ފުޓްބޯޅަ ކުޅޭ އަންހެން ކުޅުންތެރިންނަށް ވިހެއުމުން މުސާރަ ލިބޭ ގޮތަށް ޗުއްޓީއެއް (މެޓާނިޓީ ލީވް) ދޭން ޖެހޭ ގޮތަށް ފީފާ އިން ގަވާއިދެއް ތައާރަފްކޮށްފި އެވެ.
އާ ގަވާއިދުގެ ތެރޭ ހިމެނޭ މުހިއްމު ކަންތައްތަކަށް ބަލާއިރު އަންހެން ކުޅުންތެރިއަކު ވިހެއުމުން 14 ހަފްތާގެ ޗުއްޓީއެއް ދޭން ޖެހެއެވެ. އަދި ބަނޑުބޮޑުކަން އެނގޭ ހިސާބުން ފެށިގެން ދެން އަމަލުކުރާނެ ގޮތެއް ކޮންޓްރެކްޓްގައި ލިޔެވިފައި އޮންނަންޖެހޭނެކަން ވަނީ އަންގާފައެވެ. އަދި އެބައި ނުހިމެނޭ ގޮތަށް ހަދާ އެގްރީމެންޓެއް ރަސްމީކޮށް ދެން ބަލައިނުގަންނާނެއެވެ.
ކޮންޓްރެކްޓްގައި ހުރި ކުޅުންތެރިއަކު ބަނޑުބޮޑުވުމުން އެ ކުޅުންތެރިއެއްގެ އެއްބަސްވުން ކެންސަލްކުރެވޭނީ ފީފާއާ އެކު މަޝްވަރާކޮށް އޮންނަ އުސޫލުތަކުގެ ތެރެއަށް ފެތޭނަމަ ކަމަށް އާ ގަވާއިދުގައި ވަނީ ހިމަނާފައެވެ. މެޓާނިޓީ ލީވްގައި ހުންނަ މުއްދަތުގައި ކުޅުންތެރިޔާގެ މުސާރައިގެ ތިން ބައި ކުޅަ ދެ ބައި ހަމަޖައްސަން ޖެހޭނީ ކުޅުންތެރިޔާ ކުޅޭ ޓީމުންނެވެ. އެ ކުޅުންތެރިޔާގެ ބަދަލުގައި އެހެން ކުޅުންތެރިއަކަށް ސޮއިކުރެވޭގޮތަށް ވަނީ، އެމަޖެންސީ ޓްރާންސްފާއެއް ކުރުމުގެ ފުރުސަތު ދީފައެވެ.
މަޝްވަރާތައް ދިގުލައިގެން ދިޔުމަށްފަހު އަންހެނުންގެ ފުޓްބޯޅައަށް މުހިންމުވެފައިވާ ގަވާއިދު ހުށަހެޅީ މިދިޔަ މަހުއެވެ. ފީފާ ކައުންސިލްގެ މިދިޔަ ހުކުރު ދުވަހުގެ ބައްދަލުވުމުގައި މި ގަވާއިދުވަނީ ފާސްކޮށްފައެވެ. އަންހެނުންގެ ފުޓްބޯޅަ ތަރައްގީކޮށް ފުޓްބޯޅައިގަ އަންހެނުންގު ހިއްސާ އިތުރުކުރުމަކީ ދެވަނަ ދައުރަކަށް އިންތިހާބް ވެފައިވާ ފިފާގެ ރައީސް އިންފަންޓީނިޔޯގެ ވައުދެކެވެ.
