ދަ ޑިމޮކްރެޓްސްގެ ރައީސްކަމުގެ މަޤާމަށް ވާދަކުރެއްވުމަށް، އެ ޕާޓީގެ ވަގުތީ ޗެއަރޕާސަން ހަސަން ލަޠީފް ފޯމު ހުށައަޅުއްވައިފިއެވެ. ޑިމޮކްރެޓްސްގެ އެތެރޭގެ އިންތިޚާބު އޮންނާނީ ޑިސެމްބަރު 2ގައެވެ.
ޑިމޮކްރެޓްސްގެ ރައީސްކަމަށް ޙަސަންގެ އިތުރުން، ރިޔާސީ އިންތިޚާބުގައި އެޕާޓީގެ ރަނިންމޭޓް ޙުސައިން ޢަމްރުވެސް ވަނީ ޝަޢުޤުވެރިކަން ފާޅުކުރައްވާފައެވެ.އަދި ވާދަކުރައްވާނެކަން ހާމަކުރައްވާފައިވެއެވެ.
ޙަސަން މިއަދު ކުރެއްވި ޓްވީޓެއްގައި ވިދާޅުވީ އެޕާޓިގެ ރައީސްކަމަށް ވާދަކުރެއްވުމަށް ފޯމު ހުށައަޅުއްވާފައިވާކަމަށާއި، ގޮންޖެހުންތަކާއި ކުރިމަތިލުމަށް ރަނގަޅު މަގުގައިި ތިބެންޖެހޭކަމަށެވެ.
ޙަސަން ލަޠީފް ވަނީ އެމްޑީޕީގެ ޗެއަރޕާސަންކަންވެސް ކުރައްވާފައެވެ.
ދަ ޑިމޮކްރެޓްްސްއަކީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީގެ ރައީސް މުޙައްމަދު ނަޝީދު އިސްވެ އުފެއްދެވި ސިޔާސީ ޕާޓީއެކެވެ. އެޕާޓީ އުފެދުނީ އެމްޑީޕީގެ ރިޔާސީ ޕްރައިމަރީއަށްފަހު، އެތެރޭގައި އުފެދުނު ޚިޔާލު ތަފާތުވުމުގެ ތެރެއިން ރައްޔިތުންގެ މަޖިލީހުގެ އެމްޑީޕީގެ މަޖިލިސް ބައެއް މެންބަރުން އިސްވެ ތިއްބަވައިގެންނެވެ.
ދަ ޑިމޮކްރެޓްސްއިން ވަނީ އެޕާޓި އުފެދުނުތާ ދެތިން މަސް ދުވަހުގެ ތެރޭގައި މިފަހަރުގެ ރިޔާސީ އިންތިޚާބުގައި ވާދަކޮށްފައެވެ. އެޕާޓިއަށް އިންތިޚާބުން 15 ހާހަށްވުރެ ގިނަ ވޯޓާއެކު ތިންވަނަ ލިބުނެވެ.
