ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަ ސަފީރުގެ ނައިބުގެ މަގާމުގައި ހުންނެވި ނައުޝާދު ވަހީދު ހަސަން މަނިކު އެމަޤާމުން ވަކިކުރުމަކީ ލަދުވެތި ކަމެއްކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް އޮފީހުގެ މިނިސްޓަރު އިބްރާހިމް ވަހީދު ސޮއިކުރައްވައި މިއަދު ފޮނުވި ސިޓީއެއްގައި ބުނެފައިވަނީ ގާނޫނުއަސާސީގެ 115 ވަނަ މާއްދާގެ ދަށުން ރައީސަށް ލިބިދޭ ބާރުގެ ދަށުން އޭނާ އެ މަގާމުން ވަކިކޮށްފައިވާ ކަމަށެވެ. ނައުޝާދު ވަކި ކުރުމުން ރައީސް ނަޝީދު ވިދާޅުވީ ނައިޝާދު ސަރުކާރުން ވަކި ކުރުމަކީ ލަދުވެތި ކަމެއް ކަމަށެވެ
ނައުޝާދު ވަހީދަކީ ދިވެހި ދައުލަތަށާއި، ދިވެހި ރާއްޖޭގެ ޑިމޮކްރަސީ ހަރަކާތަށް އެންމެ ޚިދުމަތްތެރި އެކަކު. ނައުޝާދު ސަރުކާރުން ވަކި ކުރުމަކީ ލަދުވެތި ކަމެއް. ގެއްލުންވާނީ ސަރުކާރަށް އެކަންޏެއް ނޫން. ރައްޔިތުނަށް ވާ ގެއްލުން މާބޮޑުވާނެ.
– ނައުޝާދުގެ ދިފާއުގައި ރައީސް ނަޝީދު ވިދާޅުވިއެވެ.
ނައުޝާދު މަގާމުން ވަކިކޮށްފައިވާއިރު، އޭނާ ވަނީ މީގެ ދެ ދުވަސް ކުރިން، އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ފަރަހަނާޒް ފައިސަލާއި ސަރުކާރަށް ވަރަށް ބޮޑަށް ފާޑުވިދާޅުވެ ޓްވީޓު ކުރައްވައިފައެވެ. ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ވަރަށް ބޮޑަށް ތައުރީފު ކުރައްވައި ނައުޝާދު ކުރެއްވި ޓްވީޓުގައި ވަނީ ފަރަހަނާޒް އުޅުއްވަނީ މަގާމުގެ ދަހިވެތިކަމުގައި ކަމަށް ތުހުމަތުކުރައްވައިފައެވެ.
އެމްޑީޕީ ފެށުނީއްސުރެ އެ ޕާޓީގައި އުޅުއްވާ ނައުޝާދު އަބަދުވެސް ފާހަގަވެފައިވަނީ ނަޝީދާ އަރިސް ބޭފުޅެއްގެ ގޮތުގަ އެވެ. އެމްޑީޕީ ބައިބައިވުމަށް މެދުވެރިވި ރިޔާސީ ޕްރައިމަރީގައި ވެސް އޭނާ ތާއީދުކުރައްވާފައި ވަނީ ނަޝީދަށެވެ.
