އިސްރާއީލުން ފަލަސްތީނުގެ ޢައްޒާއަށް ދެމުންދާ އުދުވާނީ ހަމަލާތައް ވަރުގަދަކޮށް، އަދި އާއްޒާއަށް ކާނާއާއި ތެލާއި ފެން އެތެރެކުރުން ހުއްޓުވާފައިވާތާ އެތައް ދުވަހެއް ފާއިތުވެގޮސް، ޣައްޒާގެ ހޮސްޕިޓަލްތައް ހިންގުމަށް ބޭނުންވާ ތެޔޮ ހުސްވުމާއެކު، ޣައްޒާގެ ހޮސްޕިޓަލްތަކުން އެމަޖެންސީ ޚިދުމަތައް މެދުކަނޑާލަން ފަށައިފިއެވެ.
ޣައްޒާގެ ހޮސްޕިޓަލްތަކުން އެމަޖެންސީ ޚިދުމަތްތައް މެދުކަނޑާލަން ފަށާފައި މިވަނީ، އެ ސިޓީއަށް އިންސާނީ އެހީތެރިކަން އެކަށީގެންވާ ގޮތުގައި ފޯރުކޮށް ނުދީފިނަމަ ޣައްޒާއަށް އެހީތެރިކަން ފޯރުކޮށް ދެމުންދާ އެންމެ ބޮޑު ޖަމާއަތް ކަމަށްވާ ޔޫއެންއިން އެ ސިޓީގައި ކުރަމުންދާ މަސައްކަތްތައް މިރެއިންފެށިގެން ހުއްޓުމަކަށް އަންނާނޭކަމަށް ބުނެފައި ވަނިކޮށެވެ.
ޢައްޒާއަށް ފޯރުކޮށްދެމުންދާ ތެލުން އެތައްހާސް ލިޓަރެއް ހަމާސްއިން ރައްކާ ކުރަމުންދާކަމަށް ތުހުމަތުކޮށް، އިސްރާއީލުންވަނީ ޢައްޒާއަށް ތެޔޮ ސަޕްލައިކުރުން ހުއްޓުވާފައެވެ.
މިއަދު މިސްރުގެ ބޯޑަރުގެ ރަފާ ކުރޮސިން ހުރަސްކޮށް 8 ލޮރީއެއް ފެނާއި ކާނާއާއި އަދި ބޭސް ހިފައިގެން ޣައްޒާއަށް ވަދެފައިވި ނަމަވެސް، އެހީދޭ ޖަމާއަތްތަކުން ބުނެފައިވަނީ ދުވާލަކަށް މަދުވެގެން 100 ލޮރީގެ އެހީ ޣައްޒާއަށް ބޭނުންވާ ކަމުގައެވެ،
އިސްރާއީލުގެ ދަތިކުރުންތަކާއެކު ޣައްޒާގެ ހޮސްޕިޓަލްތައް ހުއްޓުމަކަށް އަންނަމުންދާއިރު، ރޭ އިސްރާއީލުގެ އަސްކަރިއްޔާއިން ޣައްޒާއަށް ދިން ހަމަލާތަކުގައި 80 މީހުން ޝަހީދުވެފައިވާކަމަށް ހަމާސްއިން ވަނީ ބުނެފައެވެ. އަދި ފާއިތުވި 24 ގަޑިއިރު ތެރޭގައި 700 އަށްވުރެ ގިނަމީހުން ވަނީ ޝަހީދު ކޮށްލާފައެވެ. އިސްރާއީލުން ބުނެފައިވަނީ އެގައުމުގެ އަސްކަރިއްޔާއިން ހަމަލާތައް އަމާޒުކޮށްފައިވަނީ ހަމާސްގެ އިމާރާތްތަކަށް ކަމަށެވެ.
ޣައްޒާގެ ހެލްތު މިނިސްޓްރީން ބުނެފައިވަނީ، 7 އޮކްޓޯބަރުގެ ފަހުން އިސްރާއީލުން ޣައްޒާއަށް ދެމުންދާ އުދުވާނީ ހަމަލާތަކުގައި މިހާތަނަށް 5،800 މީހުން ޝަހީދުވެފައިވާކަމުގައެވެ.
