ރާއްޖޭގެ ޑިމޮކްރަޓިކް ހަޔާތުގައި ތަސައްރަފް ފުދޭ ތަން ފެންނަމުންދާ ކަމަށް ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު މިއަދު ވިދާޅުވެއްޖެއެވެ.
އަހުމަދު އެގޮތަށް ވިދާޅުވެފައި ވަނީ "އިންތިޚާބީ ރައީސުލްޖުމްހޫރިއްޔާގެ އޮފީސް"، ރައީސް އިބްރާހިމް މުހައްމަދު ސޯލިހް ގާއިމުކުރެއްވުމާ ގުޅިގެންނެވެ.
އަހުމަދު އެކްސްގައި ކުރެއްވި ޕޯސްޓެއްގައި ވިދާޅުވީ ފެނިގެން މިދަނީ ރާއްޖެ އަށް ޑިމޮކްރެޓިކް ހަޔާތުގައި ތަސައްރަފް ފުރެމުން އަންނަ ތަން ކަމަށެވެ. ބާރުތައް ފުރޮޅާލުމުގައި ސުލްހަވެރިކަމާއި ގައުމުގެ މަސްލަހަތު އިސްކޮށް ރައްޔިތުންގެ ކިބައިން ބާރުތައް ފެށިގެން އަންނަ މަންޒަރު ފެންނަމުންދާ ކަމަށް އަހުމަދު ވިދާޅުވިއެވެ.
ފެނިގެން މިދަނީ ދިވެހިރާއްޖެގެ ޑިމޮކްރެޓިކް ހަޔާތުގައި ތަސައްރަފު ފުރެމުން އަންނަތަން. ބާރުތައް ފުރޮޅާލުމުގައި ސުލްހަވެރިކަމާއި ޤައުމުގެ މަސްލަހަތު އިސްކޮށް ރައްޔިތުންގެ ކިބައިން ބާރުތައް ފެށިގެން އަންނަ މަންޒަރު. 🫡 https://t.co/f6IMITPP1t
— Ahmed Mohamed (@ahumadhumohamed) October 5, 2023
މިދިޔަ ހޮނިހިރު ދުވަހު އޮތް ރިޔާސީ އިންތިހާބާ ގުޅިގެން، ވެރިކަން ބަދަލުވުމުގެ މަރުހަލާގައި އިންތިހާބީ ރައީސްގެ ހައިސިއްޔަތުން ކުރަންޖެހޭ ކަންތައްތައް ކުރުމަށް ޓަކައި "އިންތިހާބީ ރައީސުލްޖުމްހޫރިއްޔާގެ އޮފީސް"، ރައީސް މުހައްމަދު ސޯލިހް ގާއިމް ކުރެއްވީ އިއްޔެއެވެ.
ރިޔާސީ އިންތިހާބު ކާމިޔާބު ކުރެއްވި އިންތިހާބީ ރައީސް ޑރ. މުހައްމަދު މުއިއްޒުގެ ފަރާތްޕުޅުން ޑިރެކްޓަރ ޖެނެރަލް އޮފް ޓްރާންސިޝަންގެ މަގާމަށް ހަމަޖައްސާފައި ވަނީ ޕީއެންސީގެ ޗެއާޕާސަން އަބްދުއްރަހީމް އަބްދުﷲ އެވެ. މިއީ ވެރިކަން ބަދަލުވުމުގެ މަރުޙަލާގެ ކަންކަން ވިލަރެސްކުރެއްވުމުގައި އެންމެ އިސްކޮށް ހުންނަވާ ފަރާތެވެ. އެ މަރުހަލާގެ ކަންކަން ވިލަރެސްކުރެއްވުމަށް ރައީސްގެ ފަރާތުން ހަމަޖައްސަވައިފައި ވަނީ، ސެކްރެޓެރީ، ކޯޕަރޭޓް ސަރވިސް، ހުސައިން އާމިރެވެ.
