މިއަދުގެ ރިޔާސީ އިންތިޚާބުގެ ދެވަނަ ބުރުގެ ނަތީޖާއިން ބަލިވާނެކަން ޔަގީންވާތީ އެމްޑީޕީން ދަނީ ހަމަނުޖެހުން ހިންގުމަށް މަސައްކަތް ކުރަމުން ކަމަށާއި، ފުލުހުން މިކަމަށް ސަމާލުވުމަށް ނައިފަރު ދާއިރާގެ މެމްބަރު އަދި ޕީޕީއެމްގެ ނައިބް ރައީސް އަހުމަދު ޝިޔާމް ފުލުހުންނަށް ގޮވާލައިފިއެވެ.
ޝިޔާމް ވަނީ މިމަހުގެ 27 ވަނަ ދުވަހު މިކަމުގެ އިޝާރާތެއް ކުރައްވައި ޓުވީޓެއް ކުރައްވާފައެވެ. އެދުވަހު ޝިޔާމް ވިދާޅުވީ މިނޫނީ އިންތިޚާބުގެ ކުރިން ބަލިވާނެކަން ޔަޤީންވި އިންތިޚާބެއް ނުބޭއްވޭ ކަމަށެވެ. އަދި ރައީސް ޞޯލިހު ކޭންޕުން ބަލިވެއްޖެކަން ޔަޤީންކޮށް މިހާރު ރާވަމުންދަނީ ތަންތަނުގައި ހުޅުޖަހާ ހަމަނުޖެހުން ހިންގަން މަސައްކަތް ކުރަމުން ކަމަށެވެ. މީ 'އުފާވެރި އަމާންރާއްޖެ' ސްލޯގަން އަކަށް ހަދައިގެން ކެންޕެއިންކުރާ މީހުން ކުރަންރާވާ ކަންތައްކަމަށް ޝިޔާމް ވަނީ ވިދާޅުވެފައެވެ.
މި ޓުވީޓު ޓެގްކޮށް ޝިޔާމް މިއަދު ވިދާޅުވީ އެދުވަހު ދެއްކީ ޔޯލަ ވާހަކަތަކެއް ނޫންކަމަށާއި، އިންތިޚާބުން ބަލިވާނެކަން ޔަގީންވާތީ ހަމަނެޖެހުން ހިންގުމަށް އެމްޑީޕީން މަސައްކަތް ކުރަމުން ދާކަމަށެވެ. މިކަން ހުއްޓުވައި އަޅަންޖެހޭ ފިޔަވަޅު ދުރާލައި އެޅުމަށް ޝިޔާމް ވަނީ ފުލުހުންނަށް ގޮވާލާފައެވެ.
މީ ޔޯލަޔަކަށް ދަންނަވާ ވާހަކައެއްނޫން. މިކަންކުރަން އޮތީ ރައީސް ސޯލިހުގެ ކޭންޕުން ގަދަޔަށް ރާވާފައި. އަދި މިހާރު ދަނީ ތައްޔާރީތައް ވަރުގަދަ ކުރަމުން ކަމަށް ވަރަށް މުހުތަބަރުކޮށް މައުލޫމާތު ލިބޭ. މިކަން ކުރަން ނިންމާފައި އޮތީ މާލެ ސިޓީގައި ކަމަށް ވަނީ. ފުލުހުން މިކަން ހުއްޓުވާ.
– ޝިޔާމް ވިދާޅުވިއެވެ.
މިއަދުުގެ އިންތިޚާބު ކުރިއަށްދާއިރު ކޮންމެވެސް ވަރެއްގެ ހަމަނުޖެހުންތަކާއި ދެބަސްވުންތައް ދަނީ ފެންނަމުންނެވެ. އަދި މަޖިލީހުގެ އެމްޑީޕީގެ ދެ މެމްބަރަކަށްވެެސް ވަނީ ހަމަލާ ދީފައެވެ. އިންތިޚާބުގެ ވޯޓުލުން ނިމެނޭނީ މިއަދު ހަވީރު 5 ޖެހުމާއި ހަމައަށެވެ. ފުލުހުން ގެންދަނީ އިންތިޚާބާއި ގުޅިގެން ޚާއްސަ މަސައްކަތްތަކެއް ކުރައްވައި، އެލާޓް ލެވެލް އެންމެ މައްޗަށް ޖައްސައިގެން މަސައްކަތް ކުރަމުންނެވެ.
