ފަލަސްޠީނަށް އެހީތެރިވުމަށްޓަކައި މަސްވެރިކަން ކުރަމުން އަންނަ 9 ދޯންޏަކުން 3 ލައްކައަށްވުރެ ގިނަ ރުފިޔާ ހަދިޔާކޮށްފިއެވެ.

އިސްރާޢީލުގެ ޖައްބާރު ސިފައިން ފަލަސްޠީނަށް ދެމުންގެންދާ ލާއިންސާނީ ހަމަލާތަކުގެ ސަބަބުން އެތަށް ބަޔަކު ޝަހީދުވެ އެތަށް ބަޔަކު ވަނީ ހާލުގައި ޖެހިފައެވެ. ފަލަސްޠީނުގެ ހާލުގައި ޖެހިފައިތިބި މުސްލިމު އަޚުންނާއި އުޚުތުންނަށް އެހީތެރިވުމަށް ދިވެހިން ދަނީ އެކި ގޮތްގޮތުން ފަންޑުރައިޒްގެ ގިނަ ހަރަކާތްތަކެއް ބާއްވަމުންނެވެ.

މިގޮތުން ދިވެހި މަސްދޯނިތަކުންވެސް ބަނާ މަހުން ލިބޭ އާމްދަނީން ބައެއް ދަނީ ފަލަސްޠީނުގެ ރައްޔިތުންނަށްޓަކައި ހަދިޔާކުރަމުންނެވެ. އެގޮތުން ގއ. އަދި ލ އަތޮޅުގެ ބައެއް މަސްދޯނިތަކުން މިހާތަނަށް ހަދިޔާކޮށްފައިވާ ފައިސާގެ ޢަދަދު 3،52،433 އަށް އަރައެވެ.

ފަލަސްޠީނަށް އެހީވުމަށް ބައެއް މަސްދޯނިތަކުން ހަދިޔާކޮށްފައިވާ ފައިސާ:

– ގއ.ވިލިނގިލީ ކަރަވައްތާ ދޯނި – 25000 ރުފިޔާ
– ގއ.ވިލިނގިލީ ހުސްނީ ދޯނި – 25000 ރުފިޔާ
– ގއ.ވިލިނގިލީ އުޖާލާ ދޯނި – 25000 ރުފިޔާ
– ގއ. ކަނޑުހުޅުދޫ ސީހޯސް 3 ދޯނި – 50000 ރުފިޔާ
– ގއ. މާމެންދޫ ދުވެލި (6) ދޯނި – 25000 ރުފިޔާ
– ގއ. މާމެންދޫ ހުޝިޔާރު ދޯނި – 25000 ރުފިޔާ،
– ފަރެސްމާތޮޑާ ޑެއިޒީ ވިއު ދޯނި – 25000 ރުފިޔާ
– ލ.މާވަށު ރަންދޯދި ދޯނި – 25000 ރުފިޔާ
– ގއ.ކޮލަމާފުށި ރާސްތާ ދޯނި – 127433 ރުފިޔާ

ދިވެހި މަސްވެރިންނަކީ މިފަދަ ކޮންމެ ކަމެއްގައި ނަމޫނާ ދައްކާބައެކެވެ.

މި މަހުގެ 7 ވަނަ ދުވަހު ހަމާސް އިން އިސްރާލަށް ދިން ވަރުގަދަ ކުއްލި ހަމަލާތަކާ އެކުގައި އިސްރާއީލަށް ވަނީ ކުއްލި ސިހުމެއް ލިބިފައެވެ. ފަލަސްތީނުގެ ހައްގުގައި މަސައްކަތް ކުރާ ހަމާސް ޖަމާއަތުން ދިން ހަމަލާތަކުގައި އިސްރާއީލުން 1،400 މީހުން ވަނީ މަރާލައިފައެވެ. އޭގެ ތެރޭގައި 300 އަށް ވުރެ ގިނަ އިސްރާއީލް ސިފައިން ހިމެނެއެވެ.

މި ހަމަލާތަކާ ގުޅިގެން އިސްރާއީލުން ރުޅިގަދަވެ، ފަލަސްތީނުގެ ޣައްޒާ އަށް ދަނީ މެދުކެނޑުމެއް ނެތި ބޮން އަޅައި އެތައް އިމާރާތެއް ބިމާ ހަމަ ކުރަމުންނެވެ. ޔަހޫދީންގެ ހަމަލާތަކުގައި ޣައްޒާ އިން މިހާތަނަށް އައިއިރު، 4000 އާ ގާތް ކުރާ އަދަދަކަށް މީހުން ޝަހީދުވެފައިވެއެވެ. އޭގެ ތެރެއިން ދެބައިކުޅަ އެއްބައި މީހުންނަކީ ކުޑަކުދިންނެވެ. ރިޕޯޓުތައް ބުނާ ގޮތުގައި ޝަހީދުވެފައިވާ މީހުންގެ %70 މީހުންނަކީ ކުޑަކުދިންނާއި އަންހެނުންނާއި އުމުރުން ދުވަސްވީ މީހުންނެވެ.