އިސްރާއީލުން ގާޒާގެ ހޮސްޕިޓަލަށް ދިން އަނިޔާވެރި ހަމަލާއާއެކު، އިސްރާއީލަށް މުޅި ދުނިޔޭގެ ނުރުހުން އަމާޒުވެފައި ވަނިކޮށް، އެމެރިކާގެ ރައީސް އިސްރާއީލަށް ވަޑައިގެން އެގައުމުގެ ބޮޑުވޒީރު ނަތަންޔާހޫއާއި ބައްދަލު ކުރައްވައިފިއެވެ.
ބައިޑްން އިސްރާއީލަށް ވަޑައިގެންފައި މިވަނީ، ހަމާސްގެ ކިބައިން ދިފާއުވުގެ ހައްގު އިސްރާއީލަށް ލިބިގެންވާކަމަށް ވިދާޅުވެ އެމެރިކާއިން އޮތީ އިސްރާއީލާއެކީކަން ހާމަކޮށް އެކަން ދުނިޔެއަށް ސާބިތު ކޮށްދިނުމަށްކަމަށް އެމެރިކާގެ އޮފިޝަލުން ވިދާޅުވެފައި ވެއެވެ.
އެހެންނަމަވެސް ބައިޑްން އިސްރާއީލަށް ވަޑައިގަތުމުގެ ކުރިން، އިސްރާއީލުން ޣައްޒާގެ ހޮސްޕިޓަލަށް ދިން ވައިގެ ހަމަލާތަކުގައި 500 މީހުން މަރުވުމާއި ގުޅިގެން ބައިޑްންގެ މިދަރުފުޅަށް ވަނީ ހިޔަނި އެޅިފައެވެ.
ފަލަސްތީނުގެ ހެލްތު މިނިސްޓްރީން ބުނެފައިވަނީ ހޮސްޕިޓަލަށް އިސްރާއީލުން ބޮން އެޅުމުގެ ސަބަބުން ފަލްސްތީނުގެ 500 އަށްވުރެ ގިނަ މީުން ޝަހީދުވެފައިވާ ކަމުގައެވެ. އެހެންނަމަވެސް އިސްރާއީލުން ވަނީ މިހަމަލާއަކީ އެގައުމުގެ އަސްކަރިއްޔާގެ ހަމަލާއެއް ނޫންކަމަށް ބުނެ، މިއީ ފަލަސްތީނުގެ އިސްލާމިކް ޖިހާދުން އެގައުމަށް ފޮނުވާލި ރޮކެޓެއް ފެއިލްވެގެން، ހޮސްޕިޓަލަށް އަމާޒުވެގެން ހިގި ގޮވުމެއްކަމަށް ބުނެފައެވެ. ނަމަވެސް އެ ޖަމާއަތުން ވަނީ އެކަން ދޮގުކޮށްފަ އެވެ.
އިސްރާއީލުން ގާޒާއަށްދިން މި އަނިޔާވެރި ހަމަލާއަށް ފަހު އުރުދުންއިން ވަނީ އެމެރިކާ އާއި މިސްރުގެ ރައީސުންނާ އެކު ބޭއްވުމަށް ހަމަޖެހުނު ސަމިޓް ކެންސަލްކޮށްފަ އެވެ. އަދި ފަލަސްތީނުގެ ރައީސް މަހްމޫދު އައްބާސް މީގެ ކުރިން ވަނީ އެ ބައްދަލުވުމުން ވަކިވެވަޑައިގެންފަ އެވެ.
އިސްރާއީލުން ގާޒާގެ ހޮސްޕިޓަލަށް ދިން ހަމަލާ ދުނިޔޭގެ ލީޑަރުން ކުށްވެރިކުރައްވަމުން ގެންދަވާއިރު، "ވަގުތުން ހަނގުރާމަ ހުއްޓާލުމަށް" އދ.ގެ ސެކެޓްރީ ޖެނެރަލް ވަނީ ގޮވާލައްވާފައެވެ. އަދި މިހަމަލާ ކުށްވެރިކޮށް މެދުއިރުމައްޗާއި އެހެން ހިސާބުތަކުގައި ވެސް މުޒާހަރާތައް ދަނީ ކުރަމުންނެވެ.
މިދިޔަ އޮކްޓޯބަރު މަހުގެ ހަތްވަނަ ދުވަހު އިސްރާއީލުގެ އެތެރޭގައި ހަމާސް ޖަމާއަތުން ދިން ހަމަލާގައި 1،400 އަށް ވުރެ ގިނަ މީހުން މަރުވުމަށް ފަހުން އިސްރާއީލުން ޣައްޒާއަށް ދިން ހަމަލާތަކުގައި ފަލަސްތީނުގެ 3،300 އަށް ވުރެ ގިނަ މީހުން ވަނީ ޝަހީދުވެފަ އެވެ.
