ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާކޯށްފަނެކަމާމެދު ސުވާލު އުފެދިފައިވަނިކޮށް އަންނަ އާދީއްތަ ދުވަހަށް އެޖެންޑާކޮށްފިއެވެ.
ޖަލްސާގެ އެޖެންޑާގައި ވަނީ ރައީސް ނަޝީދުގެ އިތުބާރު ނެތްކަމުގެ މައްސަލައަށް ގޮތެއް ނިންމުމަށް އެކަންޏެވެ. މި ޖަލްސާގެ ނޯޓިސް މަޖިލީހުގެ އިދާރާއިން މިހާރު ވަނީ މެންބަރުންނަށް ފޮނުވާފައެވެ. އާދީއްތަ އަކީ ޢާންމުކޮށް ޖަލްސާ އޮންނަ ދުވަހެއް ނޫނެވެ. ނަމަވެސް މަޖިލީހުގެ ގަވާއިދުގަިއ ބުނަނީ އިތުބާރު ނެތްކަމުގެ ގަރާރުގެ 14 ދުވަހުގެ ނޯޓިސް ހަމަވުމުން ރަސްމީ ބަންދޫން ދުވަހެއްގައި ޖަލްސާ ބާއްވަން ވާނެކަމަށެވެ.
އެމްޑީޕީން ތުހުމަތުކުރަނީ އެ ޖަލްސާއަށް މަޖިލީހުގެ ނާއިބު ރައީސް ވަޑައިނުގަތުމަށް މަސައްކަތްކުރާކަމަށެވެ. މަޖިލީހުގެ ގަވާއިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ހުށައަޅައި އެމައްސަލަ ކުރިއަށް ގެންދާނަމަ ރިޔާސަތު ބަލަހައްޓާނީ މަޖިލީހުގެ ނާއިބު ރައީސްކަމަށެވެ.
މީގެ ކުރިންވެސް މަޖިލީހުގެ ރައީސާއި ނާއިބު ރައީސްގެ އިތުބާރު ނެތްކަމުގެ މައްސަލަ އެމްޑީޕީން މަޖިލީހަށް ހުށައެޅިއެވެ. ނަމަވެސް ރިޔާސީ އިންތިޚާބުގެ ދެވަނަ ބުރާ ދިމާކޮށް، އިތުބާރު އޮތްކަމަށް ބުނެ އެމްޑީޕީން ވަނީ އެ މައްސަލަ އަނބުރާ ގެންގޮސްފައެވެ.
މިފަހަރު ހުށައެޅީ ނަޝީދުގެ އިތުބާރު ނެތްކަމަށް އެކަންޏެވެ. އެ މައްސަލަ ހުށައެޅީ އެމްޑީޕީގެ 49 މެންބަރުން ސޮއިކޮށްފައެވެ.
One Response
އެމްޑީޕީގެ ލީޑަރޝިޕަށް ހަލާކުހުރި. ކަލޭމެންގެ އަމިއްލަ އެޖެންޑާ ކުޅޭކަށްނޫނޭ ރައްޔިތުން ކަލޭމެން ހޮވާފަ ތިތިބީ. ނަމަނަމަ ތިޔައިން އެކަކުވެސް ވޯޓު ހޯދަން ގޭދޮރުމައްޗަށް ނާރާތި. ކަރުކެހިފަ މޫނަށް ކުޅުޖަހާނަން. ކަލޭމެން މަޖިލީހަށް ވަދެ ވައްކަމާއި ކޮރަޕްޝަނަށް މަގުފަހި ކޮށްފާނެ ދޮރުތައް ބަންދުކޮށް، އިބޫ ވެރިކަމަށް ގެނައި އިންސާފުގެ މައިގަނޑު ވައުދުތައް ނުފުއްދާ އެހެން ގަނޑެއް ގަންނަން އުޅުނީމަ، ރައީސް ނަޝީދު އެކަންކަން ހުއްޓުވަން ކުރި މަސައްކަތާއި ދެކޮޅުހަދައި، އަމިއްލަ އެދުން އެންމެ އެދެވޭ ގޮތަށް ނުފުއްދުނީމާ އޭގެ ހަސަދަ ރ.ނަޝީދަށް ތިޔަ ބާލުވަނީ. އަހަރުމެން މިތިބީ ވާނުވާ ބަލަންށޭ… ކަލޭމެން ކުރި ބޮޑު ހުވާ މިހާރު ހަނދާންވެސް ނެތް.