ދަ ޑިމޮކްރެޓްސްގެ އެތެރޭގެ އިންތިޚާބު ޑިސެމްބަރު 2ގައި ބާއްވަން އެޕާޓިގެ ވަގުތީ ކައުންސިލުން ނިންމައިފިއެވެ.
އެޕާޓިގެ ކައުންސިލް މެންބަރު ޙުސައިން އަމްރު ވިދާޅުވީ، ދަ ޑިމޮކްރެޓްސް ގެ އިންޓަރިމް ކައުންސިލުން މިއަދު ވަނީ ޕާޓީގެ އެތެރޭގެ އިންތިޚާބު 2 ޑިސެމްބަރުގަ ބާއްވަން ނިންމާފައިކަމަށެވެ. އިންތިޚާބު އިއުލާން ކުރުމުން ޕާޓީގެ ރައީސް ކަމަށް ކުރިމަތިލާން ނިންމާފައިވާކަމަށްވެސް އަމްރު ވިދާޅުވިއެވެ.
މިކަމުގަ އެންމެހާ ޑިމޮކްރެޓުންގެ އެއްބާރުލުމާ ތާއީދު ދެއްވުން އެދި ދަންނަވަން.
– އަމްރު ވިދާޅުވިއެވެ.
ދަ ޑިމޮކްރެޓްްސްއަކީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީގެ ރައީސް މުޙައްމަދު ނަޝީދު އިސްވެ އުފެއްދެވި ސިޔާސީ ޕާޓީއެކެވެ. އެޕާޓީ އުފެދުނީ އެމްޑީޕީގެ ރިޔާސީ ޕްރައިމަރީއަށްފަހު، އެތެރޭގައި އުފެދުނު ޚިޔާލު ތަފާތުވުމުގެ ތެރެއިން ރައްޔިތުންގެ މަޖިލީހުގެ އެމްޑީޕީގެ މަޖިލިސް ބައެއް މެންބަރުން އިސްވެ ތިއްބަވައިގެންނެވެ.
ދަ ޑިމޮކްރެޓްސްއިން ވަނީ އެޕާޓި އުފެދުނުތާ ދެތިން މަސް ދުވަހުގެ ތެރޭގައި މިފަހަރުގެ ރިޔާސީ އިންތިޚާބުގައި ވާދަކޮށްފައެވެ. އެޕާޓިއަށް އިންތިޚާބުން 15 ހާހަށްވުރެ ގިނަ ވޯޓާއެކު ތިންވަނަ ލިބުނެވެ.
ދަ ޑިމޮކްރެޓްސްގެ ރައީސްކަމަށް ވާދަކުރައްވާނެކަމަށް އަމްރު ވިދާޅުވެފައިވާއިރު، އަމްރަކީ އެޕާޓިގެ ރިޔާސީ ކެންޑިޑޭޓުގެ ރަނިންމޭޓެވެ.
އެޕާޓިން އަދި އަމްރުވެސް ވިދާޅުވެފައިވަނީ ޕާޓީގެ ޅަފަތުގައި އިންތިޚާބުން ލިބިވަޑައިގަތީ ބޮޑު ކާމިޔާބީއެއްކަމަށެވެ. ރިޔާސީ އިންތިޚާބުގެ ދެވަނަ ބުރުގައި އެޕާޓީން ވަނީ އެއްވެސް ކެންޑިޑޭޓަކަށް ތާޢީދު ނުކުރުމަށް ނިންމާފައެވެ.
