ނިމިގެންމިދާ ރައީސް އިބްރާހީމް މުހައްމަދު ސާލިހްގެ ސަރުކާރުގައި ކުޅިވަރުގެ ކަންކަން ހިނގައިދިޔަ ގޮތް އެންމެނަށް ވެސް ފެންނާނެއެވެ. ބޮޑެތި ގައުމުތައް ވާދަނުކުރާ ގޭމްސްތަކުން މެޑަލް ހޯދައި އުފާފާޅުކުރަން ކުލަބޮކިލައި ހަވާ އެރުވީއެވެ. ވާދަވެރި ބަޔަކާ ޖެހުމުން މެޑެއްޔެއް ނުލިބުނެވެ. ހާއްސަކޮށް ވާދަވެރި ޓީމް ސްޕޯޓްސް އޮތީ ވާނެއެއްޗެއްވާން ދޫކޮށްލައިފައެވެ. ކުޅިވަރާބެހޭ ވަޒީރު އަހުމަދު މަހްލޫފަށް "ފައިދާ" ހުރި ކަމެއްވިއްޔާ ނޫނީ ކުރިއަށް ނުކެނޑިއެވެ.

މަހްލޫފްގެ ވަޒީރު ކަމުގައި ފުރަތަމަ ވެސް ހިފައިގަތީ ރާއްޖޭގެ އެންމެ ބޮޑު ކުޅިވަރު އެސޯސިއޭޝަން ކަމަށްވާ ފުޓްބޯޅައާއެވެ. އެތަނުގައި ރަނގަޅު އެއްވެސް ކަމެއްނެތް ކަމަށް ވިދާޅުވިއެވެ. ސިޔާސީ ހަރަކާތް ހިންގާ ކަމަށް ވެސް ވިދާޅުވިއެވެ. އެކަމަކު "ބައިއަޅަން" ފެށުމުން އެފްއޭމް ކޮރަޕްޝަނުގެ ހާއްޔަކަށްވާން ދޫ ކޮށްލީއެވެ. ގަޔާވާ ކުލަބުތަކަށް މިނިސްޓްރީގެ ބަޖެޓުން ވެސް ހޭދަކޮށް، ދެން ހުރި ކުލަބުތަކަށް އަޅާނުލައި ދޫކޮށްލައި "ދޮގު" ހެދުން އާއްމުކަމަށް ހެއްދެވީއެވެ.

އިންތިހާބީ ރައީސް ޑރ. މުޙައްމަދު މުއިއްޒުގެ ސަރުކާރުގައި ކުޅިވަރަށް ހާއްސަކޮށް ފުޓްބޯޅައިގެ ކަންކަމަށް ހެޔޮ ބަދަލެއް ގެނެސްދެއްވާނެ ކަމަށް އެންމެން ވެސް ތިބީ އުއްމީދުކޮށްގެންނެވެ. އެކަމަކު ތިރީގައި މިދަންނަވާ ގޮތަށް ކަންކަން ބައްޓަންވެއްޖެނަމަ އެ އުއްމީދުތަކުގައި ކުލަ ނުޖެހޭނެ ކަމީ ޔަގީން ކަމާއެކު ބުނަން އެނގޭ ކަމެކެވެ.

