ރައްޔިތުންގެ މަޖިލީހުގައި ހިމެނޭ އެމްޑީޕީއަށް ނިސްބަތްވާ ގިނަ މެމްބަރުންތަކެއް އެޕާޓީން ވަކިވެ ކުރިއަށް އޮތް ދުވަސްތަކުގައި އިދިކޮޅު ޕީޕީއެމް/ޕީއެންސީއާއި ގުޅުމަކީ ވަރަށް އެކަށީގެންވާ ކަމެއްކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ ކޮމެޓީތައް އެކުލަވާލުމަށް މިއަދު މަޖިލީހުގައި ކުރެވުނު ބަހުސްގެ ތެރެއިން ބައެއް މެމްބަރުން ފަހަގަ ކުރެއްވި ނުކުތާތަކަށް އިޝާރާތް ކުރައްވާ ރައީސް ނަޝީދު ވިދާޅުވީ މިވަގުތު މަޖިލީހުގެ މަސައްކަތް ފެށޭނެ ގޮތެއް ހޯދަން ޖެހޭކަމަށެވެ. އެކަން ކުރުމަށްޓަކައި ހުރި ކަންކަން ދޫކޮށްލާފައިވެސް މަޖިލިސް ކޮމެޓީތައް އެކުލަވާލަން ޖެހޭކަމަށެވެ.
ރައީސް ނަޝީދު ވިދާޅުވީ މަޖިލިސްގެ ކަންކަން ބަދަލުވެގެން ދަނީ ވަރަށް ބާރަށް ކަމަށެވެ. ޚާއްސަކޮށް މެމްބަރުން ޕާޓީ ބަދަލު ކުރުމާއި، މިއޮތް ސިޔާސީ އޮއިވަރުގެ ތެރޭގައި އެމްޑީޕީގެ އެތައް މެމްބަރުންނެއް ޕީޕީއެމްއާއި ގުޅުމަކީ ވަރަށް އެކަށީގެންވާ ކަމެއްކަމަށް ރައީސް ނަޝީދު ވިދާޅުވިއެވެ.
ވަރަށް ގިނަ ބަދަލު ކުއްލި ކުއްލިއަށް ވަރަށް އަވަސް އަވަހަށް އެބައާދޭ. ޑިމޮކްރެޓުން އެބޭފުޅުންގެ ޕާލިމަންޓްރީ ގްރޫޕެއް އެކުލަވާލާ ޕާލިމަންޓްރީ ލީޑަރެއް ހަމަޖެހި މި މަޖިލީހަށް އެމައުލޫމާތު ލިބެން އަދި ދުވަސްތަކެއް ހިނގާދާނެ. އެހެން ނަމަވެސް އަޅުގަނޑަށް ފެންނަ ގޮތުގައި ރަނގަޅު ގޮތަކީ މިކޮމެޓީތައް މިވަގުތު އެކުލަވާލުން. މިހާރު އެކަން ކުރެވެން އޮތް ގޮތަކަށް. ދެން ކުރިއަށް އޮތް ތަނުގައި އެމްޑީޕީގެ އެތައް މެމްބަރުންނެއް ޕީޕީއެމްއަށް ބަދަލު ވުމަކީވެސް އަދި ވަރަށް އެކަށީގެންވާ ކަމެއްކަން އަޅުގަނޑަށްވެސް ފާހަގަވޭ.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވަނީ މިއަދުގެ ޖަލްސާގައި ރައީސް ޞާލިހަށް ލިބުނު ވޯޓުގެ އަދަދުވެސް ތަކުރާރުކޮށް ވިދާޅުވެފައެވެ. ރައީސް ނަޝީދު ވިދާޅުވީ ރައީސަށް ލިބުނީ 38 އިންސައްތަ ވޯޓުކަމަށެވެ. މުއިއްޒު މިއިންތިޚާބުގައި 47 އިންސައްތަ ވޯޓު ރައްޔިތުން ދިންކަމަށް ރައީސް ނަޝީދު ވިދާޅުވިއެވެ.
