މުދައްރިސުންގެ ދުވަހުގެ ޙަރަކާތްތައް ސްކޫލްތަކުގައި ފަށައިފިއެވެ. މި ދުވަހުގެ ޙަރަކާތްތައް ސްކޫލްތަކުން ކުރިއަށްގެންދަނީ އެކި ދުވަސްތަކަށް ބަހާލައިގެންނެވެ.
ޓީޒަރުންގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ އޮކްޓޯބަރު މަހުގެ 5ވަނަ ދުވަހެވެ. މި ދުވަސް ފާހަގަކުރަނީ ޓީޗަރުންގެ އަގު ވަޒަންކޮށް، ޓީޗަރުން ކުރާ ބުރަ މަސައްކަތްތައް ބަލައިގަންނަކަން ހާމަކޮށްދިނުމުގެ ގޮތުންނެވެ. މިއަހަރުގެ އޮކްޓޯބަރު 5ވަނަ ދުވަސް ދިމާވަނީ ހަފްތާގެ އެންމެ ފަހު ބުރާސްފައްޗަށެވެ. ދުވަހާއި ގުޅިގެން ސްކޫލުތަކުގައި ދަނީ ޚާއްސަ ހަރަކާތްތައް ކުރިއަށް ގެންދަމުންނެވެ.
މީގެތެރޭގައި ޓީޗަރުންގެ ދުވަހުގެ ޚާއްސަ އެސެމްބްލީ ބޭއްވުމާއި، ދަރިވަރުންނާއި ޓީޗަރުން އެކުގައި ކުޅިވަރު ހަރަކާތްތައް ކުރިއަށްގެންދިއުމާއި، މުދައްރިސުންގެ މެދުގައި މުބާރާތްތައް ވަނީ ބާއްވާފައެވެ.
ދުވަހާއި ގުޅިގެން ސްކޫލް ދަރިވަރުންވަނީ އެ ދަރިވަރުންގެ ޝުޢޫރުތައް ފާޅުކޮށްފައެވެ. އެގޮތުން އެކުދިންނަށް ޓީޗަރުންގެ ފަރާތުން ލިބޭ އެހީއާއި، އެކުދިން ތަރުބިއްޔަތު ވަމުން އަންނަ އައުމާއި، އަދި އުންގެނުމުގައި ޓީޗަރުންގެ ފަރާތުން ލިބޭ އެހީއަށް ދަރިވަރުންވަނީ ޝުކުރު ޢަދާކުރައްވާފައެވެ.
ޓީޗަރުންގެ ދުވަހުގެ ހަރަކާތްތައް ބައެއް ސްކޫލްތަކުގައި މިހާރު ފަށާފައިވީ ނަމަވެސް ހަފްތާ ބަންދަށްވެސް ބައެއް ސްކޫލުތަކުން އެކި ހަރަކާތްތައް ވަނީ ރާވާފައެވެ. މުދައްރިސުންނަކީ ޤައުމު ބިނާކޮށް ޤައުމުގެ ކުރިމަގު އުޖާލާ ކުރުމަށް ތަރުބިއްޔަތު ކުރެވޭ ދަރިންނަށް ރަނގަޅު ފިލާވަޅުތަކާއި ނަމޫނާ ދައްކަވާ އެންމެ ޒިންމާދާރު އެއް ފަރާތެވެ. އަދި ޓީޗަރުންނަކީ ޤައުމުގެ މިސްރާބު ހެޔޮ ގޮތުގައި ކުރިއަށް ގެންދިއުމުގެ އެންމެ ބޮޑު ޒިންމާވެސް އުފުލާ ފަރާތެވެ.
