އެމެރިކާގެ ސެކެޓްރީ އޮފް ޑިފެންސްގެ މަގާމަށް، ކަޅު ނަސްލުގެ، ހަތަރު ތަރީގެ، އާރމީ ޖެނެރަލެއް ކަމުގައި ވާ ލޯއިޑް އޯސްޓިން އައްޔަން ކުރަން، އެގައުމުގެ އިންތިޚާބީ ރައީސް ޖޯ ބައިޑްން ނިންމަވާފައިވާ ކަމަށް މީޑިއާ ރިޕޯޓްތައް ބުނަން ފަށައިފިއެވެ.
އޯއިސްޓަން މިމަގާމަށް އައްޔަން ކުރުމަށް ބައިޑްން ނިންމަވާފައިވަނީ، އޯއިސްޓަންއާއި ބައިޑްންއާއި ދެމެދު އޮތް ޒަމާންވީ އެކުވެރި ރަހުމަތްތެރި ގުޅުމުގެ ނަތީޖާއެއްގެ ގޮތުންކަމަށް ބައިޑްގެ އަރިސް ބޭފުޅުން ވިދާޅުވާކަމަށްވެސް ރިޕޯޓުތައް ބުނެއެވެ.
އޮއިސްޓަން ވަނީ، އޮބާމާގެ ފުރަތަމަ ދައުރުގައި، އޭރު އިރާގުގައި ހަރަކާތްތެރިވަމުން އައި އެމެރިކާއާއި އަދި ކޯލިޝަން ސިފައިންގެ އެންމެ އިސް ކޮމާންޑަރުގެ މަގާމް އަދާކޮށްފައެވެ.
އެމެރިކާގެ ސެނެޓުން އޯއިސްޓަންގެ ނަން ފާސްކޮށްފިނަމަ، އޭނާ ވެގެންދާނީ، އެމެރިކާގެ ދިފާޢީ އިދާރާ، ޕެންޓަގަންގެ އެންމެ އިސްވެރިޔާގެ މަގާމް އަދާކުރައްވާ، އެމެރިކާގެ ކަޅު ނަސްލަށް ނިސްބަތްވާ އެންމެ ފުރަތަމަ މީހާ ކަމުގައެވެ. ބައިޑްން ރަސްމީކޮށް އޭނާގެ ނަން މިހަފްތާގެ ފަހުކޮޅު އިއުލާން ކުރައްވާނެ ކަމަށްވެއެވެ.
އޯއިސްޓަން ޑިފެންސް ސެކެޓްރީކަމަށް އައްޔަން ކުރުމަށް ބައިޑްން ނިންމަވާފައި މިވަނީ، މިގަމާމަށް ޕެންޓަގަންގެ ކުރީގެ ސީނިއަރ އޮފިޝަލެއްކަމުގައިވާ، މައިކަލް ފްލޯނޯއި އައްޔަން ކުރައްވާނެ ކަމަށް ވަރަށް ބޮޑަށް ބެލެވިފައި ވަނިކޮށެވެ. ބިލް ކްލިންޓަންއާއި އަދި އޮބާމާގެ ދައުރުގައިވެސް، ޕެންޓަގަންގެ އިސްމަގާމްތަކެއް އަދާ ކުރައްވާފައިވާ މައިކަލް ފްލޯނޯއިއަކީ، 2016 ވަނަ އަހަރު ހިލަރީ ކުލިންޓަން އިންތިޚާބު ކާމިޔާބު ކުރެއްވިނަމަ، ސެކެޓްރީ އޮފް ސްޓޭޓުގެ މަގާމަށް އައުމަށް ހަމަޖެހިފައިވާ ބޭފުޅާއެވެ.
ކެރިއަރ މިލިޓަރީ އޮފިސްރެއް ކަމުގައިވާ، އުމުރުން 67 އަހަރުގެ އޯއިސްޓަން ސެކްޓރީ އޮފް ޑިފެންސްގެ މަގާމަށް އައްޔަން ކުރުމަށް އެމެރިކާގެ ކޮންގެރެސްގެ ބައެއް މެމްބަރުން ދެކޮޅު ހައްދަވާނެކަމަށް ބެލެވެއެވެ. އަދި އޭނާ މިމަގާމަށް އައްޔަން ކުރުމަށް އެމެރިކާގެ ޑިފެންސް ފޯސްގެ ތެރެއިންވެސް ހުރަސްތަކެއް ކުރިމަތިވާނެ ކަމަށް ބެލެވެއެވެ.
އޯއިސްޓަން ގަބޫކުރައްވާ ގޮތުގައި، އެމެރިކާގެ ދިފާއީ އިދާރާ، ޕެންޓަގަންގެ ލީޑަރޝީޕްގައި ތިއްބަވާ ބޭފުޅުގެ ތެރެއިން މިލިޓަރީ މީހުންނާއި ސިވިލް މީހުން (މިލިޓްރީގެތެރެއިން ތަމްރީން ވެގެން ނޫންގޮތުން އިސްމަގާމްތަކަށް ވަޑައިގެން ތިއްބެވި ބޭފުޅުން) ސާފުކޮށް ވަކިވާނެގޮތަށް ތަރުތީބު ކުރެވެން ޖެހެއެވެ.
އެމެރިކާގެ ފާއިތުވީ ޑިފެންސް ސެކެޓްރީންގެ ތެރެއިން ގިނައީ ކުޑަ ދުވަސްކޮޅަކު އެގައުމުގެ މިލިޓަރީގައި މަސައްކަތް ކުރައްވާފައިވާ ބޭފުޅުންނެވެ. ކެރިއަރ މިލިޓަރީ އޮފިސަރުން (މިލިޓަރީގައި ޚިދުމަތުގެ ބޮޑުބައި ހޭދަ ކުރައްވާފައިވާ ބޭފުޅުން)ގެ ގޮތުގައި ޑީފެންސް ސެކެޓްރީ ކަމަށް ވަޑައިގެންފައި ވަނީ މިހާތަނަށް އެންމެ ދެބޭފުޅެކެވެ. އެއީ ޖޯޖް ސީ މާޝަލްއާއި ޖޭމްސް މެޓިސްއެވެ. މިދެބޭފުޅުންގެ ތެރެއިން މާޝަލް ވަނީ އެމެރިކާގެ ސެކެޓްރީ އޮފް ސްޓޭޓްގެ މަގާމްވެސް އަދާ ކުރައްވާފައެވެ.
އެމެރިކާގެ ވެސްޓް ޕޮއިންޓްގެ މިލިޓަރީ އެކަޑަމީން އޯއިސްޓަން ގްރޭޖުއޭޓް ވެވަޑައިގަތީ 1975ގައެވެ. އޭނާވަނީ މެދު ނުކެޑި އެމެރިކާގެ މިލިޓަރީގައި 41 އަހަރު ޚިދުމަތް ކުރައްވާފައެވެ.
