ރާއްޖޭގެ ސިޔާސީ މަސްރަހުން ފެންނަމުންދާ ކޯޅުމާއި، އުފެދޭ ޒާތީ ހަސަދައާއި ފިތުނަ އަބަދުވެސް ވެގެން ގޮސްފައިވަނީ ގައުމީ މަސްލަހަތަށްވުރެ އުހުގައި ހުންނަމުންދާ ކަމަކަށެވެ.

ރައީސް ޔާމިންގެ ވެރިކަމުގައި ރައީސް މައުމޫނާއި ރައީސް ޔާމިންއާދެމެދު އުފެދުނު ސިޔާސީ ކޯޅުމުގެ ކުރިތައް ފަޅާ، ފޯދި، ފިތުނަވެރިކަން އަމިއްލަފުޅު ޕާޓީއާއި އާއިލާގެ އެތެރެއަށް ފެތުރި އެންމެ ފަހުން އެވެރިކަންވެސް ބަދަލުވެދިއުމުގެ އަސްލަކަށް ވެގެން ގޮސްފައިވަނީ ދެބޭފުޅުންގެ މެދުގައި އުފެދުނު ސިޔާސީ ކޯޅުމާއި ނިމުމެއް ނުވާ ފިތުނައެވެ.

ހަމަ އެބީދައިން، ޖެހިގެން އަައި ދައުރުގައި ވެސް "އަޅުވަން ޖެހުނީ" ހަމަ އެއް ފިލްމެއް ކަމުގައި ދަންނަވާން މިވަނީ ޖެހިފައެވެ. އާއިލީ ގޮތުންވެސް ގުޅުންއޮތް، އެކުވެރިކަމާއި ގާތްކަމުގެ ގޮތުންވެސް އެފަދަ ދެވަނެއްނުވާ، ކުރީގެ ރައީސް ނަޝީދާއި ރައީސް ސާލިހުގެ ވެރިކަންވެސް ބަދަލުވެގެން މިދާ އެންމެ މުހިންމު ސަބަބެއްގެ ގޮތުގައި ފެންނާން އޮތީ، ދެބޭފުޅުންގެ މެދުގައި އުފެދިގެންދިޔަ ސިޔާސީ ކޯޅުންތަކެވެ.

އެކޯޅުންތަކަށް ހައްލެއް ނުހޯދި، ގޮތް ދޫނުކުރައްވާ ދެބޭފުޅުންވެސް ކުރިޔަށް ވަޑައިގެންނެވުމުގެ ނަތީޖާއަކަށް ވެގެންދިޔައީ ފާއިތުވި ރިޔާސީ އިންތިޚާބުގައި އެމްޑީޕީއަށް ނާކާމިޔާބީއާ ކުރިމަތިލާން ޖެހުމެވެ. ނަޝީދަށް އެންމެ %7 އާއެކު ރިޔާސީ އިންތިޚާބުގެ ފުރަތަމަ ބުރު ނިންމާލަން ޖެހުމެވެ.

ހަމައެއާއެކު މިހާރު ފެންނަމުންދަނީ، ނަޝީދާއި ރައީސް ސާލިހާ ދެބޭފުޅުންގެ މެދުގައި އުފެދުނު ޒާތީ ހަސަދައާއި ދެކޮޅުވެރިކަން ނިމެއްނުވާ ފިތުނައަކަށް ބަދަލުވެގެން ގޮސްފައިވާ މަންޒަރެވެ.

އޭގެ އެންމެ ބޮޑު ހެއްކަކީ ދެވަނަ ފަހަރަށް ނަޝީދު ރިޔާސަތުން ދުރުކުރުމަށް އެމްޑީޕީން މިހާރު ކުރަމުންދާ މަސައްކަތަކާއި، އަދި ނަޝީދުއާއި ދެކޮޅަށް މިހާރު މަޖިލީހަށް ހުށަހަޅާފައިވާ އިތުބާރު ނެތްކަމުގެ މައްސަލަ ކުރިޔަށް ނުގެންގޮސް ރިޔާސަތުގައި އިންނަވައިގެން ކުރިޔަށްގެންދާ މުއިއްޒުގެ ހުވާކުރުމުގެ ރަސްމިޔާތުގެ ގާނޫނީ ސައްޙަކަމެއް ނޯންނާނެކަމަށް ބުނެ އެމްޑީޕީގެ ޕާލަމެންޓްރީ ގުރޫޕުން ނިންމާފައިވާ ނިންމުންތަކެވެ.

ރުހުން ނެތް ރައީސަކު ރިޔާތުގައި އިންނަވައިގެން މުއިއްޒު ހުވާކުރުން އެމްޑީޕީން ބަލައެއް ނުގަންނާނެ!

