ފަލަސްތީނުގެ މިނިވަންކަމަށް ޖިހާދު ކުރަމުންދާ ހަމާސް ޖަމާއަތުން މިމަހުގެ 7 ވަނަ ދުވަހު އިސްރާއީލަށް ދިން ކުއްލި ހަމަލާ ކުއްވެރިކޮށް، އަދި އިސްރާއީލުގެ ދިފާޢުގައި ރާއްޖޭގެ ކުރީގެ ޚާރިޖީ ވަޒީރު ޑރ. ޝަހީދު ވާހަކަ ދައްކަވާފައިވާ ވީޑިއޯއަކަށް ގިނަ ބައެއްގެ ފާޑުކިއުން އަމާޒު ވެއްޖެއެވެ.

ހަމާސް ޖަމާއަތުން އިސްރާއީލަށް ދިން ކުއްލި ހަމަލާގައި އެގައުމުގެ 1،400 އަށްވުރެ ގިނަ މީހުން މަރުވި ހާދިސާ ކުއްވެރިކޮށް ޑރ. ޝަހީދު ވާހަކަ ދައްކަވާ ވީޑިއޯ އެންމެ ފުރަތަމަ ޓުވީޓު ކޮށްފައިވަނީ މިމަހުގެ 16 ވަނަ ދުވަހު، @CombatASemitism ނަމަކަށް ކިޔާ ޓުވިޓަރ (މިހާރުގެ އެކްސް) ހޭންޑްއަކުންނެވެ. މި އެކައުންޓުގެ ޕްރޮފައިލްގައި ވާގޮތުން އެ އެކައުންޓަކީ ޔަހޫދީންނާއި ދެކޮޅު ނަފްރަތު އުފެއްދުމާއި ދެކޮޅަށް ހަގުރާމަ ކުރާ (ދެކޮޅަށް މަސައްކަތްކުރާ) އެކައުންޓެކެވެ. އެކައުންޓުގެ ނަމަކަށް ލިޔެފައި އިންނަނީ "ކޮމްބެޓް އެންޓިސެމިޓިޒްމް މޫވްމަންޓް" އެވެ.

މިއެކައުންޓުން، އިސްރާއީލަށް ތައުރީފުކޮށް އަދި ޔަހޫދީންނާއި ދެކޮޅު ޝުއޫރު ފާޅުކުރާ ފަރާތްތައް ކުށްވެރިކޮށް ޑރ. ޝަހީދު ވާހަކަ ދައްކަވާ ވީޑިއޯ ޓުވީޓުކޮށް، ޔަހޫދީންގެ ދިފާއުގައި ޑރ. ޝަހީދު އަޑު އުފެއްލެވީތީ ޝުކުރު އަދާ ކޮށްފައިވެއެވެ.

އިސްރާއީލުގެ ހުރިހާ ރައްޔިތުންނާއެކު، ކޮންމެތާކު ތިބި ނަމަވެސް ހުރިހާ ޔަހޫދީންނާއެކު، އަދި "އެންޓިސެމިޓިޒަމް" (ޔަހޫދީންނާއި ދެކޮޅު ގެންގުޅޭ ނަސްލީ އިމްތިޔާޒު)އާއި ދެކޮޅަށް ހަނގުރާމަ ކުރުމުގައި ފާއިތުވި 6 އަހަރު އަހަރެންނާއެކު މަސައްކަތްކުރި ހުރިހާ އެންމެންނާއެކުވެސް އަހަރެން މިވަގުތު ހިތުގެ އިޚްލާސްތެރިކަމާއެކު ވަރުގަދަކޮށް ހުރިކަން ހާމަކޮށްދިނުމުގެ ފުރުސަތު ދިނީތީ "ކޮމްބެޓް އެންޓިސެމިޓިޒަމް މޫވްމަންޓް"އަށް ވަރަށް އިޚްލާސްތެރިކަމާއެކު ޝުކުރު ދަންނަވަން.

ރައްޖޭގެ ގިނަ ބަޔަކު ސޯޝަލް މީޑިއާގައި ދައުރުކޮށް، މިހާރު ފާޑުކިޔަމުންދާ ވީޑިއޯ ފަށަމުން ޑރ. ޝަހީދު ވިދާޅުވެފައި ވެއެވެ.

They deleted this video. But here it is. pic.twitter.com/ryJrSCXpOp

— Ashraf Mohamed (@primary0) October 21, 2023

މި ވީޑިއޯގައި އިތުރަށް ވާހަކަ ދައްކަވަމުން ޑރ. ޝަހީދު ވިދާޅުވެފައިވަނީ، އިސްރާއީލުގެ ރައްޔިތުން މިހާރު ތަހައްމަލް ކުރަމުންދާނެ ހާލަތު، އަދި ވަކީން ޚާއްސަކޮށް ހަމާސްގެ ހަމަލާގައި މަރުވި މީހުންގެ އާއިލާތަކުން ތަހައްމަލް ކުރައްމުންދާ ކެކުކުޅުންތައް އޭނާއަށް ޚިޔާލަށްވެސް ނުގެނެވޭ ކަމަށެވެ.

