ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ތަޢުރީފްކުރައްވާ ވާހަކަފުޅު ދެއްކެވި، އިނގިރޭސިވިލާތަށް ރާއްޖެއިން ކަނޑައަޅަފައި ހުންނަވާ ސަފީރުގެ ނާއިބު ނައުޝާދު ވަހީދު މަޤާމުން ވަކިކޮށްފިއެވެ.
މިމަހުގެ 9ގައި އޮތް ރިޔާސީ އިންތިޚާބުގެ ފުރަތަމަ ބުރުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙަށް މަދުން ވޯޓު ލިބިވަޑައިގަތުމާއި ގުޅިގެން، ނައުޝާދު ވަނީ، ރާއްޖޭގެ ޑިމޮކްރަސީގެ ބާނީއަކީ ރައީސް މުޙައްމަދު ނަޝީދުކަމަށް ވިދާޅުވެ ޓްވީޓް ކުރައްވާފައެވެ. ނައުޝާދު އެ ޓްވީޓްކުރެއްވީ ރައީސް ނަޝީދަށް އެމްޑީޕީގެ ބައެއް ފަރާތްތަކުން ފާޑުކިޔުން އަމާޒުކުރައްވާ ވީޑިއޯއާއެކުއެވެ.
ނައުޝާދު ވަނީ ސަފީރު ފަރަހަނާޒް ފައިސަލަށްވެސް ފާޑުވިދާޅުވެފައެވެ. އެގޮތުން ފަރަހަނާޒަކީ މުނާފިޤެއްކަމަށް ވިދާޅުވެފައިވެއެވެ. އަދި ޑިމޮކްރަސީގެ ބާނީއަކީ ރައީސް ނަޝީދުކަމަށްވެސް ނައުޝާދު ވިދާޅުވިއެވެ.
ނައުޝާދު މިހެން ވިދާލުވެފައިވަނިކޮށް، ރައީސް އޮފީހުގެ މިނިސްޓަރ އިބްރާހީމް ވަޙީދު ސޮއިކުރައްވާ ނައުޝާދަށް ފޮނުއްވި ސިޓީގައި ވަނީ ދިވެހި ޖުމްހޫރިއްޔާގެ ޤާނޫނު އަސާސީން ރައީސުލްޖުމްހޫރިއްޔާއަށް ލިބިފައިވާ ބާރުގެ ދަށުން އިނގިރޭސިވިލާތުގައި ހުންނަ ދިވެހިރާއްޖޭގެ އެމްބަސީގެ ސަފީރުގެ ނާއިބުގެ މަޤާމުން ނައުޝާދު ވަކިކޮށްފައިވާކަމަށް ރައީސުލްޖުމްހޫރިއްޔާ ވިދާޅުވެފައިވާކަމަށެވެ.
ރިޔާސީ އިންތިޚާބުގެ ފުރަތަމަ ބުރުން ރައީސް ޞާލިޙަށް ލިބިވަޑައިގަތީ ދެވަނައެވެ. އެއްބުރުން އިންތިޚާބު ކާމިޔާބުކުރެވޭނެކަމަށް ވިދާޅުވެ އިންތިޚާބާ ކޯލިޝަނަކުން ކުރިމަތިލެއްވިނަމަވެސް ލިބިވަޑައިގަތީ %39 އިންސައްތަ ވޯޓެވެ. އެއީ 86،000އެއްހާ ވޯޓެވެ.
