ސިވިލް ކޯޓު ހިންގުން ވަގުތީގޮތުން އެ ކޯޓުގެ ގާޒީ ފަރުހާދު ރަޝީދުއާ ހަވާލުކޮށްފިއެވެ.
ޖޭއެސްސީ އިން ބުނީ ސިވިލް ކޯޓުގެ އިސް ގާޒީގެ ޒިންމާ ވަގުތީ ގޮތުން އިއްޔެ އިން ފެށިގެން ފަރުހާދުއާ ހަވާލުކޮށްފައިވާ ކަމަށެވެ.
ސިވިލް ކޯޓު ހިންގުން ފަރުހާދުއާ ހަވާލުކޮށްފައި މިވަނީ އެ ކޯޓުގެ އިސް ގާޒީގެ މަގާމުގައި ހުންނެވި ގއ. މާމެންދޫ, ފެހިގެ، އަހްމަދު ނިމާލް (36 އ) އަންގާރަ ދުވަހުގެ ރޭ ކުއްލި ގޮތަކަށް އަވަހާރަވުމާ ގުޅިގެންނެވެ.
ސިވިލް ކޯޓުގެ ފަނޑިޔާރުކަމަށް ނިމާލު އައްޔަނުކޮށްފައި ވަނީ މާޗު 2022 ގަ އެވެ. އަދި, އެ ކޯޓުގެ އިސް ފަނޑިޔާރު ކަމުގެ މަސްއޫލިއްޔަތުތައް އޭނާއާ ހަވާލުކޮށްފައި ވަނީ އޮގަސްޓު 22, 2022 ގައެވެ.
ނިމާލް އަވަހާރަވީ ހާޓް އެޓޭކެއް ޖެހިގެން އައިޖީއެމްއެޗަށް ގެންގޮސް ފަރުވާ ދެމުން ދަނިކޮށް ކަމަށް އެނގިފައިވެއެވެ. ނިމާލް އަވަހާރަވިއިރު، އަންބަކާއި ކުޑަ ދަރިފުޅެއް އެބަ ތިއްބެވެ.
