ފަލަސްތީނުގެ ޣައްޒާ ރައްޔިތުންނަށް އެހީ ލިބޭނެ ގޮތެއް މަގުފަހި ކުރަން ރައީސް އިބްރާހިމް މުހައްމަދު ސޯލިހް މިއަދު ގޮވާލައްވައިފިއެވެ.
މި މަހުގެ 7 ވަނަ ދުވަހުން ފެށިގެން އިސްރާއީލްގެ ހައްދުފަހަނައަޅާފައިވާ ސިފައިން ގެންދަނީ ފަލަސްތީނުގެ ޣައްޒާ އަށް ބޮން އަޅައި، އެތައް ބަޔަކު ޝަހީދު ކުރަމުންނެވެ. ޣައްޒާ އަށް ވައިގެ މަގުން ދޭ ހަމަލާތަކުގައި އެތައް އިމާރާތެއް ވަނީ ބިމާ ހަމަވެފައެވެ. އަދި ގެއްލުން ލިބިފައި ވަނީ ކުށެއް ނެތް އާންމުންނަށެވެ.
އިސްރާއީލުން މި ފަހުން އެންމެ ނުރައްކާތެރި ހަމަލާއެއް ދީފައި ވަނީ ޣައްޒާގައި ހުންނަ އަލް އަހްލީ އަރަބް ހޮސްޕިޓަލަށެވެ. މި ހޮސްޕިޓަލަށް ބޮން އަޅައި، އެ ހޮސްޕިޓަލްގެ ގޯތިތެރޭގައި ތިބި އެތައް ސަތޭކަ ބަޔަކު ޝަހީދުކޮށްލައި، އެތައް ބަޔަކު ވަނީ ޒަހަމްކޮށްލައިފައެވެ.
Strongly condemn Israel’s attack on Al-Ahli Arab hospital in Gaza. Targeting hospitals and non-combatants is a gross violation of international law. I call on the world community to push for a ceasefire and establish humanitarian corridors to ease the plight of Gaza’s residents.
— Ibrahim Mohamed Solih (@ibusolih) October 18, 2023
އަލް އަހްލީ އަރަބް ހޮސްޕިޓަލަށް އިސްރާއީލުން ދިން ހަމަލާ ކުށްވެރި ކުރައްވައި ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ހޮސްޕިޓަލް ފަދަ ތަންތަނަށް ހަމަލާ ދިނުމަކީ ބައިނަލްއަގުވާމީ ގާނޫނުތައް މަނާ ކުރާ ކަމެއް ކަމަށެވެ.
އެހެންކަމުން، އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު ކުރިއަށްދާ ހަނގުރާމަ ހުއްޓުވަން ދުނިޔޭގެ ގައުމުތަކުންނާއި ޖަމާއަތްތަކުން މަސައްކަތްކޮށް، ޣައްޒާ ރައްޔިތުންނަށް އެހީ ލިބޭނެ ގޮތެއް މަގުފަހި ކުރަން ވެސް ރައީސްގެ ޕޯސްޓްގައި ގޮވާލެއްވިއެވެ.
ހޮސްޕިޓަލަށް އަމާޒުކޮށް އިސްރާއީލުން ދިން ހަމަލާތަކުގައި މިހާތަނަށް 500 އަށް ވުރެ ގިނަ މީހުން ޝަހީދުވެފައިވާ އިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
ފޮރިން މިނިސްޓަރު އަބްދުﷲ ޝާހިދު ވެސް ވަނީ އިސްރާއީލްގެ މި އަމަލަކީ އިންސާނީ މިންގަނޑުތަކާއި ހިލާފު ލާއިންސާނީ ހަމަލާއެއްކަން ފާހަގަކުރައްވާ، ބައިނަލްއަގުވާމީ މުޖުތަމައުން އިޒްރޭލުގެ ހަމަލާތައް ހުއްޓާލުމަށް މަސައްކަތް ކުރުމަށް ގޮވާލައްވައިފައެވެ.
އިސްރާއީލްގެ ހަމަލާތަކުގައި ފަލަސްތީނުގެ ޣައްޒާ އިން 3،500 އަށް ވުރެ ގިނަ މީހުން ވަނީ ޝަހީދުވެފައެވެ. އަދި މި ހަމަލާތަކުގައި 12،000 އަށް ވުރެ ގިނަ މީހުންނަށް އެކިވަރުގެ ޒަހަމްތަައް ލިބިފައިވެއެވެ. ހަމާސްގެ ހަމަލާތަކުގައި އިސްރާއީލުން 1،400 މީހުން ވަނީ މަރާލައިފައެވެ.
