ފަލަސްޠީނުގެ ރައްޔިތުންނަށް އެހީތެރިވުމަށް ރާއްޖޭގެ މީޑިއާތައް ގުޅިގެން ކުރިއަށްގެންދިޔަ "އަހަރެމެން ފަލަސްޠީނާއެކު" ޓެލެތޯނަށް 13 މިލިއަނަށްވުރެ ގިނަ ރުފިޔާ ލިބިެއްޖެއެވެ.

މީޑިއާތައްގުޅިގެން ކުރިއަށް ގެންދިޔަ ޓެލެތޯން ކުރިއަށްގެންދިޔައީ ހެނދުނު 10:30އިން ރޭ 00:00އާއި ހަމައަށެވެ. މި ޓެލެތޯނަށް 12،989،372.72 ރުފިޔާއާއި 8،672.38 ޑޮލަރު ވަނީ ލިބިފައެވެ.

މި ޓެލެތޯނަށް އެސްޓީއޯއާއި އެ ކުންފުނީގެ ސަބްސިޑަރީ ކުންފުންނިތަކުން އެކަނިވެސް 1 މިލިއަން ރުފިޔާ ދީފައިވެއެވެ.

މި ޓެލަތޯން، ޓީވީއެމް، ދިވެހިރާއްޖޭގެ އަޑު، އެސްއެސްޓީވީ، ދިވެހި ޗެނަލް، ޗެނަލް13، ވީޓީވީ، އައިސްޓީވީ، ސީއެންއެމް، ވަގުތުޓީވީ، ނެކްސްޓް، ސަންގު ޓީވީ އަދި މުޢިއްޒު ޓީވީން ލައިވްކޮށް ގެނެސްދެމުންދާނެއެވެ. މީގެ އިތުރުން ސަން އޮންލައިން، ވަން އޮންލައިން އަދި ވޮއިސް އިން ވެސް ވަނީ ބައިވެރިވެފައެވެ.

ފަލަސްތީނުގައި ރައްޔިތުންނަށް އެހީތެރިކަން ފޯރުކޮށްދެމުންދަނީ އެ ޤައުމުގައި ތިބި އައިއޭސީގެ ބައިވެރިންނާއެކުގައެވެ.

އެގޮތުން 25 އަށްވުރެ ގިނަ ވޮލެންޓިއަރުން ޢާޒާގައި ހަރަކާތްތެރިވަމުންދާކަން އައިއޭސީން ފާހަގަކުރެއެވެ. އަދި އެހީތެރިކަން ފޯރުކޮށްދެމުންދަނީ ވަރަށް ބޮޑަށް ރާވާލައިގެންކަމަށްވެސް އެ ޖަމާއަތުން ބުނެއެވެ.