އިންސާފުވެރި އިންތިޚާބެއް ބޭއްވޭނެ ފުރުސަތާއި، ސަރުކާރު ޖަވާބު ދާރީކޮށް ޒިންމާދާރު ކުރެވޭނެ އެއްވެސް ގޮތެއް މިހާރަކުން ނެތްކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަދު ފާހަގަކުރާ ބައިނަލް އަގުވާމީ ޑިމޮކްރަސީ ދުވަހުގެ މުނާސަބާގައި ރައްޔިތުންގެ މަޖިލީހުގެ ސޯޝަލް މީޑިއާ ވަސީލަތްތައް މެދުވެރިކޮށް އާއްމުކުރެއްވި ހިތާބެއްގައި ނަޝީދު ވިދާޅުވީ ރާއްޖޭގެ ރައްޔިތުން ޑިމޮކްރެޓިކް ނިޒާމު ބަލައިގަތް ފަހުން ދައުލަތުގެ ތަނަވަސްކަން އިތުރުވެފައިވާ ކަމަށެވެ. އޭގެ ހެއްކެއްގެ ގޮތުގައި ދެއްކެވީ ޓެކުހުގެ ނިޒާމާއި އެކު ދައުލަތުގެ އާމްދަނީ ހަތް ބިލިޔަނުން 30 މިލިޔަނަށް އިތުރުވުމެވެ.
މި ޑިމޮކްރެޓިކް ހިފެހެއްޓުމަށް ޓަކައި އަޅުގަނޑުމެން މުހިއްމު ތިން ހަތަރު ކަމެއް އެބަ ހިފަހައްޓަންޖެހޭ. ހާއްސަގޮތެއްގައި އިންތިހާބުތައް އެެއީ މިނިވަން ދެފުށް ފެންނަ ގޮތަކަށް ބޭއްވޭ އިންތިހާބުތަކަކަށް ވުން.
– ނަޝީދު ވިދާޅުވިއެވެ.
ރައީސް ނަޝީދު ވަނީ ޑިމޮކްރެޓިކް ނިޒާމް ހިފެހެއްޓުމަށްޓަކައި ކުރަން ޖެހޭ މަސައްކަތްތައް ހިއްސާ ކުރައްވާފައެވެ. އެގޮތުން އެންމެ މުހިންމު އެއް ކަމެއްގެ ގޮތުގައި ނަޝީދު ވިދާޅުވީ އިންތިހާބުތަކަކީ މިނިވަން އަދި ދެފުށް ފެންނަ އިންސާފުވެރި އިންތިހާބުތަކަކަށް ވާން ޖެހޭ ކަމަށެވެ. ހަމަ އެހެންމެ އެ އިންތިހާބުތަކުގައި ސަރުކާރުގެ ވަސީލަތްތައް ބޭނުންކޮށްގެން ނުވާނެ ކަމަށް ވެސް ނަޝީދު ވިދާޅުވިއެވެ. އަދި ސަރުކާރުގެ ނުފޫޒު އިންތިހާބުތަކުގައި ބޭނުންކޮށްގެން ނުވާނެކަން ވެސް އެމަނިކުފާނު ފާހަގަކުރެއްވިއެވެ.
ހާއްސަ ގޮތެއްގައި ސަރުކާރު ހިއްސާވާ ކުންފުނިތައް އިންތިހާބުތަކުގައި ބޭނުން ނުކުރުން. އަދި ސަރުކާރުން ހިންގާ އެކި ބާވަތް ބާވަތްތަކުގެ ޕްރޮޖެކްޓްތަކަކީ ވެސް އިންތިހާބަށް ހިންގާ ޕްރޮޖެކްޓްތަކަކަށް ނުުވުމަކީ ވެސް ކޮންމެހެން ބޭނުންތެރި ކަމެއް.
– ނަޝީދު ވިދާޅުވިއެވެ.
މިއަހަރުގެ ޑިމޮކްރަސީ ދުވަހުގެ ޝިއާރަކީ "އެމްޕަވަރިން ދަ ނެކްޓް ޖެނެރޭޝަން" އަންނަން އޮތް ޖީލު ބާރުވެރިކުރުވުން ކަން ފާހަގަކުރައްވައި އެމަނިކުފާނު ވިދާޅުވީ މިފަހަރުގެ ރިޔާސީ އިންތިހާބުގައި ޒުވާން ކެންޑިޑޭޓުން ތިއްބެވުމަކީ ލިބުނު ހިތްހަމަޖެހުމެއް ކަމަށެވެ.
