ދިވެހިރާއްޖޭގައި ބޭއްވޭ ކޮންމެ ރިޔާސީ އިންތިޚާބެއްގައިވެސް އެންމެ ބޮޑަށް ފާހަގަވާ އެއް ކަމަކީ އިންތިޚާބު ކާމިޔާބު ކުރުމަށް ކުރެވޭ ކެމްޕޭންތަކެވެ. އެއީ އިންތިޚާބު ކާމިޔާބު ކުރުމަށް އޭރަކު އޮންނަ ސަރުކާރަކާއި އަދި އިދިކޮޅުންވެސް ކުރަމުންދާ ކެމްޕޭންތަކާއި، ކުރާ މަސައްކަތްތަކެވެ.
މިގޮތުން ވަކީން ޚާއްސަ ގޮތެއްގައި، ރާއްޖޭގެ ވަލިއްޔުލްއަމްރު ހޮވުމަށްޓަކާ ކޮންމެ 5 އަހަރަކުން އެއްފަހަރު ބޭއްވޭ ބޮޑު އިންތިޚާބުގައި ކުރެވޭ ކެމްޕޭންތަކުގައި އެންމެ ޚާއްސަ ގޮތެއްގައި ފާހަގަ ކޮށްލާން ޖެހެނީ އިންތިޚާބު ކާމިޔާބު ކުރުމަށް ކުރެވޭ ކެމްޕޭންތަކުގެ އިތުރަށް އެއް ކެނޑިޑޭޓަކު އަނެއް ކެނޑިޑޭޓަކާއި ދެކޮޅަށް ކުރާ އެންޓި ކެމްޕޭނެވެ. އަދި އެންޓި ކެމްޕޭން ގިނަފަހަރު ވެގެންދަނީ ރިޔާސީ އިންތިޚާބު ކާމިޔާބު ކުރުމަށް ކުރެވޭ މަސައްތަކަށްވުރެ ބޮޑަށް، އަނެއް ކެނޑިޑޭޓް ބަލިކޮށްލުމަށް ބޭނުންކުރާ ވަރުގަދަ ސިޔާސީ ހަތިޔާރަކަށްވެސް މެއެވެ.
އެހެންނަމަވެސް ފާހަގަ ކޮށްލާންޖެހޭ އެންމެ މުހިންމު ނުކުތާއަކީ ރާއްޖޭގައި ބޭއްވޭ އެއްވެސް އިންތިޚާބެއްގައި އެއް ކެނޑިޑޭޓަކު އަނެއް ކެނޑިޑޭޓަކާއި ދެކޮޅަށް އެންޓި ކެމްޕޭން ކުރުމަކީ އިންތިޚާބާބެހޭ ގާނޫނުން މަނާކޮށްފައި އޮންނަ ކަމެއް ކަމެވެ. އަދި އެއީ ހުރިހާ އިންތިޚާބެއްގައިވެސް، އިލެކްޝަންސް ކޮމިޝަނުން ސިޔާސީ ޕާޓީތަކާއި އާންމު ރައްޔިތުންނަށް އެކަމުގެ ހޭލުންތެރިކަން އިތުރުކޮށް، އެންޓިކެމްޕޭނަކީ އެއް ކެނޑިޑޭޓަކު އަނެއް ކެނޑިޑޭޓަކު ބަލިކުރުމަށް ބޭނުންކުރާ ހަތިޔާރަކަށް ނުހެދުމަށް އިލްތިމާސް ކުރަމުންދާ ކަމެއްކަންވެސް މި ފުރުސަތުގައި ފާހަގަކޮށްލާންވެސް ޖެހެއެވެ.
އިދިކޮޅު ކެނޑިޑޭޓާއި ދެކޮޅަށް ކުރެވެމުންދާ އެންޓި ކެމްޕޭން!
މިހާރު ކުރިޔަށްދާ ރިޔާސީ އިންތިޚާބަކީ ފާއިތުވި އެހެން ރިޔާސީ އިންތިޚާބުތަކެއް ފަދައިން ވަރަށްވެސް ވާދަވެރިކޮށް ކުރިޔަށްދާ ރިޔާސީ އިންތިޚާބެކެވެ. އެހެންނަމަވެސް އެހެން ގިނަ ރިޔާސީ އިންތިޚާބުތަކާއި ޚިލާފަށް މިއަހަރުގެ ރިޔާސީ އިންތިޚާބު ފާހަގަވެގެން ދަނީ ގިނަ އަދަދެއްގެ ކެނޑިޑޭޓުން ވާދަކުރާ، އެހެންނަމަވެސް ފުރަތަމަ ބުރާ ހަމައިންވެސް ހަމައެކަނި ދެކެނޑިޑޭޓެއްގެ މެދުގައި އެކަނި ކުރިޔަށްދާ ވާދަވެރި އިންތިޚާބަކަށެވެ.
