އިންތިޚާބީ ރައީސް ޑރ.މުޙައްމަދު މުއިއްޒުގެ ވެރިކަމަކީ ރައްޔިތުންނަށް އަނެއްކާވެސް އުއްމީދެއް ގެނުވާނެ ދުވަސްތަކަކަށްވާނެކަމަށް އެމޑީޕީގެ ކުރީގެ ނާއިބު ރައީސް އަދި ދަ ޑިމޮކްރެޓްސްގެ އެއް އިސް ލީޑަރު މުޙައްމަދު ޝިފާޒް ވިދާޅުވެއްޖެއެވެ.
ދަ ޑިމޮކްރެޓްސްއިން ރޭ ބޭއްވި ހަރުގެ ޖަލްސާގައި ވާހަކަފުޅު ދައްކަވަމުން ޝިފާޒް ވިދާޅުވީ އެމްޑީޕީން ހަދަމުން ދިޔައީ ގޯސްތަކެއްކަން ތަކުރާރުކޮށް ދަންނަވަމުން ދިޔަކަމަށެވެ. ނަމަވެސް އެ އަޑުނާގާ އެމްޑީޕީން ދިޔައީ ބޮޑާކަމާއި ކިބުރުވެރިކަންމަތީކަމަށާއި، ދަ ޑިމޮކްރެޓްސްއިން އެމްޑީޕީ ދޫކޯށް ނިކުތީ އެވެރިކަން ބަދަލުކުރުމަށްކަމަށް ޝިފާޒް ވިދާޅުވިއެވެ. އެކަން މިއަދު ހާސިލްކޮށްފިކަމަށާއި، މިއަދު އެ ތިއްބެވީ އެކަން ހާސިލްކޮށްގެންކަމަށް ޝިފާޒް ވިދާޅުވިއެވެ.
ތަކުރާރުކޮށް ދެންނެވިން ތި ހައްދަވަނީ ގޯހެކޭ ގޯހެކޭ ގޯހެކޭ… އަޑުއައްސަވާ އެ ބޮޑާކަމާ އެ ކިބުރުވެރިކަމާ އެ ގަޓުކަން ދައްކާލާފަ އެކަން ކުރެއްވީމަ މިއަދު އަޅުގަނޑުމެން މިއަދު މިތިބީ ސިޔާސީ ޕާޓިއެއް ހަދައިގެން. އެހެންވެ މިދަންނަވަނީ ހިތުގަ ޖެހިވަޑައި ނުގަންނަވައްޗޭ އެއްވެސް ބޭފުޅަކު. ސިޔާސީ ޕާޓީގެ އޮންނާނެ އަމާޒެއް. އޮންނާނެ މަޤްޞަަދެއް. އަޅުގަނޑުމެން ނިކުތީ މަޤްޞަދެއްގަ. ޢަމާޒެއްގަ. އެ އަމާޒަށް ބޭނުންވާރަށް ވޯޓު ހޯދީ. ދެން ކީޯއްކުރާނީ އެކަން ކޮށްގެން މިތިބީ.
– މުޙައްމަދު ޝިފާޒް ވިދާޅުވިއެވެ.
އޭނާ ވިދާޅުވީ އެ ހޯދި ކާމިޔާބީގެ މައްޗަށް ހަސަދަ ލައިގެން ދެންވެސް އެމްޑީޕީއަށް ހޯދޭނެ ކާމިޔާބިއެއް ނޯންނާނެކަމަށެވެ. އެހެންކަމުން އެމްޑީޕީ ލީޑާޝިޕުން އެކަމަށް ވިސްނުމެއް އެދިވަޑައިގަތެވެ.
މިއީ ސިއްރުން ސިއްރިޔާތުގަ އެތާ ތިބެގެން ކުރިކަމެއްނޫން. އެޕާޓީ އެއް ފަރާތްކޮށް، ދަ ޑިމޮކްރެޓްސް އުފަންކޮށްފަ ސީދާ އެވެރިކަން ބަދަލުކުރަން އަޅުގަނޑުމެން ނިކުތީ. އެކަން ކުރިން އަޅުގަނޑުމެން. ކީއްތޯ ކުރާނީ؟ އޭގެ މައްޗަށް ރުޅިގަދަވެގެން މާދަމާއެއް ނުލިބޭނެ އަނެއްކާވެސް. ތަކުރާރުކޮށް މިދަންނަވަނީ މާދަމާއެއް ނުލިބޭނެ.
– މުޙައްމަދު ޝިފާޒް ވިދާޅުވިއެވެ.
ޝިފާޒް ވިދާޅުވީ ވެރިކަންތައް އަބަދު އެއްގޮތަކަށް ނޯންނާނެކަމަށެވެ. އެގޮތުން އެމްޑީޕީން ވެރިކަން ކޮށްފިކަމަށާއި، މަގުމަތީގައިވެސް އުޅެފިކަމަށެވެ. ހަމައެހެންމެ ޕީޕީއެމުންވެސް ވެރިކަންކޮށް މަގުމަތީ އުޅެފިކަމަށްވެސް ޝިފާޒް ވިދާޅުވިއެވެ. އޭނާ ވިދާޅުވީ މާޒީގައި ހިފައިގެން ހާސިލްވާނެ ކަމެއްވެސް ނޯންނާނެކަމަށެވެ. ވެރިކަންތައް ބައްޓަންކުރާނީ މާޒީއަށް ނޫންކަމަށާއި، ބައްޓަންކުރާނީ މާޒީގެ ތަޖުރިބާގެ އަލީގައިކަމަށެވެ.
ޑރ.މުއިއްޒުގެ ވެރިކަމަކީ ރައްޔިތުންނަށް އަނެއްކާވެސް އުއްމީދެއް ފެނިގެންދާނެ ދުވަސްތަކެއްކަމަށާއި، އެ އުއްމިދުގައި ރައްޔިތުން ތިބޭނެކަމަށެވެ.
މާޒީގެ ވެފައިވާ ކަންކަމަށް ވެރިކަން ބައްޓަން ނުކުރާނެ، އެ ތަޖުރިބާގެ އަލީގައި ވެރިކަން ބައްޓަން ކުރައްވާނީ. ސިޔާސި ޕާޓޠިން ހާސިލްކުރަމުންދާނީ ސިޔާސީ ކަންކަން.
– މުޙައްމަދު ޝިފާޒް ވިދާޅުވިއެވެ.
އޭނާ މިހެން ވިދާޅުވެފައި މިވަނީ، އެމްޑީޕީއަށް ރިޔާސީ އިންތިޚާބުން ލިބުނު ނާކާމިޔާބީއާއި ގުޅިގެން އެ ނާކާމިޔާބީއާ ކުރިމަތިލާންޖެހުނީ ޑިމޮކްރެޓްސްގެ ސަބަބުންކަމަށް އެމްޑީޕީގެ ލީޑާރޝިޕުން ތުހުމަތު ކުރަމުންދާތީއެވެ.