ރައްޔިތުންގެ މަޖިލީހަށް މިހާރު ހުށަހަޅާފައިވާ، މަޖިލިސް ރައީސްގެ އިތުބާރު ނެތްކަމުގެ މައްސަލަ ކުރިޔަށް ނުގެންގޮސް، އިންތިޚާބީ ރައީސް ހުވާކުރައްވާ ރަސްމިއްޔާތުގެ ރިޔާސަތުގަ ނަޝީދަށް ނީދެވޭނެ ކަމުގައި އެމްޑީޕީގެ ޕާލަމެންޓްރީ ގުރޫޕުން އިއްޔެވަނީ ބުނެފައެވެ.

އެމްޑީޕީގެ ޕާލަމެންޓްރީ ގުރޫޕުން ތްރީލައިން ވިޕެއްނެރެ، ދެވަނަ ފަހަރަށް ރައްޔިތުންގެ މަޖިލިހަށް ހުށަހަޅާފައިވާ ނަޝީދުގެ އިތުބާރު ނެތްކަމުގެ މައްސަލަ އަންނަ އާދީއްތަ ދުވަހަށް އެޖެންޑާ ކުރެވޭނެކަމަށްވެސް މަޖިލިސް އިދާރާއިން މިހާރުވަނީ އަންގާފައެވެ. އެހެންނަމަވެސް އެދުވަހަށް އެ މައްސަލަ އެޖެންޑާ ކުރާނެކަމެއް އަދި ޔަގީން ކުރެވިފައެއް ނުވެއެވެ.

މިމައްސަލައާއި ގުޅޭގޮތުން ރައްޔިތުންގެ މަޖިލިސް އިދާރާގެ ބޭރުގައި ނޫސްވެރިންނާ ބައްދަލުކޮށް ވާހަކަ ދައްކަވަމުން އެމްޑީޕީގެ ޕާލަމެންޓްރީ ގުރޫޕުގެ ލީޑަރ މުހައްމަދު އަސްލަމް ވިދާޅުވީ، މިހާރު މަޖިލިހަށް ހުށަހަޅާފަ އޮތް މަޖިލިސް ރައީސްގެ އިތުބާުރު ނެތްކަމުގެ މައްސަލައާއި ގުޅޭގޮތުން ގޮތެއް ނުނިންމާ، ނަޝީދު ރިޔާސަތުގައި އިންނަވައިގެން ނޮވެމްބަރު 17 ވަނަ ދުވަހު ޑރ. މުއިއްޒު ރާއްޖޭގެ ރައީސްކަމުގެ ހުވާ ކުރައްވައިފިނަމަ އެއީ ސައްހަ ހުވައެއް ކަމަށް ގަބޫލު ނުކުރައްވާނެ ކަމުގައެވެ.

ނޮވެމްބަރު 17 ވަނަ ދުވަހު ރައީސުލްޖުމުހޫރިއްޔާ ކުރައްވާ ހުވާ، މިވޯޓު ނުނިންމާ ރިޔާސަތަކުން ނިންމާ ނިންމުމެއް، އަޅުގަޑުމެން އެމްޑީޕީ ޕާލަމެންޓްރީ ގުރޫޕުގެ ފަރާތުން އެއީ ގާނޫނާ އެއްގޮތްވާ ގޮތުގެ މަތިން ހުވާކުރައްވައިގެން ހުރި ރައީސުލްޖުމުހޫރިއްޔާއެއް ކަމުގަ އަޅުގަޑުމެން ނުބަލާނެ ވާހަކަ، އެގޮތަށް އަޅުގަޑުމެންނަށް މަޝްވަރާ ކުރެވިފަ އޮތީމަ އެވާހަކަ ދަންނަވާލީ.

ރައްޔިތުންގެ މަޖިލިހުގެ ރިޔާސަތުން ނަޝީދު ދުރުކުރުމަށް އެމްޑީޕީން ކުރަމުންދާ މަސައްކަތްތަކަށް ނަޝީދު ހުރަސް އަޅުއްވަމުން ގެންދަވާކަމަށް މޭރުން ކުރައްވަމުން އަސްލަމް ވިދާޅުވިއެވެ.

