އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މާލީ ބުރަ އުފުލަންޖެހޭ ގޮތަށް ކަންކަން ނުހިންގެވުމަށް މިސަރުކާރުގެ ކުޅިވަރާއި ބެހޭ ވަޒީރު އަހުމަދު މަޚުލޫފުގެ ކިބައިން ނިލަންދޫ ދާއިރާގެ ކުރީގެ މެމްބަރު ޑރ. ޚަލީލް އެދިވަޑައިގެންފިއެވެ.

ޚަލީލް މިފަދައިން އެދިވަޑައިގެންފައިވަނީ ބިޑު ކުރުމަކާ ނުލާ, އިންތިގާލީ މަރުހަލާގައި ސިންގަލް ސޯސް ޕްރޮކިއުމެންޓް އުސޫލުގެ ދަށުން އެތައް މިލިއަން ރުފިޔާގެ މަޝްރޫއު ޔޫތު މިނިސްޓްރީން އެކި ފަރާތްތަކާއި ހަވާލުކުރުމަށް ތައްޔާރުވަމުން ދާކަމުގެ އަޑުތަކެއް ފެތުރިފައިވާ ދަނޑިވަޅެއްގައެވެ.

މިދަނޑިވަޅަކީ ރައްޔިތުންގެ ވޯޓުން މިހާރު އޮތް ސަރުކާރަށް ރައްޔިތުން ނޫނެކޭ ބުނެ އާ ސަރުކާރެއް އިންތިޚާބުކޮށް، އިންތިޤާލީ މަރުހަލާގެ ކަންކަން ހިނގާ ދުވަސް ވަރަށް ވާއިރު، މިހާލަތުގައި އަންނަން އޮތް ސަރުކާރަށް މާލީ ބުރަ ބޮޑުވާނެހެން ކަންކަން ކުރުމަކީ ވަރަށް ނާތަހުޒީބު ކަމެއްކަމަށް ޚަލީލް ވިދާޅުވިއެވެ. އަދި މިގޮތަށް އަންނަން އޮތް ސަރުކާރަށް ޖެއްސުން ކުރުމަށް ނުވަތަ ބުރަ ބޮޑު ކުރުމަށް ކަންކަން ނުކުރުމަށް އިންތިޚާބީ ރައީސް އޮފީހުން ގެންދަވަނީ ތަކުރާރުކޮށް ދަންނަވަމުން ކަމަށްވެސް ޚަލީލް ވިދާޅުވިއެވެ.

އޮފީސް އޮފްދަ ޕްރެސިޑެންޓް އިލެކްޓް އިން މިކަންކަން އިންތިޤާލީ މަރުހަލާގައި ނުކުރަން އަންގާފައި ވަނިކޮށް، ޕްރޮޖެކްޓްތައް އެކި ފަރާތްތަކާއި ހަވާލުކުރުމަކީ އެއްވެސް އިރެއްގައި ކުރަމުން އައި ކަމެއްނޫން. އަންނަން އޮތް ސަރުކާރުން މާލީ ބުރަ އުފުލަންޖެހޭ ގޮތަށް ކަންކަން ނުހިންގަވާ.

– މިނިސްޓަރ މަހުލޫފް ޓެގް ކުރައްވާ ޚަލީލް ކުރެއްވި ޓުވީޓުގައި ވިދާޅުވިއެވެ.

މިނިސްޓަރު މަހްލޫފް އިސްވެ ހުންނަވައި މި މަޝްރޫއުތަކުގައި ސޮއިކުރަން އުޅޭއިރު އިންތިހާބީ ރައީސް ޑރ.މުއިއްޒު ވަނީ އާ އެއްވެސް މަޝްރޫއެއްގައި ސޮއިނުކުރައްވަން މިހާރުގެ ސަރުކާރުގެ ކިބައި އެދިވަޑައިގެންފައެވެ. ވަކިން ޚާއްސަކޮށް މާލީ ބުރަ އިތުރަށް ބޮޑުވާނެހެން އަންނަ ސަރުކާރަކުން އެކަންކަމުގެ ޒިންމާ އުފުލަންޖެހޭ ގޮތަށް ކަންކަން ނުކުރުމަށް އިންތިޚާބީ ރައީސްގެ ތަރުޖަމާނުވެސް ގެންދަވަނީ ތަކުރާރުކޮށް ސަރުކާރުގެ އެކި މުވައްސަސާތަކުގެ ކިބައި އެދެމުންނެވެ.