ނަތީޖާއެއްގެ ގޮތުން، ރިޔާސީ އިންތިޚާބުގެ ފުރަތަމަ ބުރު ނިމިގެން ދިޔައިރު، ފުރަތަމަ ބުރުން އެންމެ ރަގަޅު ނަތީޖާއެއް ހޯދުނު ދެ ކެނޑިޑޭޓުންނަށްވެސް ވެގެން ދިޔައީ ވާދަވެރިކަން އޮތް ދެ ކެނޑިޑޭޓުން ކަމަށްވާ، ވެރިކަންކުރާ އެމްޑީޕީގެ ރިޔާސީ ކެނޑިޑޭޓު، ރައީސުލްޖުމުހޫރިއްޔާ އިބުރާހިމް މުހައްމަދު ސާލިހާއި އިދިކޮޅު ޕީޕީއެމް/ޕީއެންސީގެ ރިޔާސީ ކެނޑިޑޭޓް، ޑރ. މުހައްމަދު މުއިއްޒުއެވެ.
މިގޮތުން ރިޔާސީ އިންތިޚާބުގެ ފުރަތަމަ ބުރު ނިމިގެންދިޔައިރު ވެރިކަން ކުރާ އެމްޑީޕީގެ މައްޗަށް އިދިކޮޅު ކެނޑިޑޭޓް ޑރ. މުއިއްޒު ހޯއްދެވި ބޮޑު ކާމިޔާބާއެކީ އެންމެ ބޮޑަށް ފާހަގަވެގެންދިޔަ އެއްކަމަކަށް ވެގެން ގޮސްފައިވަނީ މި ރިޔާސީ އިންތިޚާބު ފެށުނީއްސުރެ އިދިކޮޅު ކެނޑިޑޭޓް ޑރ. މުއިއްޒުއާއި ދެކޮޅަށް ކުރަމުންދާ އެންޓި ކެމްޕޭނާއި، ސޯޝަލް މީޑިއާގެ އެކި ވަސީލަތްތަކުގައި ދައްކަމުންދާ ހަގީގަތާއި ޚިލާފް ވާހަކަތަކާއި ތުހުމަތު ތަކެވެ.
އޭގެ ތެރެއިންވެސް ރިޔާސީ އިންތިޚާބުގެ ނިމިދިޔަ ފުރަތަމަ ބުރުގައި އެންމެ ބޮޑަށް ފާހަގަވެގެން ދިޔައީ ޑރ. މުއިއްޒުއާއި ދެކޮޅަށް އެމްޑީޕީގެ ކެމްޕޭން ތަރުޖަމާނު މާރިޔާ ދީދީ ބޭއްވެވި ޕްރެސް ކޮންފަރެންސްތަކުގައި ކުރެއްވި ސާބިތު ނުހިފޭ ތުހުމަތުތަކެވެ. އޭގެ ތެރޭގައި ހިމެނެނީ ދީނީ ބައެއް ޖަމާއަތްތަކާއި ޑރ. މުއިއްޒުއާއި މަތިކޮށް މާރިޔާ ދީދީ ދެއްކެވި ވާހަކަތަކެވެ. ނުވަތަ ކުރެއްވި ތުހުމަތުތަކެވެ.
އަދި ޑރ. މުއިއްޒުއާއި، ރާއްޖޭގައި ދީނީ ހޭލުންތެރިކަން އިތުރުކުރުމަށް ފުޅާ ދާއިރާއެއްގައި މަސައްކަތް ކުރަމުންދާ ޖަމާއަތެއް ކަމުގައިވާ ސަލަފް ޖަމާއަތާއި ޚާއްސަ ގުޅުންތަކެއް އޮންނަމަކަށް ތުހުމަތުކޮށް، އެއީ ދީނީގޮތުން ހައްދު ފަހައެޅި އުސޫލުތަކުގެ މައްޗަށް ބިނާކޮށްފައި އޮތް "ނުރައްކާތެރި ގުޅުމެއް"ގެ ގޮތުގައި ސިފަކުރުމަށް މާރިޔާ ކުރަމުންއައި މަސައްކަތްތައް އެއީ ވަންހަނާ ވާން އޮތް ކަމެއް ނޫނެވެ.
ހަމަ އެއާއެކު، ޑރ. މުއިއްޒުގެ އަނބިކަބަލުންނާއި މަތިކޮށް ވަނަމުން ގޮވުމާއި، ކުރިޔަށްދާ ރިޔާސީ ކެމްޕޭނާއި އެއްވެސް ގުޅުމެއްނެތް، ޑރ. މުއިއްޒުއާއި ދެކޮޅަށް މާރިޔާ ދެއްކެވި ޒާތީ އެތަކެއް ވާހަކަތަކެއް މާރިޔާ ބޭއްވެވި ޕްރެސް ކޮންފަރެންސްތަކުން ގިނަބަޔަކަށް ފާހަގަވެގެން ގޮސްފައި ވެއެވެ.