އިއްޔެގެ ނޫސްވެރިންނަށް މައުލޫމާތު ދެއްވަމުން އެމްޑީޕީގެ ކިނބުދޫ ދާއިރާގެ މެމްބަރު މުހައްމަދު ނާޝިޒު ވިދާޅުވީ، މިހާރު ހުށަހެޅިފަ އޮތް މައްސަލައާމެދު ގޮތެއް ނުނިންމާ މަޖިލިސް ރައީސްކަމުގަ މިހާރު ނަޝީދަށް އިންނެވޭނެކަމަށް ގަބޫލުވެސް ނުކުރައްވާނެ ކަމުގައެވެ. އަދި އެނާ ވިދާޅުވީ މިމައްސަލައާމެދު ގޮތެއް ނުނިންމާ، މުއިއްޒު ހުވާކުރާދުވަހުވެސް ނަޝީދަށް ރިޔާސަތުގަ އިންނެވިގެން ނުވާނެ ކަމަށާއި، އެފަދަ ހާލަތެއް އަތުވެއްޖެނަމަ މުއިއްޒު ހުވާކުރާ ރަސްމިއްޔާތު ސައްޙަ ރަސްމިއްޔާތަކަށް ވެގެން ނުދާނެކަމަށްވެސް އޭނާ ވިދާޅުވިއެވެ.

ނާޝިޒު އިތުރަށް ވިދާޅުވި އެގޮތަށް ޑރ. މުއިއްޒު މަގާމުގެ ހުވާ ކުރައްވައިފިނަމަ، މުއިއްޒު އައްޔަން ކުރައްވާ ކެބިނެޓަކަށް މަޖިލިހުގެ ރުހުންވެސް ލިބިގެން ނުދާނެ ކަމުގައެވެ.

އެޖަލްސާއިން އެކަން އެހެން ކަން ކުރައްވައިފިނަމަ، އެރައީސުލްޖުމުހުރިއްޔާ ފޮނުއްވާ ކެބިނެޓަށް ކަނޑައެޅިގެން ހަމަ ނޯ ޖަހާނީ އިނގޭތޯ.

އިތުބާރު ނެތްކަމުގެ މައްސަލަ ކުރިޔަށް ނުގެންގޮސް، ނަޝީދު ރިޔާސަތުގައި އިންނަވާ ޖަލްސާއެއްގައި ޑރ. މުއިއްޒު ހުވާކުރައްވައިފިނަމަ، ޑރ. މުއިއްޒުގެ ކެބިނެޓަށް މަޖިލިހުން ރުހުން ނުދޭނަކަމަށް އެމްޑީޕީން ނިންމާފައިވާކަން ހާމަކުރައްވަމުން ނާޝިޒު ވިދާޅުވިއެވެ.

ނަޝީދު ރިޔާސަތުގައި ގަދަބާރުން އިންނަވަން މަސައްކަތް ކޮށްފިނަމަ މުއިއްޒުގެ ހުވާކުރުން ގަޑުބަޑު ވެދާނެ!

ރައްޔިތުންގެ މަޖިލިހުގެ ގަވާއިދުގައިވާ ގޮތުން މަޖިލިހުގެ ރައީސާއި ނައިބު ރައީސް މަގާމުން ވަކި ކުރެވޭނީ ޖަލްސާ އަށް ހާޒިރުވެ، ވޯޓުގައި ބައިވެރިވާ މެމްބަރުންގެ އަޣުލަބިއްޔަތުން ފާސްކުރުމުންނެވެ. 19 ވަނަ މަޖިލީހުގައި ތިއްބެވީ 87 މެންބަރުން ކަމަށް ވުމުން، ނަޝީދު ވަކިކުރުމަށް ބޭނުންވާނީ 44 މެންބަރުންގެ ވޯޓެވެ.

ނަޝީދު މަޖިލިސް ރައީސްކަމުން ވަކިކުރުމަށް އެންމެފަހުން އެމްޑީޕީން މަޖިލިހަށް ވެއްދި ޕެޓިޝަންގައި އެޕާޓީގެ ޕާލަމެންޓްރީ ގުރޫޕުގެ 48 މެމްބަރަކު ސޮއިކޮށްފައި ވެއެވެ. އެހެންކަމުން، ޕެޓިޝަންގައި ސޮއިކޮށްފައިވާ މެމްބަރުންގެ އަދަދަށް އެކަނި ބެލިކަމުގައިވި ނަމަވެސް، ނަޝީދު މަޖިލިސް ރިޔާސަތުން ދުރު ކުރުމަކީ މަޖިލިހުގެ ފްލޯއިން މާބޮޑު ގޮންޖެހުމަކާ ކުރިމަތިވާން އޮތް މައްސަލައެއް ކަމުގައި ބެލެވޭކަށް ނެތެވެ.

