ފަލަސްތީނުގެ މިނިވަންކަމަށް ޖިހާދު ކުރަމުންދާ ހަމާސް ޖަމާޢަތުން އިސްރާއީލަށް ދިން ކުއްލި ހަމަލާއާއެކު އިސްރާއީލުން ގާޒާއަށް ބޮންއަޅާާ އެސިޓީ ހިސޯރު ކުރިތާާ 2 ހަފްތާފަހުން، ގާޒާއާއި މިސްރު ގުޅޭ ރަފާ ބޯޑަރު ހުޅުވާ، މިސްރުން ޢައްޒާއަށް އިންސާނީ އެހީ ފޯރުކޮށްދޭން ފަށައިފިއެވެ.
ރަފާ ބޯޑަރު ހުޅުވުމާއެކު އިންސާނީ އެހީއަށް ބޭނުންވާ ތަކެތިން ބަރާކޮށްފައިވާ، ރެޑް ކުރެސެންޓުގެ ލޮރީތައް ވަނީ ޢައްޒާއަށް ވަންނަން ފަށާފައެވެ. އެހެންނަމަވެސް އެހީދޭ ޖަމިއްޔާތަކުން ބުނެފައިވަނި މިއީ އަދި ޢައްޒާއަށް ބޭނުންވާ އެހީގެ ޒައްރެއްގެ މިންވަރު ކަމުގައެވެ.
ރަފާ ބޯޑަރު ހުރަސްކޮށް ފުރަތަމަ ދަތުރު ކޮށްފައިވަނީ އެހީގެ ތަކެތި ހިމެނޭ ރެޑް ކުރެސެންޓުގެ 20 ލޮރީއެވެ. ރެޑް ކުރެސެންޓަކީ ޔޫއެންގެ އޭޖެންސީތަކުން ދުނިޔޭގެ އެކި ކަންކޮޅުތަކަށް ބޭނުންވާ އެހީ ފޯރުކޮށްދޭ ޖަމާޢަތެވެ.
ޣައްޒާއަށް އެހީ ފޯރުކޮށްދޭން ފަށާފައި މިވަނީ، އެމެރިކާގެ ރައީސް ޖޯ ބައިޑްން ފާއިތުވި ހަފްތާގައި އިސްރާއީލަށް ކުރެއްވި ދަތުރުފުޅަށްފަހު، ޣައްޒާއަށް އެހީ ފޯރުކޮށްދިނުމަށް އެއްބަސްވުމަކަށް އާދެވިފައިވާކަން ވޮޝިންޓަނުން ހާމަ ކޮށްފައި ވަނިނކޮށެވެ.
ފާއިތުވި ހުކުރު ދުވަހު، ޔޫއެންގެ ސެކެޓްރީޖެނެރަލް އެންޓޯނިއޯ ގުޓަރެސްވަނީ ރަފާ ބޯޑަރުގެ މިސްރާވީ ފަޅީގައި، އެހީ ފޯރުކޮށްދިނުމަށް ވަމުންދާ ތައްޔާރީތައް ބެއްލެވުމަށް އެސަރަހައްދަށް ޒިޔާރަތް ކުރައްވާފައެވެ.
ހާލުގައި ޖެހިފައިވާ ޣައްޒާގެ ރައްޔުތުންނަށް އެހީ ފޯރުކޮށްދޭން ފަށާފައިވި ނަމަވެސް، ހުޅަނގު އައްސޭރީގައި ދިރިއުޅެމުންދާ ފަލަސްތީނުގެ ރައްޔިތުން ބުނެފައިވަނީ މި އެހީއަކި ދުނިޔެއިން ޣައްޒާގެ ރައްޔިތުންގެ ހާލާމެދު ހަމްދަރުދީވާކަން ދެއްކުމަށް ހިންގާ “ޕީއާރު ސްޓަންޓެއް“ ކަމުގައެވެ.
އިސްރާއީލުން ޢައްޒާއަށް ދެމުންދާ ޢުދުވާނީ ހަމަލާތަކާއެކު އެ ސިޓީއަށް، ބޭހާއި، ފެނާއި، ތެލާއި އަދި އެނޫނަސް ދިރި ތިބުމަށްޓަކާ ބޭނުންވާ ކާނާގެ ވަސީލަތްތައް ވަނީ ބޭނުންވެފައެވެ.
