އިސްރާޢީލުން ފަލަސްޠީނުގައި ހިންގާ ގަތުލުން ޢާންމުގައި، ފަލަސްޓީނުގެ ހޮސްޕިޓަލަކަށް ޢަމާޒުކޮށް ރޭ ދިންހަމަލާ ކުށްވެރިކުރައްވައި، އަވަސް އިންސާނީ އެހީ ފޯރުކޯށްދެވޭނެ މަގެއް ހޯދައިދިނުމަށް ރައީސް އިބްރާހީމް މުޙައްމަދު ޞާލިޙް ގޮވާލައްވައިފިއެވެ.
އިސްރާޢީލުން ރޭ ފަލަސްޠީނުގެ ހޮސްޕިޓަލަށް ޢަމާޒުކޮށް ދިން ހަމަލާގައި މިހާތަނަށް 500 މީހުން ވަނީ ޝަހީދުވެ އެތައް ސަތޭކަ ބަޔަކު ޒަޚަމްވެފައެވެ. ހޮސްޕިޓަލުތަކަކީ ބައިނަލްއަޤްވާމީ ޤާނޫނުތަކުގެ ދަށުން ހިމާޔަތްކޮށްފައިވާ ތަންތަނެވެ. ނަމަވެސް އިސްރާޢީލުގެ އެ ހަމަލާއާއި ގުޅިގެން މުޅި ދުނިޔޭގެ ފާޑުކިޔުމާއި ފިއްތުންތަކާއި އިސްރާޢީލަށް ވަނީ ކުރިމަތިލާން ޖެހިފައެވެ.
އިސްރާއީލުގެ އެ ޢަމަލު ކުށްވެރިކުރައްވާ ރައީސް ޞާލިޙް ކުރެއްވި ޓްވީޓްގައި ވިދާޅުވީ، ޣައްޒާއަށް އިންސާނީ އެހީ ފޯރުކޮށްދިނުމަށް އަވަސް ގޮތެއް ހޯދައިދިނުމަށް ބައިނަލްއަޤްވާމީ މުޖުތަމަޢުއަށް ގޮވާލައްވާފައެވެ.
އިސްރާއީލުން ބޮން އަޅާފައިވަނީ ޣައްޒާގައި ހުންނަ އަލް އަހުލީ ހޮސްޕިޓަލަށެވެ. މި ހޮސްޕިޓަލަކީ އިސްރާއީލުން މެދުކެނޑުމެއްނެތި ދެމުންދާ ހަމަލާތަކުން އެތައްހާސް ބަޔަކު ހިމާޔަތް ހޯދާ އަދި ފަރުވާ ހޯދުމުންދާ ހޮސްޕިޓަލެކެވެ.
ގާޒާގެ ހެލްތު މިނިސްޓްރީން ބުނެފައިވަނީ މިހަމަލާގައި 500 އަށްވުރެ ގިނަމީހުން ޝަހީދުވެފައިވާ ކަމުގައެވެ. ހޮސްޕިޓަލްގެ އިތުރުން އިސްރާއީލުންވަނީ ޣައްޒާގައި ޔޫއެންއިން ރެފިއުޖީން ބަލަހައްޓަމުންދާ ސްކޫލަކަށްވެސް ހަމަލާ ދީފައެވެ.
ފާއިތުވެދިޔަ 7 ދުވަހު މެދުކެނޑުމެއްނެތި ދެމުންދާ ހަމަލާތަކުގައި މިހާތަނަށް ފަލަސްތީނުގެ 3،000 މީހުން ވަނީ ޝަހީދުވެފައެވެ. ހަމާސްއިން އިސްރާއީލަށް ދިން ހަމަލާތަކުގައި އެގައުމުގެ 1،400 މީހުންވަނީ މަރުވެފައެވެ.
ޢައްޒާގެ ހޮސްޕިޓަލަށް އިސްރާއިލުން ދިން ހަމަލާ މިސްރުންވަނީ ކުށްވެރި ކޮށްފައެވެ. މިސްރުގެ ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ މިއީ އިސްރާއީލުން ހިންގާފައިވާ "ނުރައްކާތެރި، އިންސާނިއްޔަތާ ޚިލާފް ޖަރީމާއެއް" ކަމުގައެވެ.
ދުނިޔޭގެ ސިއްޙަތު ޖަމިއްޔާ، ޑަބްލިއުއެޗްއޯއިންވެސް ވަނީ އިސްރާއީލުން ޣައްޒާގެ ހޮސްޕިޓަލަށް ދިން ބޮމުގެ ހަމަލާ ކުށްވެރި ކޮށްފައެވެ. އެކްސްގައި (ޓުވިޓަރ ގައި) ކުރެއްވި ޕޯސްޓެއްގައި ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދަނޮމް ވަނީ، "އާންމު ރައްޔިތުންގެ ސަލާމަތަށް މިހާރުން މިހާރަށް ފިޔަވަޅު އެޅުމަށާއި" އަދި ޣައްޒާގެ ރައްޔިތުންނަށް ގެދޮރު ދޫކޮށް ދިއުމަށް ދީފައިވާ އިންޒާރު އަބުރާ ގެންދިއުމަށް އިސްރާއީލަށް ގޮވާލައްވާފައެވެ.
މިހަމަލާއާ ގުޅޭގޮތުން އިސްރާއީލުގެ އަސްކަރިއްޔާއިން ބުނެފައިވަނީ މި ހަމަލާއަކީ އެގައުމުގެ އަސްކަރިއްޔާއިން ދިން ހަމަލާއެއްކަން އަދި ޔަގީން ނުވާކަމަށާއި، މިހަމަލާއާ ގުޅޭ އިތުރު މައުލޫމާތު ފޯރުކޮށްދޭނެ ކަމުގައެވެ.