އެހެންނަމަވެސް، މަޖިލިސް ރައީސް މަގާމުން ދުރުކުރުމުގެ މައްސަލަ ހިގައިގަންނައިރު، މިހާރު މަޖިލިހުގެ މުޅި ރިޔާސަތު އެތުރިފައި އޮތް ގޮތަށް ބަލާއިރު، އެމައްސަލަ ކުރިޔަށް ގެންދިއުމުގައި ކުރިމަތިވާނެ ގޮންޖެހުމެއްގެ ގޮތުގައި ފެންނާން ހަމައެކަނި އޮތީ އެ ޖަލްސާގެ ރިޔާސަތުގައި، ނަޝީދުގެ އެންމެ އަރިސް، އަދި މިހާރުގެ ނާއިބުރައީސް އީވާ އިންނަވާން ޖެހުމެވެ.

އޭގެ ސަބަބަކީ ޑރ. މުއިއްޒު ހުވާކުރުމުގެ ރަސްމިއްޔާތުގައި ނަޝީދު އިންނަވާނެކަމަށް ވިދާޅުވެ، "ގޮން ޖައްސަވާ" ނަޝީދުގެ އަރިސްބޭފުޅުން، "އޮފް ދަ ރެކޯޑުގައި" އެމަގުން ދައްކަވަމުން ގެންދަވާ ވާހަކަތަކެވެ.

އެހެންނަަމަވެސް، ގަބޫލުކުރާންޖެހޭ ހަގީގަތަކީ، އެމްޑީޕީއަށް މިހާރު މަޖިލިހުގައި ސުޕަރ މެޖޯރިޓީ ނެތެއްކަމަކު، އަދިވެސް އެޕާޓީއަށް މަޖިލިހުގެ މެޖޯރިޓީ އޮތްކަމެވެ. އެމްޑީޕީގެ ޕާލަމެންޓްރީ ގުރޫޕުގައި އެޕާޓީއަށް ނިސްބަތްވާ 54 މެމްބަރުން އަދިވެސް އެބަ ތިއްބެވެ. އެހެންކަމުން، އެމްޑީޕީގެ ރުހުން ނެތި، އަދި އަމުދުން ނަޝީދާއި ދެކޮޅަށް ހުށަހެޅި ޕެޓިޝަންގައި 48 މެމްބަރަކު ސޮއިކޮށްފައި ވަނިކޮށް، މުޅި މަޖިލިހުގެ މެޖޯރިޓީއާ ދެކޮޅަށް ނަޝީދަށް މަޖިލިސް ރިޔާސަތުގައި އިނދެވިދާނެކަމަށް ގަބޫލެއް ނުކުރެވެއެވެ.

އެހެންނަމަވެސް އުޒުރު ދައްކަވާ، ޑރ. މުއިއްޒު ހުވާކުރުމާ ހަމައަށް މަޖިލިހުގައި ނަގާ ވޯޓު ލަސްކުރުމުގެ ފޯމިއުލާއެއް ނަޝީދު ނެރުއްވާ، އެމަގުން ރިޔާސަތުގައި "ދުވަސް ކޮޅަކަށް"ނަމަވެސް އިންނަވާން މަސައްކަތް ކޮށްފިނަމަ ދެން އުފެދިގެންދާ ގަޑުބަޑު ވަކި ކުޑަވާން އޮތްތަނެއްވެސް ނުމެ ފެނޭމެއެވެ.

އެއީ އިންތިޚާބީ ނާއިބު ރައީސްގެ ހުވާކުރުމުގެ "ޝަރަފްވެރި" ރަސްމިއްޔާތު ގަޑުބަޑުވެގެން ދިއުމެވެ. އެޖަލްސާގައި ރާއްޖެއިން ބޭރުގެ އެތައް އިއްޒަތްތެރިންނެއްވެސް ތިއްބަވާނެއެވެ. އަދި އެއަށްފަހު އާ ރައީސަށް މަޖިލިހުގެ ރުހުން ނެތި، ކެބިނެޓަށްވެސް ރުހުން ނިލިބި، ދެން ކުރިމަތިވެގެން ހިގައިދާނޭ ބޮޑެތި ގޮންޖެހުންތަކާއި އުފެދިގެން ހިގައިދާނޭ ހަލަބޮލި ކަމެވެ.

މިކަން މި ބީދައިން ހިގައިގެން ގޮސްފިނަމަ، އެކަންވެގެންދާނީ، ރާއްޖޭގެ ޑިމޮކްރަސީގެ ހަޔާތުގައި މުޅިން އަލަށް ފެނިގެންދާނެ، އެހާމެ ހުތުރުކަން ބޮޑު ސަފުހާއަކަށް ކަމީ ކަށަވަރުވެ ޔަގީންވާން އޮތް ކަމެކެވެ.