އެއްބަސްވުންތައް ސިއްރު ކުރުމުން، ވޯޓާއި ޖެހުނުއިރުވެސް މިއޮތީ ސަލާމަތްނުވެފަ: ހަސަން

ދިވެހި ސަރުކާރާއި އިންޑިއާ ސަރުކާރާއި ދެމެދު ހަދާފައިވާ އެއްބަސްވުންތަސް ހާމަކޮށް އެކަންކަމުގެ މައުލޫމާތު ދިވެހި ރައްޔިތުންނާއި ހިއްސާ ކުރުމަށް ވެރިކަމުގެ ފަސް އަހަރުގެ ތެރޭގައި ލިބުނު ފުރުސަތުތަކުގެ ބޭނުން ހިފިނަމަ ވޯޓުލާން 5 ދުވަހަށް ވުމުން މިވާހަކުން ސަލާމަތްނުވެ އުޅެން ނުޖެހުނީސް ކަމުގައި ދަ ޑިމޮކްރެޓްސްގެ އިންޓަރިމް ކައުންސިލްގެ ޗެއާ ހަސަން ލަތީފް ވިދާޅުވެއްޖެއެވެ.

ހަސަން ވަނީ މީގެ ދެ އަހަރު ކުރިން ހަސަން ވަނީ އިންޑިއާއާއި ދެމެދު ސަރުކާރުން ވެފައިވާ ރައްޔިތުންގެ ކަންބޮޑުވުންތައް އޮތް އެގްރީމަންޓްތައް މަޖިލީހުގެ 241 ކޮމެޓީއާއި ހިއްސާ ކުރުމަކީ އެންމެ ރަނގަޅު ގޮތްކަމަށް ބުނެފައެވެ. ނަމަވެސް އެކަން މިއަދާއި ހަމަައަށްވެސް ނުވެ ވެރިކަމުގެ ދެވަނަ ދައުރަކަށް ރައީސް ޞާލިހު ކުރިމަތި ލައްވާފައިވާއިރު ކުރިމަތިވެފައިވާ އެންމެ ބޮޑު ގޮންޖެހުމަކީ މިއެއްބަސްވުންތަކާއި، މިނިވަން ކަމާއި ގުޅޭ ގޮތުން އުފެދިފައިވާ ސުވާލުތަކެވެ.

މިއަދު ސަރުކާރަށް އެންމެ ބޮޑަށް ޑިފެންސަށް ފައިބާ މިކަމުގެ ދިފާއުގައި ކުރަމުންދާ މަސައްކަތްތަކާއި ގުޅޭގޮތުން ހަސަން ވިދާޅުވީ އެދުވަހު މަޖިލީހަށް މިމައުލޫމާތު ހިއްސާ ކުރިނަމަ، މިއަދު އިންތިޚަބަށް ފަސް ދުވަހަށް ވުމުން މިކަމުން ސަލާމަތް ނުވެގެން އުޅެން ނުޖެހުނީސް ކަމަށެވެ.

ގައިމު އެދުވަހު މިކަންކަން ސަރުކާރުން ރައްޔިތުންނަށް ސާފުކޮށް ދެވުނު ނަމަ، ވޯޓުލާން 5 ދުވަހަށް ވީމާ މިއަދަކު އުތުރު ތިލަފަޅޭ، އިންޑިއާއޭ ގޯއްޗޭ ވިދާޅުވެ ރައްޔިތުންނަށް ގަބޫލުނުކުރެވޭ ޒާތުގެ ވާހަކަ ދައްކާކަށް އުޅުއްވާކަށް ނުޖެހުނީސް ދެއްތޯ.

– ހަސަން ވިދާޅުވިއެވެ.

މިމައްސަލާގައި މީގެ ދެ އަހަރު ކުރިން ހަސަންއަށް ފާޑުވިދާޅުވެ ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވީ އެމްއެންޑީއެފުން މިއެއްބަސްވުނަރައް 241 ކޮމެޓީގައި ހިއްސާ ކުރެއްވިއިރު ހަސަން މިފަދަ ގޮތަކަށް ޓުވީޓު ކުރައްވަން ޖެހޭ ސަބަބެއް ނުވިސްނޭކަމަށެވެ. އަދި ޑިފެންސް އެގްރީމަންޓް ތަކަކީ އެއްވެސް ހާލެއްގައި އާންމު ރައްޔިތުންނާއި ހިއްސާ ކުރާ މައުލޫމާތުތަކެއް ނޫންކަމަށްވެސް އޭނާ ވިދާޅުވިއެވެ.

މެމްބަރު ހަސަންވެސް އިންނަވާ 241 ކޮމެޓީއަށް އެމްއެންޑީއެފް ހާޒިރުވެ ޔޫޓީއެފް އެއްބަސްވުން ބޮޑު ސްކްރީންއަށް އަޅުވައިގެން ކިޔާނެވަރަކަށް ކިޔަން ދެއްވިކަމަށް ނައިބް މުގައްރިރު ހުސެއިން ޝަހީމް ވިދާޅުވި. ޑިފެންސް އެގްރީމަންޓްތަކަކީ އެއްވެސް ޤައުމެއްގައި އާންމުންނަށް ދޫކޮށްލާ ލިޔުމެއްނޫންތޯ. ކޮބައިތޯ އިންޓެންޝަނަކީ؟

– އިކްރާމް ސުވާލު ކުރެއްވިއެވެ.