އެފްއޭއެމްގެ ރައީސަކީ ބައްސާމް އަދީލް ޖަލީލެވެ. އޭނާގެ 8 އަހަރުވީ، ރައީސް ކަމުގައި އެފްއޭއެމް އޮތީ ރާއްޖެ ދުވަހަކު ނުދެކޭހާ ދަށް ފެންވަރެއްގައެވެ. މުވައްޒަފުންނަށް މުސާރަނުދޭތާ އަށް މަހަށްވުރެ ގިނަވެއްޖެއެވެ. ސަރުކާރާއި އަމިއްލަ ކުންފުނިތަކަށް ދަރައިވިކިއްޖެއެވެ. ރާއްޖޭގެ އެސޯސިއޭޝަނެއް ހިންގުމަށް ހުރި އެންމެ ވަރުގަދަ އޮފީސް އިމާރާތުން މުވައްޒަފުން ނެރެ މަގުމަތިކޮށްފިއެވެ. މިއަދު އެފްއޭއެމުން ބުނެގެން ޓިކެޓެއް ދޭނެ އެއާލައިނެއް ނެތެވެ. ކޮޓަރިއެއްދޭނެ ގެސްޓް ހައުސްއެއް، ހޮޓަލެއް ނެތެވެ. އެފްއޭއެމުން ބުނެގެން ފަހުން ދޭ ގޮތަށް ފައިސާ ދޭނެ ބަޔަކު ނުވެ އެވެ. އެފްއޭއެމުން ބުނެގެން މުބާރާތެއް ބާއްވައިދޭނެ ރަށެއްނެތެވެ. ކައުންސިލްތަކާއި ރަށްރަށުގެ ޖަމިއްޔާތަކަށް ނުދީހުރި ފައިސާގެ އަދަދު ގިނައެވެ. މުވައްޒަފުންގެ ޕެންޝަން ފައިސާ ޖަމާނުކޮށްގެން ދައުވާކުރީ އެކަމާ ގުޅޭ ރަސްމީ އިދާރާއިންނެވެ. ސިވިލް ކޯޓުން އެފްއޭއެމުގެ ދަރަނި އަދާކުރަން ކޮށްފައިވާ ހުކުމްތަކާއި އާއްމުވެފައިވާ ދަރަނީގެ ތަފްސީލުތަކުން އެނގޭގޮތުގައި އެތަނުގެ ދަރަނި 3 ބިލިއަން ޑޮލަރާ ގާތްކުރެއެވެ.

ކަންމިހެން އޮތްއިރު ރައީސް މުއިއްޒުގެ ސަރުކާރުން ނުކުރަންވީ އެންމެ ކަމެކެވެ. އެފްއޭއެމުގެ ކޮރަޕްޝަނުގެ ބައިވެރިން ބާރުގަދަ މަގާމުތަކަށް ނުގެންނަންވީއެވެ. މިސާލަކަށް ތިން ކަމެއް ދަންނަވާލާނަމެވެ.

ކަމިޝަނަރ އޮފް ސްޕޯޓްސް އަކީ ރާއްޖޭގެ ކުޅިވަރު ޖަމިއްޔާތަކާއި ކުލަބުތަކުގެ ސައްހަ ކަމާމެދު ގޮތް ނިންމާ ފަރާތެވެ. ކުޅިވަރާބެހޭ މިނިސްޓަރަކަށް ކޮންމެ މީހަކު ހުއްޓަސް ކަމިޝަނަރ އޮފް ސްޕޯޓްސްއަށް އޭނާގެ މިނިވަން މަސްއޫލިއްޔަތުގެ ތެރެއިން ގޮތް ނިންމޭނެއެވެ. މިހެންވެ ކަމިޝަނަރ އޮފް ސްޕޯޓްސް އަކީ އެފްއޭއެމުގެ ބާރުގެ ދަށަށް އައިސްފައިވާ މަގާމަކަށް ވެގެންނުވާނެއެވެ. އެފްއޭއެމުގެ މިހާރުގެ ނައިބް ރައީސަކީ ރައީސް ޔާމީންގެ ސަރުކާރުގައި ކަމިޝަނަރ އޮފް ސްޕޯޓްސްއެވެ. މަގާމުން ވަކިވުމުންނާއި މަގާމަށް އައުމުގެ ކުރިން ވެސް ހިޔާވަހިކަން ހޯދީ އެފްއޭއެމުންނެވެ.

އޭގެ ފަހުން ރައީސް ސާލިހް އައްޔަންކުރެއްވި ކަމިޝަރ އޮފް ސްޕޯޓްސް އަކީ "ތަންދޮރު" އޮޅުން ނުފިލާ މީހެކޭ ބުނެވޭކަށްނެތެވެ. ނިއުރޭޑިއަންޓް ކިޔާ ކުލަބެއް އޮއްވައި ރޭޑިއަންޓް ކުލަބު ރަޖިސްޓްރީ ވެސް ކުރެއްވީ އެވެ. އަތުގައި ހުރި ބާރުތައް ބޭނުން ނުކުރައްވައި ގިނަވަގުތު ގޮނޑީގައި އިންނެވީއެވެ.

