އިންތިހާބީ ރައީސް ޑރ. މުހައްމަދު މުއިއްޒާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ބައްދަލު ކުރައްވާ ގޮތަށް ހަމަޖެހިއްޖެއެވެ.
މި ބައްދަލު ކުރެއްވުން ބޭއްވުމަށް ހަމަޖެހިފައި ވަނީ މިއަދު 11:00 ގައި މަޖިލިހުގެ އިދާރާގައެވެ. ދެ ބޭފުޅުންގެ ބައްދަލުވުމެއް އޮންނަ ކަން އިއުލާން ކުރެއްވީ މިއަދު އޮތް ރައްޔިތުންގެ މަޖިލިހުގެ ޖަލްސާގައި ރިޔާސަތުގައި އިންނެވި ނަޝީދެވެ.
"މިއަދު 11 ޖަހާއިރުގައި އިންތިހާބީ ރައީސް ޑރ. މުއިއްޒު އެބަ ވަޑައިގަންނަވާ މަޖިލީހަށް. އަޅުގަނޑު ގަސްތު ކުރަނީ އެހެންވީމާ އަޅުގަނޑުމެން ސައިގެ ފަހުން ބައްދަލުވާއިރުގައި 11:20 ގައި ނުވަތަ 11:30 ގައި އަޅުގަނޑުމެން ޖަލްސާ ފަށަން،" ޖަލްސާ ސައިގެ ވަގުތަށް މެދުކަނޑާލުމުގެ ކުރިން ނަޝީދު ވިދާޅުވިއެވެ.
މުއިއްޒު މިއަދު މަޖިލީހުގެ ރައީސް ނަޝީދާ ބައްދަލު ކުރައްވާއިރު ސަރުކާރު ބަދަލުވުމުގެ މަރުހަލާ ކުރިއަށް ގެންދިޔުމަށް ކޮމެޓީތައް އެކުލަވާލައި، އެ މަސައްކަތް ވަނީ ފަށައިފައެވެ. މުއިއްޒު އެކުލަވާލެއްވި އިންތިގާލީ ކޮމެޓީގެ ވެރިޔަކަށް ހަމަޖެއްސީ ޕީއެންސީގެ ރައީސް އަބްދުއްރަހީމް އަބްދުﷲ އެވެ.
ވެރިކަން ބަދަލުކުރުމުގެ މަރުހަލާއަށް ސަރުކާރުގެ ފަރާތުން އެކުލަވާލި ކޮމެޓީގެ ވެރިޔަކަށް ހަމަޖެއްސީ ރައީސް އޮފީހުގެ ސެކްރެޓެރީ، ކޯޕަރޭޓް ސާވިސް ހުސައިން އާމިރެވެ. އަދި ވެރިކަން ބަދަލު ކުރުމުގެ މަރުހަލާގެ ކަންކަން ރައީސް އޮފީހުގެ ފަރާތުން ވިލަރެސް ކުރައްވާނީ ޗީފް އޮފް ސްޓާފް އަލީ ޒާހިރެވެ.