އިކްރާމްގެ އިތުރުން ދުވާފަރު ދާއިރާގެ މެމްބަރު އިސްމާޢީލް އަޙްމަދު ވިދާޅުވީ ހަސަން 241 ކޮމެޓީގައި އިންނަވައި ޒިންމާ އަދާނުކޮށް، ސޯޝަލް މީޑިއާގައި މިފަދަ ވާހަކަތަކެއް ދެއްކުމަކީ ލަދުވެތިކަމެއްކަމަށެވެ. އެގްރީމަންޓްތަކައިމެދު ސުވާލު އުފެދޭނަމަ ހަސަން އަމިއްލަފުޅަށް އަދާކުރައްވަންޖެހޭ ޤާނޫނީ ޒިންމާ އަދާކުރެއްވުމަށް އޭނާ ވަނީ ހަސަންއަށް ގޮވާލާފައެވެ.

241 ކޮމެޓީގައި އިންނަވާ، އެގެ އަސްލު ޤާނޫނީ ޒިންމާ އަދާ ކުރެއްވުމުގެ ބަދަލުގައި ސޯޝަލް މިޑިއާގައި މިވާހަކަ ދެއްކުމަކީ ލަދުވެތިކަމެއް. ސުވާލު އުފެދޭނަމަ ހަވާލުވެ ހުންނެވި ޤާނޫނީ ޒިންމާ އަދާ ކުރުމަށް ހަނދުމަކޮށް އަރުވަން.

– އިސްމާޢީލް އަޙްމަދު ވިދާޅުވިއެވެ.

އެއްބަސްވުންތައް ހާމަކުރަން ގޮވާލުމުން އެމްޑީޕީގެ ބައެއް މެމްބަރުންގެ ނުރުހުން!

އިދިކޮޅު ކޯލިޝަނުން ރާއްޖޭގެ އެކި ކަންކޮޅުތަކުގައި ކުރަމުންދާ މުޒާހަރާތަކާއި އެއްވުންތަކުގެ މައުލޫމާތު ބައިނަލް އަގުވާމީ ފަރާތްތަކުގެ ސަމާލުކަމަށް އައިސް އެވާހަތައް ދައްކަމުންދާއިރު ސަރުކާރުން އޮތީ ހަމަހިމޭނުންނެވެ. އިންޑިއާއާއިއެކު ދިވެހި ސަރުކާރުން ވެފައިވާ އެއްބަސްވުންތައް ހާމަކުރުމަށް ގޮވާލައި ހަސަން ލަތީފް ވިދާޅުވީ ރައްޔިތުންގެ ހިތުގައި ޝައްކު އުފެދޭ ހުރިހާ އެއްބަސްވުނަތަކެއް ހާމަކޮށް، އެއްބަސްވުންތަކުގައި ހުރި ކަންކަން ދިވެހި ރައްޔިތުންނަށް ހާމަކޮށް ދިނުމަކީ ސަރުކާރުގެ ޒިންމާއެއްކަމަށެވެ.

އެއްވެސް އެއްބަސްވުމެއް ފޮރުވައިގެން ސިއްރުކުރަން ނޫޅޭކަމާއި، އަދި އިންޑިއާއާއިން ހޯދަމުންދަނީ ކޮން ބާވަތްތަކުގެ އެހީތަކެއްކަމެއް ދިވެހި ރައްޔިތުންނަށް ހާމަކޮށްދޭންޖެހޭ ކަމަށްވެސް ހަސަން ވިދާޅުވިއެވެ. މިއީ ވެރިކަން ކުރާ ކޯލިޝަން އަދި އެމްޑީޕީގެ އިސްބޭފުޅަކު މިހާ ފާޅުކަން ބޮޑުކޮށް އެއްބަސްވުންތައް ހާމަކުރުމަށް ސަރުކާރަށް ގޮވާލި ފުރަތަމަ ފަހަރެވެ.

އުުތުރު ތިލަފަޅު އެއްބަސްވުމުގައިވާ ކަންކަމުގެ މައުލޫމާތު ސަރުކާރުން ރައްޔިތުންނަށް ސާފުކޮށް ދިނުމަކީ ބޭނުންތެރިކަމެއް. ފޮރުވައިގެން ސިއްރު ކަންކަން ކުރަން ނޫޅޭކަމާއި، އިންޑިއާގެ އެހީތެރިކަން ސަރުކާރުން ހޯދާ ގޮތްތަކުގެ މައުލޫމާތު ރައްޔިތުންނަށް ސާފު ކޮށްދިނުމަކީ ބޭނުންތެރިކަމެއް.

– މީގެ ދެ އަހަރު ކުރިން ހަސަން ވިދާޅުވިއެވެ.

ވެރިކަމުގެ ދެވަނަ ދައުރަކަށް ރައީސް ޞާލިހު ކުރިމަތިލެއްވިއިރު، އެމަނިކުފާނަށް އަމިއްލަ ކޯލިޝަން ތެރެއިންނާއި ބޭރުންވެސް އެންމެ ބޮޑު ގޮންޖެހުމަކަށްވީ މިނިވަން ކަމުގެ ސުވާލުތަކެވެ. އެސުވާލުތަކަށް ޖަވާބު ދިނުމުގައި ސަރުކާރަށް މާބޮޑު ކުރިއެރުންތަކެއް ހޯދޭ ތަނެއް ނުފެނެއެވެ.