އެހެންނަމަވެސް ފާހަގަކޮށްލާންޖެހޭ އެންމެ މުހިންމު އެއް ނުކުތާއަކީ، ޑރ. މުއިއްޒުގެ ދެކަބަލުންނަކީވެސް ދުނިޔޭގެ އެންމެ ކުރިއަރާފައިވާ އެއްގައުމު ކަމަށްވާ އިނގިރޭސިވިލާތުން ތައުލީމު ހާސިލްކުރައްވާފައިވާ ބޭފުޅުންކަމެވެ. ދެބޭފުޅުންނަކީވެސް އުޅަނގުގެ ތައުލީމު އުގެނޑިވަޑައިގެން ތިއްބެވި ތައުލީމީ ދެބޭފުޅުންނެވެ.
އޭގެ އިތުރަށް، ސަލަފް ޖަމާއަތުން ރާއްޖޭގެ އެކި ކަންކޮޅުތަކުގައި ދީނީ ހޭޅުންތެރިކަން އިތުރުކޮށް، އިސްލާމްދީނުގެ ހެޔޮލަފާ އުސޫކުތަކަށް ދިވެހި ރައްޔިތުން އަހުލުވެރިކުރުމަށް ކުރަމުންދާ މަސައްކަތްތައް، އެއީ ދީނީގޮތުން ހަރުކަށި އުސޫލުތަކެއްގެ ގޮތުގައި ފަރުމާކޮށް، އެކަމުގެ ބިރުވެރިކަން ރައްޔިތުންގެ މެދުގައި އުފައްދާ، އެމަގުން ސޯޝަލް މީޑިއާގެ ވަސީލަތްތަކުގައި ފުޅާ ދާއިރާއެއްގައި މިހާރުވެސް ކުރެވެމުންދާ ކެމްޕޭންތައް ވަކީން ޚާއްސަ ގޮތެއްގައި ފާހަގަ ކޮށްލާން ޖެހެއެވެ.
ރިޔާސީ އިންތިޚާބުގެ ފުރަތަމަ ބުރު ނިމިގެން ދިޔައިރު، މި ހުރިހާ "އެންޓި ކެމްޕޭން"ތަކުގެ މައްޗަށް ޑރ. މުއިއްޒު ބޮޑު ތަފާތަކުން ކުރި ހޯއްދެވީ ގިނަ ބަޔަކަށް ހައިރާންކަން ގެނުވާފައެވެ.
އެންޓި ކެމްޕޭންތަކުގެ މައްޗަށް މުއިއްޒު ހޯއްދެވި ކާމިޔާބީ!
މިހާރު ކުރިޔަށްދާ ރިޔާސީ އިންތިޚާބުގެ ދެވަނަބުރަށް ސިޔާސީ ބޮޑު ދެޕާޓީން މިހާރު ތައްޔާރު ވަމުންދާއިރު، ފުރަތަމަ ބުރު ނިމިގެންދިޔައީ ސަރުކާރު ހިންގާ ޕާޓީގެ މައްޗަށް އިދިކޮޅު ކެނޑިޑޭޓް ހޯއްދެވި ބޮޑު ކާމިޔާބީއަކާއެކީއެވެ. އަދި މިކާމިޔާބީއާއެކު، ފާހަގަވާން އޮތް އެންމެ މުހިންމު އެއްކަމަކީ ދެކޮޅަށް ކުރިޔަށްދިޔަ އެންޓި ކެމްޕޭންތަކާއި ކުރެވެމުންދިޔަ ހަގީގަތާއި ޚިލާފް ތުހަމަތުތަކުގެ ކުރިމަތީގައި ޑރ. މުއިއްޒު ދެއްކެވި ހަހިމޭންކަމާއި ސާބިތުކަމެވެ.
ކުރެވެމުންދިޔަ ހަގީގަތެއް ނެތް ތުހުމަތުތަކުގެ ޖަވާބު ދާރީވުމުގައި ޑރ. މުއިއްޒު ގެންގުޅުއްވި ސާބިތުކަމެވެ. އެއްމޭރުމަކުން ރައްދު ނުދެއްވާ، ކަންކަމުގެ ހަގީގަތް އޮޅުން ފިލުވާ ދެއްވުމުގައި ގެންގުޅުއްވި ހަރުދަނާ ސިޔާސަތުތަކެވެ. ގަބޫލުކުރަންޖެހޭ ހަގީގަތަކީ، ރިޔާސީ އިންތިޚާބުގެ ފުރަތަމަ ބުރުގައި ޑރ. މުއިއްޒު ހޯއްދެވި ބޮޑު ކާމިޔާބީގެ ހަގީގީ ސިއްރަކީވެސް މިއީކަމެވެ. އަދި އެސިޔާސަތުގެ މަތީގައި ދެމިހުންނަވާ، އުސޫލާއި ހަމަ ހިފަހައްޓަވާ، ކުރިޔަށް ވަޑައިގަންނަވައިފިނަމަ، ރިޔާސީ އިންތިޚާބުގެ ދެވަނަ ބުރުވެސް ޑރ. މުއިއްޒު ކާމިޔާބު ކުރައްވާނީ ބޮޑު ތަފާތަކުން ކަމުގައި ގިނަބަޔަކު މިހާރުދަނީ ދެކެމުންނެވެ.
