ފަލަސްތީނަށް ތާއީދުކުރާ ބޮޑު އެއްވުމެއް ކުއާލަލަމްޕޫރުގެ އިންޑިޕެންޑެންސް ސްކެއާގައި ބައްވައިފިއެވެ.
މެލޭޝިއާގެ ޖަމިއްޔާތައް ކަމަށްވާ ވިވާ ޕަލެސްޓީނާ މެލޭޝިއާ (ވީޕީއެމް) އާއި މައިކެއާ ގުޅިގެން ކުރިޔަށް ގެންދިޔަ މި އެއްވުމުގައި އެތައް ހާސް ބަޔަކު ވަނީ ބައިވެރި ވެފައެވެ. "މިނިވަން ފަލަސްތީން" އާއި "ފަލަސްތީން ދުވަހަކުވެސް އެކަނިވެރިއެއް ނުވާނެ" ފަދަ ޝިއާރުތަކާއެކު ގިނަ ބަޔަކު މި އެއްވުމުގައި ތިބީ ފަލަސްތީނަށް ތާއީދުކޮށް ހަދާފައިވާ ނިޝާންތައް ހިފައިގެންނެވެ.
މި ބޮޑު އެއްވުމުގައި ތިބި އެތައް ހާސް މީހުންނާ މުޚާތަބުކޮށް ވާހަކަ ދެއްކެވި ބޭފުޅުންގެ ތެރޭގައި މެލޭޝިއާގެ ބޮޑުވަޒީރު އަންވަރު އިބްރާހިމްގެ ދަރިކަނބަލުން އިއްޒާހް އަންވަރު ފަދަ ލީޑަރުން ހިމެނިވަޑައިގަންނަވަ އެވެ.
ވިވާ ޕަލެސްޓީނާ މެލޭޝިއާ އާއި މައިކެއާ އިން ފަލަސްތީނަށް އިމަޖެންސީ އެހީ ފޮނުވި ނަމަވެސް އާދީއްތަ ދުވަހުގެ އެއްވުމުގައި އެ ދެ ގައުމުން ފަންޑްރެއިޒް ނުކުރާނެ ކަމަށް އެ ގައުމުގެ މީޑިއާތަކުން ވަނީ ބުނެ އެވެ.
ކުއާލަ ލަމްޕޫރުގައި ހުކުރު ދުވަހު ވެސް އެމެރިކާގެ އެމްބަސީ ކައިރީގައި ބޮޑު މުޒާހަރާއެއް ކުރި އިރު، މުޒާހަރާގެ ބައިވެރިން ވަނީ އިޒްރޭލުގެ އަސްކަރިއްޔާ އަށް މަގުފަހިކުރުމުގެ ޒިންމާ އެމެރިކާއިން ނަގަންޖެހެނެކަމަށް އަޑުއުފުލާފައެވެ. ފަލަސްތީނަށް ނިސްބަތްވާ ކެފިޔޭހް ސްކާފް އަޅައިގެން ތިބި މުޒާހަރާގެ ބައިވެރިން ވަނީ ފަލަސްތީނުގެ 50 މީޓަރު (164 ފޫޓު) ގެ ދިދައެއް ވެސް ނަގައިފަ އެވެ.
މެލޭޝިއާގެ މިހާރުގެ ބޮޑުވަޒީރު އަންވަރު އިބުރާހީމަކީ ފަލަސްތީނުގެ މިނިވަންކަމަށް ހަނގުރާމަކުރާ ހަމާސް ޖަމާއަތަށް ތާއީދުކޮށް އެހީތެރިކަންވެސް ފޮރުކޮށްދޭނެ ކަމަށް ފާޅުގައި ވިދާޅުވަމުން ގެންދަވާ ލީޑަރެކެވެ.
