އެކްޝަން ޑައިރެކްޓަރ ރޯހިތު ޝެއްޓީގެ ކޮޕް ޔުނިވާސްގެ ފިލްމު ތަކުގެ ފެށުމަކީ "ސިންގަމް" އެވެ.
އަޖޭ ދޭވްގަން އާއެކު ރޯހިތު ފެށި "ސިންގަމް" ފިލްމު ސީކުއަލްގެ ދެ ފިލްމެއް މިހާތަނަށް ގެނެސްދީފައި ވާއިރު މީގެ ކުރިއަށް އޮތް ފިލްމަކީ "ސިންގަމް އެގެއިން" އެވެ.
މި ސީކުއަލްގެ ތިންވަނަ ފިލްމު "ސިންގަމް އެގެއިން" ގައި އަޖޭގެ އިތުރުން މުހިންމު ރޯލަކުން ފެނިގެންދާނީ ކާމިޔާބު އެކްޓްރެސް ދީޕިކާ ޕަދުކޯން އެވެ. އޭނާ ވެސް ފެނިގެން ދާނީ ވަރުގަދަ ފުލުހެއްގެ ރޯލުންނެވެ. އެގޮތުން ދީޕިކާގެ ފަސްޓް ލުކް މިހާރު ވަނީ ބެލުންތެރިންނަށް ދޫކޮށްލާފައެވެ.
View this post on Instagram
ފިލްމުގައި ދީޕިކާ ފެންނާނެ ގޮތުގެ ޕޯސްޓަރެއް ދައްކާލައިފާ މިވަނީ، ފިލްމުގެ ރޯލެއް ދީޕިކާ އަށް ހުށަހެޅި ކަމަށް އަޑު ފެތުރިފައި އޮންނަތާ ގިނަ ދުވަސްތަކެއް ވީ ފަހުންނެވެ.
ދީޕިކާގެ އިތުރުން ޑައިރެކްޓަރ ރޯހިތު ޝެއްޓީވެސް ވަނީ އިންސްޓަގްރާމް ގައި ދީޕިކާގެ ޕޯސްޓަރު ހިއްސާކޮށްފައެވެ. ރޯހިތު ބުނެފައި ވަނީ މިއީ އޭނާގެ ކޮޕް ޔުނިވާސްއިން ފެނިގެންދާނެ އެންމެ ވަރުގަދަ ފުލުސް އޮފިސަރ "ޝަކްތީ ޝެޓީ" ކަމަށެވެ.
އަޖޭ ދޭވްގަން ހިތްވަރާއި އަޒުމް ވަރުގަދަ ފުލުހެއްގެ ރޯލު ކުޅޭ "ސިންގަމް" ފިލްމު ސީރީޒްގެ މި ފިލްމުގައި ދީޕިކާ ކުޅޭނީ އަޖޭގެ ކޮއްކޮގެ ރޯލު ކަމަށް ރިޕޯޓްތައް ބުންޏެވެ.
މިދިޔަ މަހު ޝޫޓިން ފެށި "ސިންގަމް އެގެއިން"ގެ ވިލަންގެ ގޮތުގައި އަރުޖުން ކަޕޫރު ހަމަޖައްސައިފާ ވާކަމަށްވެސް ޚަބަރުތައް ބުނެއެވެ. ފިލްމު ސިނަމާތަކަށް ގެނައުމަށް ނިންމާފައި ވަނީ އަންނަ އަހަރެވެ.
ސިންގަމްގެ އިތުރުން ރޯހިތުގެ ކޮޕް ޔުނިވާސްގައި ދެން އުޅެނީ "ސިމްބާ" އަދި "ސޫރިޔަވަންޝީ" އެވެ.
