ހުޅުމާލެ ތިން ވަނަ ފިޔަވަހީގެ ފުރަތަމަ ބައި ހިއްކުމުގެ މަސައްކަތް އަންނަ ހުކުރު ދުވަހު ނިންމާލެވޭނެ ކަމަށް އާބަންކޯ އިން ބުނެފިއެވެ.
ސަރުކާރުގެ ބިންވެރިޔާ ސްކީމްގެ ދަށުން ގޯތި ދޭން ނިންމާފައިވާ ހުޅުމާލެ ތިން ވަނަ ފިޔަވަހި ހިއްކުމުގެ މަސައްކަތް ފެށީ މިދިޔަ މަހު 22 ގައެވެ.
އާބަންކޯ އިން މިރޭ ބުނީ ސައިޓް އޭ ގެ 70 ޕަސެންޓު ވަނީ ހިއްކާ ނިމިފައި ކަމަށާއި ހުކުރު ދުވަހާ ހަމައަށް އެއްކޮށް ނިންމާލެވޭނެ ކަމަށެވެ. އެއީ ޖުމްލަ 10 ހެކްޓަރުގެ ބިން ކަމަށް އެ ކުންފުނިން ބުންޏެވެ. ފޭސް ތިނެއް ހިއްކަން ނިންމާފައި ވަނީ ތިން ބަޔަކަށް ބަހާލައިގެންނެވެ.
ސައިޓް އޭ ގެ މަސައްކަތް ނިމުމަށް ފަހު ސައިޓް ބީ ގެ މަސައްކަތް ފެށުމަށް އެ ސަރަހައްދުގައި އަޅާފައި ހުރި އުޅަނދުތައް ވީހާ ވެސް އަވަހަކަށް ނަގަން އެދޭ ކަމަށް އާބަންކޯ އިން ބުންޏެވެ.
ފޭސް ތިނެއްގެ ގޮތުގައި ހުޅުމާލެ ފަޅު ތެރެއިން ހިއްކަން ހަމަޖެހިފައި ވަނީ 63 ހެކްޓަރުގެ ބިމެވެ. މި ސަރުކާރުން ބުނެފައިވާ ގޮތުން މި ދައުރު ނިމުމުގެ ކުރިން އެ ސަރަހައްދު ހިއްކައި މާލެ ރައްޔިތުންނަށް ގޯތި ކަނޑާނެއެވެ.
