އިސްރާއީލުން އުދުވާނީ ހަމަލާ ދެމުންދާ، ފަލަސްތީނުގެ ޣައްޒާއަށް އެހީގެ ތަކެތި ފޮނުވަން ފެށުމަށް އެމެރިކާއާއި މުސްރުން އެއްބަސް ވެއްޖެއެވެ.

މިގޮތުން މިސްރުގެ ރައީސް އަބްދުލް ފައްތާހު އަލް ސީސީ ވަނީ ޣައްޒާއަށް 20 ޓްރަކްގެ އެހީގެ ތަކެތި ފޯރުކޮށްދިނުމުގެ ގޮތުން ޣައްޒާއާ ގުޅިފައިވާ ބޯޑަރުގައި އޮންނަ ރަފާ ކްރޮސިން ހުޅުވާލަން އެއްބަސްވެވަޑައިގެންފަ އެވެ. އެހީގެ ތަކެތި ފޯރުކޮށްދިނުމަށް އެމެރިކާއާއި މިސްރުން އެއްބަސްވެފައިވަނީ، އެމެރިކާގެ ރައީސް ޖޯ ބައިޑަން އިސްރާއީލަށް ކުރެއްވި ދަތުރުފުޅާ ގުޅިގެންނެވެ. ބައިޑަން ވިދާޅުވެފައިވަނީ ހުކުރު ދުވަހުން ފެށިގެން އެހީ ފޯރުކޮށްދޭން ފެށޭނެ ކަމަށެވެ.

މިސްރުން ޣައްޒާއަށް ވަދެވެން އޮންނަ ރަފާ މަގުން އެހީތަކެތި ފޯރުކޮށްދިނުމަށް އެއްބަސްވެފައިވި ނަމަވެސް، އެމަގުން ޣައްޒާއިން މީހުން ފޭބުމުގެ ހުއްދަ ދިން ކަމުގެ އެއްވެސް ވާހަކައެއް އަދި މިހާތަނަށް އެއްވެސް ފަރާތަކުން ދަައްކާފައެއް ނުވެއެވެ. އެކަމާ ގުޅޭ ގޮތުން ނޫސްވެރިން ސުވާލު ކުރުމުން ބައިޑަން ވިދާޅުވީ މީހުންނަށް ބޭރަށް ދެވޭނެ ކަމަށާއި ނަމަވެސް މިހާރު އެކަމާ ގުޅޭގޮތުން އެއްވެސް ތަފްސީލަކަށް ނުދާނެ ކަމަށެވެ.

ޣައްޒާ އާއި މިސްރުގެ އައްސޭރިފަށުގައި އެހީގެ ސާމާނު ހިފައިގެން އަންނަ މީހުންނާއި ޓްރަކްތައް ވަނީ އަލުން ބޯޑަރު ހުޅުވުމުގެ އިންތިޒާރުގައި ސަފު ހަދައިފަ އެވެ.

އޭގެ އިތުރުން، އިނގިރޭސި ވިލާތުގެ ބޮޑުވަޒީރު ރިޝީ ސުނަކް ބުރާސްފަތި ދުވަހުގެ ފަތިހު އިޒްރޭލަށް ވަޑައިގަތުމަށް މިހާރުވަނީ ހަމަޖެހިފައެވެ. އަދި އޭނާ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އިޒްރޭލުގެ ރައީސް އައިޒަކް ހަރްޒޮގްއާ ބައްދަލު ކުރައްވާނެ ކަމަށް ބެލެވެ އެވެ.

ފަލަސްތީނުގެ ޣައްޒާގެ ހޮސްޕިޓަލަކަށް އިސްރާއީލުގެ އަސްކަރިއްޔާއިން ދިން ބޮމުގެ ހަމަލާއެއްގައި ފަލަސްތީނުގެ 500 އަށްވުރެ ގިނަ މީުން ޝަހީދުވުމާއި ގުޅިގެން މުޅި އަރަބި ދުނިޔޭގައި ދަނީ އިސްރާއީލާ ދެކޮޅަށް މުޒާހިރާތައް ކުރަމުންނެވެ. އެހެންނަމަވެސް އިސްރާއީލުން ވަނީ މިހަމަލާއަކީ އެގައުމުގެ އަސްކަރިއްޔާގެ ހަމަލާއެއް ނޫންކަމަށް ބުނެ، މިއީ ފަލަސްތީނުގެ އިސްލާމިކް ޖިހާދުން އެގައުމަށް ފޮނުވާލި ރޮކެޓެއް ފެއިލްވެގެން، ހޮސްޕިޓަލަށް އަމާޒުވެގެން ހިގި ގޮވުމެއްކަމަށް ބުނެފައެވެ. ނަމަވެސް އެ ޖަމާއަތުން ވަނީ އެކަން ދޮގުކޮށްފަ އެވެ.

އިސްރާއީލުން ގާޒާއަށްދިން މި އަނިޔާވެރި ހަމަލާއަށް ފަހު އުރުދުންއިން ވަނީ އެމެރިކާ އާއި މިސްރުގެ ރައީސުންނާ އެކު ބޭއްވުމަށް ހަމަޖެހުނު ސަމިޓް ކެންސަލްކޮށްފަ އެވެ. އަދި ފަލަސްތީނުގެ ރައީސް މަހްމޫދު އައްބާސް މީގެ ކުރިން ވަނީ އެ ބައްދަލުވުމުން ވަކިވެވަޑައިގެންފަ އެވެ. އެމެރިކާގެ ރައީސް އިސްރާއިލަށް ވަޑައިގަތުމަށް އެނބުރި ގައުމަށް ވަޑައިގަންނަވަން ޖެހިވަޑައިގަތީ އަރަބި ގައުމުތަކުގެ އެއްވެސް ވެރިއަކާ ބައްދަލުކުރުމުގެ ފުރުސަތު ނުލިބިއެވެ.

އިސްރާއީލުން ގާޒާގެ ހޮސްޕިޓަލަށް ދިން ހަމަލާ ދުނިޔޭގެ ލީޑަރުން ކުށްވެރިކުރައްވަމުން ގެންދަވާއިރު، "ވަގުތުން ހަނގުރާމަ ހުއްޓާލުމަށް" އދ.ގެ ސެކެޓްރީ ޖެނެރަލް ވަނީ ގޮވާލައްވާފައެވެ. އަދި މިހަމަލާ ކުށްވެރިކޮށް މެދުއިރުމައްޗާއި އެހެން ހިސާބުތަކުގައި ވެސް މުޒާހަރާތައް ދަނީ ކުރަމުންނެވެ.

މިދިޔަ އޮކްޓޯބަރު މަހުގެ ހަތްވަނަ ދުވަހު އިސްރާއީލުގެ އެތެރޭގައި ހަމާސް ޖަމާއަތުން ދިން ހަމަލާގައި 1،400 އަށް ވުރެ ގިނަ މީހުން މަރުވުމަށް ފަހުން އިސްރާއީލުން ޣައްޒާއަށް ދިން ހަމަލާތަކުގައި ފަލަސްތީނުގެ 3،300 އަށް ވުރެ ގިނަ މީހުން ވަނީ ޝަހީދުވެފަ އެވެ.