އެމަނިކުފާނު އެމްޑީޕީއާއި ގުޅިވަޑައިގެންނެވިކަމަށް ދެކެވޭ ވާހަކަތަކީ ދޮގެއްކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރިޔާސީ އިންތިޚަބުގެ ފުރަތަމަ ބުރުން އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙަށް ލިބިވަޑައިގެންނެވި ދަށް ނަތީޖާއާއެކު ރިޔާސީ އިންތިޚަބުގެ ދެވަނަ ބުރު ކާމިޔާބުކުރުމަށް ރައީސް ނަޝިދު އިސްވެ ހުންންނެވި ދަ ޑިމޮކްރެޓްސްގެ ވޯޓު ރައީސް ޞާލިޙަށް މުހިންމެވެ. އެއީ ރައިސް ޞާލިޙައި، އިންތިޚާބުން އެންމެ ގިނަ ވޯޓު ހޯދެވި ޑރ.މުހައްމަދު މުޢިއްޒުގެ ވޯޓުގެ ފަރަޤު ފަނަރަ ހާހަށް އަރައެވެ.
މިއާއެކު އެމްޑީޕީގެ ގިނަ މެންބަރުން ދަނީ އެމްޑީޕީއާ ރައީސް ނަޝީދު ގުޅިވަޑައިގަތުމަށް އެދެމުންނެވެ. އަދި ރައީސް ޞާލިޙާއި ރައީސް ނަޝީދާއެކު މަސައްކަތްކުރުމަށް އެމްޑީޕީ މެންބަރުން ގޮވާލަމުން ދިޔަނަމަވެސް ޑިމޮކްރެޓުން އަންނަނީ ފާޅުގައި އެކަމަށް ދެކޮޅު ހަދަމުންނެވެ.
އަދި އެމްޑީޕީގެ ބައެއް މެންބަރުން ވަނީ ރައީސް ނަޝީދު އެޕާޓީއާއި ގުޅިވަޑައިގެންފައިވާކަމަށްވެސް ބުނެފައެވެ. ނަމަވެސް ރައީސް ނަޝީދު ވަނީ އެކަން ދޮގުކުރައްވާފައެވެ. ވިދާޅުވީ އެމްޑީޕީއާއި ގުޅިވަޑައިނުގަންނަވާކަމަށެވެ. އެއީ ކަނޑައެޅިގެން ދޮގެއްކަމަށް ނަޝީދު ވިދާޅުވިއެވެ.
ރިޔާސީ އިންތިޚާބުގެ ދެވަނަ ބުރަށް އެމްޑީޕިއާއި ޑިމޮކްރެޓުން މަޝްވަރާކުރިނަމަވެސް އެކަމުގައި ކުރިއެރުމެއް އަދި ލިބިފައެއް ނުވެއެވެ. ރައީސް ނަޝިދާއި ޑިމޮކްރެޓުންގެ ޑިމާންޑަކީ މިމަހުގެ 25 ވަނަ ދުވަހުގެ ކުރިން ނިޒާމީ ވޯޓެއް ނެގުމެވެ. ރާއްޖޭގައި އޮންނަން ފެންނަނީ ބަރުލަމާނީ ނުވަތަ ރިޔާސީ ނިޒާމެއްތޯ ރައްޔިތުންގެ ވޯޓަކުން ބެލުމަށް ނަޝީދު ގެންދަވަނީ ގޮވާލައްވަމުންނެވެ.
ނަމަވެސް އެމްޑީޕީން އެކަމަށް އަދި ވަކިއެއްޗެއް ހާމަކޮށްފައެއް ނުވެއެވެ. ރައީސް ނަޝީދު ވަނީ އެމްޑީޕީން ގޮތެއް ނިންމަވަންދެން ނުހުންނަވާނެކަމަށްވެސް ވިދާޅުވެފައެވެ. އަދި އަވަހަށް ގޮތެއް ނިންމެވުމަށް އެމްޑީޕީއަށް ގޮވާލައްވާފައެވެ.
ރިޔާސީ އިންތިޚާބުގެ ދެވަނަ ބުރަށް ޑިމޮކްރެޓްސްގެ ގިނަ މެންބަރުން ދަނީ ޑރ.މުއިއްޒަށް ތާޢީދުކުރާކަން ހާމަކުރަމުންނެވެ.