މާގިނަ ދުވަހެއްނުވެ މިނިސްޓަރާ މައްސަލަ ޖެހުމުން އެކޮމިޝަނަރު ހުންނެވީ ބޯޅަ ގެއަށް އަރުވާލައިފައެވެ. މިހެންވެ އެފްއޭއެމްގެ ބަސް އަހައިގެން ބުނިހާ އެއްޗެއް ގަބޫލުކޮށްގެން ހުންނެވީއެވެ. މިހެންވެ އައު ސަރުކާރުގައި ބޭނުންވަނީ ޒިންމާދާރު، ނުވިކޭނެ އަދި ކުރިން އެ މަގާމުތަކުގައި ތިއްބަވައިގެން ގޯސް ހައްދަވާފައިނެތް ކަމިޝަނރ އޮފް ސްޕޯޓްސް އެކެވެ. އެމަގާމުގައި ހުންނަ މީހާއަކީ އެފްއޭއެމުގެ ކަންކަމުގައި ވޯޓުދޭ ކުލަބުތައް ނިންމުމުގެ ބާރުގަދަ އަތެކެވެ.

ދެން އޮތީ އޮލިމްޕިކް ކޮމިޓީއެވެ. ސީދާ ގޮތުން ކުޅިވަރު އެސޯސިއޭޝަންތަކުގެ ހިންގުމާއި އޮލިމްޕިކް ކޮމިޓީއާ ގުޅުމެއްނެތެވެ. އެކަމަކު ބައިނަލް އަގްވާމީ މައިދާނުގައި ކަމެއް ގޯސްކުރަން ނުވަތަ ރަނގަޅު ކުރަން އޮލިމްޕިކް ކޮމިޓީން ބުނާ ބަހަކީ ބާރުގަދަ ބަހެކެވެ. މިހެންވެ އެފްއޭއެމުގެ އެތެރެ ކޮއިލުން އޮލިމްޕިކް ކޮމިޓީގެ ކޮންޓްރޯލް ނަގައިފިނަމަ ޖަވާބުދާރީ ކުރުވުން ގޯސްވާނެއެވެ. އޮލިމްޕިކް ކޮމިޓީއަށް މި ފަހުން ވަޑައިގެންނެވި ބައެއް ބޭފުޅުން އެ ގޮނޑީގެ ޒިންމާ ދޫކުރައްވައި ތިއްބެވީ އެފްއޭއެމުގައި އޮފީސް ހަދައިގެންކަން ހަނދާން ނައްތާލައިގެން ނުވާނެއެވެ.

ފުޓްބޯޅަ މުބާރާތްތައް ގަވާއިދުން ނުބޭއްވުމާއި ގައުމީ ޓީމުގެ ނަތީޖާ ދަށްވުމާއި އެފްއޭއެމުގެ މުވައްޒަފުންގެ ޕެންޝަން ފައިސާ ޖަމާނުކުރުމާއި، ދަރަނި ފުނިޖެހުމާއި އެހާރާއި މިހާރުގެ އާމްދަނީއާ ނުބައްދަލު އަގުބޮޑު ދިރިއުޅުން ފަދަ ކަންކަމުން ފުޓްބޯޅަ އަށް އައި ހަރީފު މޫސުން އާރޯކުރަން ބޭނުންވަނީ އައު ސަރުކާރުގެ ކެރުންތެރިކަމެވެ. ފީފާއިން ރާއްޖެ ސަސްޕެންޑްކޮށްފާނެއޭ ބުނެ ދައްކާ ދަޅައަށް ހެއްލިގެން މިކަމެއް ނުވާނެ އެވެ. ސަސްޕެންޝަނަކީ ވަގުތީ ކަމެކެވެ. ސަސްޕެންޑްކުރަނީ ގޯސްވުމުންނެވެ. ކަންކަން ރަނގަޅު ކުރުމުން ސަސްޕެންޝަން ވަގުތުން ފިލާނެއެވެ. މިކަންކަމަށް ބިރު ނުގަނެ ހެޔޮ ބަދަލުތަކަކަށް އުއްމީދުކުރެވެނީ އައު ސަރުކާރުން މިކަންކަން އިސްލާހުކުރާނެކަމަށް ރައްޔިތުންނަށް ދިން އުއްމީދުތަކާހެދިއެވެ.