ރައްޔިތުންގެ މަޖިލިހުގެ ކުރީގެ މެމްބަރު އަހްމަދު ނިހާން ހުސައިން މަނިކުގެ އެޕާޓްމަންޓަކަށް ބޭންކަށް ދައްކަންޖެހޭ ފައިސާ ނުދައްކައިގެން އެޕާޓްމަންޓް ވިއްކާލުމުގެ ހުއްދަ ކޯޓުން ދީފިއެވެ.

ސިވިލް ކޯޓުން ވިއްކާލުމުގެ ހުއްދަ ދޫކޮށްފައިވަނީ، ހުޅުމާލޭ ޕްލެޓިނަމް ރެސިޑެންސްގައި ހަދާފައިވާ 4.2 މިލިއަން ރުފިޔާގެ އަގުހުރި އެޕާރޓްމަންޓެކެވެ. އެޕާރޓްމަންޓް ގަނެފައިވަނީ ބޭންކު ފެސިލިޓީއެއްގެ ތެރެއިން، ބޭންކުގައި އެތަން ރަހުނު ކޮށްފައެވެ.

ނިހާން އެޕާޓްމަންޓަށް ފައިސާ ދައްކަމުން ނުދާތީ، ސިވިލް ކޯޓު ހުޅުމާލޭ ޑިވިޝަނުން ފާއިތުވި ހަފްތާގައި ކުރި ހުކުމްގައި ބުނެފައިވަނީ ކުރިޔަށް އޮތް 6 މަސްތެރޭގައި އެޕާރޓްމަންޓްގެ ނުދައްކާހުރި ފައިސާ ދައްކާ ޚަލާސް ކުރުމަށެވެ. އަދި މި މުއްދަތުގައި ފައިސާ ނުދައްކައިފިނަމަ، އެޕާރޓްމަންޓް ވިއްކާލުކުގެ ހުއްދަ ކޯޓުންވަނީ ބޭންކަށް ދީފައެވެ.

މައްސަލަ ނިންމާފައިވަނީ ނިހާންގެ ޣައިރު ހާޒިރުގައެވެ. އެޕާރޓްމަންޓަށް 3 މިލިއަން ރުފިޔާ ނުދައްކާ ހުރިކަމަށް އެނގިފައި ވެއެވެ.

ކުރީގެ ރައީސް ޔާމިންގެ ވެރިކަމުގައި ހިނގި އެމްއެމްޕީއާރުސީގެ ޚިޔާނާތުގެ ތުހުމަތުގައި ނިހާންގެމައްޗަށް ކޮށްފައިވާ ދައުވާގެ ޝަރީއަތްވެސް މިހާރު ދަނީ ކުރިޔަށެވެ. ނިހާންގެ މައްޗަށް ދައުލަތުން ކޮށްފައިވަނީ ރިޝްވަތު ހިފުމުގެ ތިން ދައުވާއަކާއި، ރިޝްވަތު ދިނުމުގެ ދެ ދައުވާއެއްގެ އިތުރުން މަނީ ލޯންޑަރިންގެ ދައުވާ އެކެވެ.

މިހުރިހާ ދައުވާއަކަށްވެސް ނިހާންވަނީ އިންކާރު ކޮށްފައެވެ.