ޔުއެފާ ޗެމްޕިއަންސް ލީގް ގްރޫޕް ސްޓޭޖުގައި ޕީއެސްޖީއިން މިލާން ބަލިކޮށްފިއެވެ.
ޕީއެސްޖީ އަމިއްލަ ދަނޑުގައި މިލާންއާއި ދެކޮޅަށް ކުޅުނު މެޗް ކާމިޔާބުކޮށްފައިވަނީ 3-0ގެ ނަތީޖާއިންނެވެ. މެޗުގެ ފުރަތަމަ ހާފްގެ ކުޅުން ފެށި ދެ ޓީމުންވެސް ކުޅެމުންދިޔައީ ވަރަށް ރަނގަޅު ކުޅުމެކެވެ. ނަމަވެސް ޕީއެސްޖީއިން މެޗްގެ 32 ވަނަ މިނެޓުގައި މެޗްގެ ފުރަތަމަ ލަނޑު ކާމިޔާބުކޮށްފަވެއެވެ. މި ލަނޑު ކާމިޔާބުކޮށްދީފައިވަނީ ފްރާންސްގެ އުމުރުން 24 އަހަރުގެ ކީލިއަން އެމްބާޕޭއެވެ. މީ އެމްބާޕޭ މިއަހަރުގެ ޗެމްޕިއަންސް ލީގުގައި ޖެހި ދެވަނަ ލަނޑެވެ. މި ލަނޑާއެކު އެމްބާޕޭ ޕީއެސްޖީއަށް ކާމިޔާބުކޮށްދިން ލަނޑުގެ އަދަދު 200 އަށް އަރައެވެ. މެޗްގެ ފުރަތަމަ ހާފް ނިމިގެންދިޔައީ 1-0 ގެ ނަތީޖާއިން ޕީއެސްޖީ ކުރީގައޮވެގެންނެވެ.
ދެވަނަ ހާފްގެ ކުޅުން ފެށި މެޗްގެ 53 ވަނަ މިނެޓުގައި ޕީއެސްޖީން ދެވަނަ ލަނޑު ކާމިޔާބުކޮށްފަވެއެވެ. މި ލަނޑު ކާމިޔާބުކޮށްދީފައިވަނީ ފްރާންސްގެ އުމުރުން 24 އަހަރުގެ ރަންޑަލް ކޯލޯ މުއާނީއެވެ. މީ މުއާނީ ޕީއެސްޖީއަށް ކުޅުނު 8 މެޗުން ކާމިޔާބުކޮށްދިން 3 ވަނަ ލަނޑެވެ. މިލާނުން ހަމަލާތަކެއް ޕީއެސްޖީގެ ގޯލާ އަމާޒުކޮށް ފޮނުވާލަމުން ދިޔަ ނަމަވެސް ޕީއެސްޖީގެ ކީޕާރު ޖިއަންލުއީގީ ޑޮއްނަރުމާ ވަނީ މުހިންމު ހަމަލާތަކެއް ދިފާއުކޮށްފައެވެ. މެޗްގެ 71 ވަނަ މިނެޓުގައި އުސްމާން ޑެމްބެލޭގެ ބަދަލުގައި ކުޅެންއެރި ސައުތް ކޮރެއާގެ އުމުރުން 22 އަހަރުގެ ކޭންގް އިން ލީ ވަނީ މެޗްގެ 89 ވަނަ މިނެޓުގައި ޕީއެސްޖީގެ 3 ވަނަ ލަނޑު ކާމިޔާބުކޮށްދީފައެވެ.
މެޗް ނިމިގެން ދިޔައީ 3-0 ގެ ނަތީޖާއިން ޕީއެސްޖީ މެޗް ކާމިޔާބުކޮށްގެންނެވެ. މެޗްގެ މޮޅު ކުޅުންތެރިޔަކަށް ހޮވިފައިވަނީ ފްރާންސްގެ އުމުރުން 17 އަހަރުގެ މެދުތެރެޔަށް ކުޅެމުން އަންނަ ވަރެން ޒެއިރް އެމެރީއެވެ. ޒެއިރް އެމެރީ ވަނީ މި މެޗްގައި ދެ އެސިސްޓް ޕީއެސްޖީއަށް ފޯރުކޮށްދީފައެވެ.
މި މޮޅާއެކު ޕީއެސްޖީ މިހާރު އޮތީ ގްރޫޕް އެފްގެ ތާވަލުގެ އެއްވަނައިގައެވެ. ޕީއެސްޖީ ދެން ޗެމްޕިއަންސް ލީގުގައި ކުޅުމަށް ހަމަޖެހިފައިވަނީ އަންނަ މަހު 8 ވަނަ ދުވަހު ރަށުން ބޭރުގައި މިލާނާއި ދެކޮޅަށެވެ.
ޕީއެސްޖީއަށް ޗެމްޕިއަންސް ލީގް މީގެ ކުރިން ކާމިޔާބު ކުރެވިފައެއް ނުވެއެވެ. ހަމައެއާއެކު މިލާނުން ވަނީ ޗެމްޕިއަންސް ލީގް 7 ފަހަރު މަތިން ކާމިޔާބުކޮށްފައެވެ. މިލާން ޗެމްޕިއަންސް ލީގް ފުރަތަމަ ކާމިޔާބުކޮށްފައިވަނީ 1963 ވަނަ އަހަރުގައެވެ. މީގެ އިތުރުން 1969 ، 1989 ، 1990 ، 1994 ، 2003 އަހަރުގަވެސް ކާމިޔާބުކޮށްފައިވެއެވެ. ހަމައެއާއެކު އެންމެ ފަހުން ޗެމްޕިއަންސް ލީގް މިލާން ކާމިޔާބުކޮށްފައި ވަނީ 2007 ވަނަ އަހަރުގައެވެ.