ހަމާސް ޓެރަރިސްޓުން ހިންގާފައިވާ، ޚިޔާލަށްވެސް ނުގެނެވޭ މިކަމަކީ އެއްވެސް ހުއްޖަތެއް އޮތް ކަމެއް ނޫން. އަދި މި ޖަރީމާތަކަށް އެއްވެސް ޖާގައެއް އޮވެގެން ނުވާނެ. ދުނިޔޭގެ ލީޑަރުން މިކަން ކުށްވެރި ކޮށްފައިވާ ފަދައިން، މިއީ އެއްވެސް ޝަރުތެއް ނެތި ކުއްވެރިކުރަން ޖެހޭ ކަމެއް. އަހަރެންވެސް މިއަމަލު ކުށްވެރި ކުރަން.

ހަމާސްއިން އިސްރާއީލަށް ދީފައިވާ ކުއްލި ހަމަލާ ކުށްވެރި ކުރަމުން ވީޑިއޯގައި ޑރ. ޝަހީދު ވިދާޅުވެފައި ވެއެވެ.

މިފަދަ ޖަރީމާއެއް އަމާޒުވި ހަމައެކަނި ސަބަބަކީ ޔަހޫދީންނާމެދު އޮތް ނަފްރަތުގެ ސަބަބުން. "އެންޓިސެމިޓިޒަމް" (ޔަހޫދީންނާއި ދެކޮޅު ގެންގުޅޭ ނަސްލީ އިމްތިޔާޒު)އާއި ދެކޮޅަށް ހަނގުރާމަ ކުރުމުގައާއި، އަދި ހުރިހާ ބާވަތެއްގެ ނަފްރަތު އުފެއްދުމާއި ދެކޮޅަށް އަހަރެންގެ މަސައްކަތުގެ ވަރަށް ގިނަ ވަގުތު ހޭދަން ކުރަންޖެހުނު ސަބަބަކީވެސް މިއީ. ރަހީނުކޮށްފައިވާ ހުރިހާ އެންމެންގެ ސަލާމަަތަށްވެސް އަހަރެން ދުޢާކުރަން، އަދި އެއްވެސް ޝަރުތެއްނެތި އެއެންމެން ދޫކޮށްލުމަށް ގޮވާލަން.

ޔަހޫދީންނާއި ދެކޮލަށް ނަފްރަތު އުފެދުމާއި ދެކޮޅަށް އޭނާ ކުރައްވަމުން ގެންދަވާ މަސައްކަތައް ފާހަގަ ކުރައްވަމުން ވީޑިއޯގައި ޑރ. ޝަހީދު ވިދާޅުވެފައި ވެއެވެ.

ޔަހޫދީންގެ ހިމާޔަތުގައި ވަކާލާތު ކުރާ ޓުވިޓަރ ހޭންޑްލްއިން އެންމެ ފުރަތަމަ ޕޯސްޓުކުރި ވީޑިއޯގައި ޑރ. ޝަހީދަށް ފާޑުކިއުން އަމާޒުވެގެން ދިޔައީ، އޮކްޓޯބަރ 7ގެ ހަމަލާއަށްފަހު އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގާ ޖަރިމާތަކުގެ އެއްވެސް ވާހަކައެއް ވީޑިއޯގައި ފާހަގަކޮށްފައި ނެތުމުގެ އިތުރަށް ފަލަސްތީނުގެ ނަންވެސް އޭނާ މި ވީޑިއޯގައި ގެނެސްފައި ނުވާކަމަށް ބުނެއެވެ.

ވިޑިއޯއާއި ގުޅިގެން ފާޑުކިއުން އަމާޒުވުމުން ވީޑިއޯ ޓުވީޓުކުރި އެކައުންޓުން މިހާރުވަނީ ވީޑިއޯ ޑިލީކޮށްފައެވެ. އަދި ސޯޝަލް މީޑިއާގައި ވީޑިއޯއާއި ގުޅޭގޮތުން ޑރ. ޝަހީދަށް ފާޑުކިޔަމުންދާ ބައެއް ފަރާތްތައް އެނާވަނީ ބުލޮކްވެސް ކޮށްފައެވެ.

ފަލަސްތީނުގެ މިނިވަންކަމަށް ޖިހާދު ކުރަމުންދާ ހަމާސް ޖަމާއަތުން އޮކްޓޯބަރ 7 ވަނަދުވަހު އިސްރާއީލަށް ދިން ކުއްލި ހަމަލާއަށްފަހު އިސްރާއީލުން ދަނީ ފަލަސްތީނުގެ ޢައްޒާއަށް ބޮމުގެ ހަމަލާދީ، އެސިޓީއަށް ފެނާއި، ކާނާއާއި ބޭސް އަދި ތެޔޮ އެތެރެކުރުން ވެސް ހުއްޓުވާ، އިންސާނިއްޔަތާއި ޚިލާފް އެތައް ޖަރީމާއެއް ހިންގަމުންނެވެ.