މާލެ ސިޓީ ކައުންސިލްގެ މޭޔަރު އަދި އިންތިޚާބީ ރައީސް ޑރ. މުހައްމަދު މުއިއްޒު މިރޭ މާލެ ސިޓީ ކައުންސިލްގެ މުވައްޒިފުންނާއި ބައްދަލު ކުރެއްވުމަށް ހަމަޖެހިއްޖެއެވެ.
އިންތިޚާބީ ރައީސް ޑރ. މުއިއްޒު މާލެ ސިޓީ ކައުންސިލްގެ މުވައްޒިފުންނައި ބައްދަލު ކުރައްވާނީ މިރޭ 20:30ގައި ދަރުބާރުގޭގައެވެ. މާލެ ސިޓީ ކައުންސިލަށް ޑރ. މުއިއްޒު އިންތިޚާބުވިފަހުން ކައުންސިލްގެ މުވައްޒިފުންގެ ކުރި އެރުމަށް ވަނީ ބޮޑެތި މަސައްކަތްތަކެއް ކުރައްވާފައެވެ. މުވައްޒިފުންގެ ކުރި އެރުމާއި ތަރައްޤީ އަށް ހެޔޮ ބަދަލުތަކެއް މުއިއްޒު ވަނީ ގެނެސްދެއްވާފައެވެ.
މާލެ ސިޓީ ކައުންސިލްގެ މޭޔަރުގެ ޒިންމާތައް ޑެޕިއުޓީ މޭޔަރު އަހުމަދު ނަރީޝްއާއި ހަވާލުކުރަން ނިންމަވައި، ރައީސުލްޖުމްހޫރިއްޔާކަމުގެ ހުވާ ކުރެއްވުމުގެ ކުރިން ކުރައްވަންޖެހޭ މުހިންމެ މަސައްކަތްތަކަށް ވަގުތު ހުސްކުރެއްވުމަށް އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ނިންމަވާފައެވެ.
އިންތިޚާބީ ރައީސް ޑރ. މުއިއްޒު ވަނީ މާލެ ސިޓީ ކައުންސިލްގެ މެންބަރުންގެ ފަރާތުން އިންތިޚާބުގެ ތެރޭގައި ލިބިވަޑައިގެންނެވި އެއްބާރުލުން ފާހަގަ ކުރައްވާ ޝުކުރު އަދާ ކުރައްވާފައެވެ. ޑރ. މުއިއްޒު ވިދާޅުވީ، ނޮވެމްބަރު 17ގައި ރައީސުލްޖުމްހޫރިއްޔާކަމުގެ ހުވާކުރެއްވުމާ ހަމައަށް މޭޔަރުކަމުގައި ހުންނަވާނެ ކަމަށެވެ. ނަމަވެސް މާލެ ސިޓީ މޭޔަރުގެ ޒިންމާތައް މިއަދުން ފެށިގެން ޑެޕިއުޓީ މޭޔަރު ނަރީޝްއާ ހަވާލުކުރައްވާފައިވާކަމަށް މުއިއްޒު ވަނީ ވިދާޅުވެފައެވެ.
ޑރ.މުޢިއްޒު ރައީސުލްޖުމްހޫރިއްޔާކަމުގެ ހުވާ ކުރައްވާނީ އަންނަ ނޮވެމްބަރު މަހުގެ 17ގައެވެ. މިއާއެކު މާލެ ސިޓީ ކައުންސިލްގެ މޭޔަރު ކަމުގެ ގޮނޑި ހުސްވާނެއެވެ. އެހެންކަމުން މާލެ ސިޓީ ކައުންސިލްގެ މޭޔަރުކަމަށް، މެންބަރަކު އައްޔަނު ކުރުމަށްޓަކައި ބައި-އިލެކްޝަނެއް ބާއްވާނެއެވެ.
މާލޭގެ މޭޔަރުކަމަށް ޑރ. މުޢިއްޒު އިންތިޚާބުވެވަޑައިގަތީ 2021 ވަނަ އަހަރުގެ އޭޕްރީލް މަހު ބޭއްވި ލޯކަލް ކައުންސިލްތަކުގެ އިންތިޚާބުގައި އެމްޑީޕީގެ ކެންޑިޑޭޓު އަނަސް އަބްދުއްޞައްތާރާ ވާދަކޮށް ބޮޑު ތަފާތަކުން އިންތިޚާބު ކާމިޔާބު ކުރައްވައިގެންނެވެ.
