުމް ކުރައްވާއިރު، ތަފާތު ކުރުމެއް ނެތި ޙުކުމް ކުރައްވެމަށް ރާއްޖޭގެ ހުރިހާ ފަނޑިޔާރުންނަށް، އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާން އިލްތިމާސްކުރައްވާފިއެވެ.

އުއްތަމަ ފަނޑިޔާރު މިކަމަށް އިލްތިމާސް ކުރެއްވީ، އއ. ހިމަންދޫ މެޖިސްޓްރޭޓް ކޯޓުގެ އައު އިމާރާތް ރަސްމީކޮށް ހުޅުއްވައިދެއްވާ ދެއްކެވި ވާހަކަފުޅުގައެވެ.

މި ރަސްމިއްޔާތު ޝަރަފުވެރިކޮށްދެއްވައި ދިވެހިރާއްޖޭގެ އުއްތަމަ ފަނޑިޔާރު ދެއްކެވި ވާހަކަފުޅުގައި، އަދުލު އިންސާފު ފޯރުކޮށްދިނުމަކީ ބުރަ މަސައްކަތެއްކަމަށާއި އެހެންކަމުން އަދުލު އިންސާފު ފޯރުކޮށްދިނުމުގެ މަސައްކަތް ފަނޑިޔާރުން ކުރައްވަންވާނީ ވިސްނުންތެރިކަމާއެކުކަން ފާހަގަކުރެއްވިއެވެ. އަދި މައްސަލަ ނިންމަވަނީ އަމިއްލަފުޅު ވިސްނުމުގައި ނޫންކަމާއި، ރާއްޖޭގެ ގާނޫނުތަކާއި ގަވާއިދުތަކަށް ބަލާފަ އެންމެ އިންސާފުވެރި ގޮތަށްކަން އުއްތަމަ ފަނޑިޔާރު ފާހަގަކުރެއްވިއެވެ. މި ރަސްމިއްޔާތުގައި ވާހަކަފުޅުދައްކަވަމުން އުއްތަމަ ފަނޑިޔާރު ވިދާޅުވީ ޢަދުލުއިންސާފު ހޯދާދިނުމުގައި ފަނޑިޔާރުން ކުރައްވަނީ ވަރަށް ބުރަ މަސައްކަތްތަކެއް ކަމަށެވެ.

އއ. ހިމަންދޫ މެޖިސްޓްރޭޓް ކޯޓުގެ އިމާރާތަކީ، މިދިއަ އަހަރުގެ ޖޫން މަހުގެ 22 ވަނަ ދުވަހުގައި ރީޖަނަލް ބިލްޑަރސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދިޔަ މަޝްރޫޢުއެކެވެ. މީގެކުރިން އެރަށުގައި މެޖިސްޓްރޭޓު ކޯޓު ހިންގަމުންއައީ ރަށު އޮފީހުން، ކޯޓު ހިންގުމަށް ކަނޑައަޅާފައިވާ ކުޑަ ޖާގައެއްގައެވެ. ކުރިން ކޯޓުގެ މަސައްކަތް ހިންގީ 2 ކޮޓަރިއާއި، ކުޑަ ސިޓިން ރޫމަކައި، ފާޚާނާއެއް ހިމެނޭ ބައެއްގައެވެ.

ނަމަވެސް އަލަށް ޢިމާރާތްކުރި ކޯޓު ޢިމާރާތަކީ ޤާނޫނުކުން ތަސައްވަރު ކުރާ ފަދަގޮތަކަށް ޝަރީޢަތްތައް ހިންގުމަށް ބޭނުންވާނެ ޖާގައާއި ވަސީލަތްތައް ހިމެނޭ ތަނެކެވެ. އައު ޢިމާރާތުގައި ޝަރުޢީ ލިޔެކިޔުންތައް އަރުޝީފް ކުރާނެ ޖާގައަކާއި، ޢާންމުންނަށް ޚިދުމަތް ފޯރުކޮށްދިނުމަށް ފަސޭހަވާނެހެން ރިސެޕްޝަން އޭރިއާއެއްގެ އިތުރުން، ވެއިޓިންގ އޭރިއާއެއް ހިމެނެއެވެ.

އުއްތަމަ ފަނޑިޔާރު ވަނީ ޢަދުލުއިންސާފު ހޯދައި ދިނުމަށް ފަނޑިޔާރުން ކުރައްވާ ބުރަ މަސައްކަތް ފާހަގަކުރައްވާފައެވެ.