ރައްޔިތުންގެ މަޖިލީހުގެ ރައީސާއި، ނައިބް ރައީސްގެ އިތުބާރު ނެތްކަމުގެ މައްސަލަ މަޖިލީހަށް ވައްދައިގެން މިހާދުވަހު މަޖިލިސް ހުއްޓުވާފައި ބޭއްވީ އެމްޑީޕީންކަން މިހާރު ދިވެހި ރައްޔިތުންނަށް ހާމަވާނެކަމަށް ރައްޔިތުންގެ މަޖިލީހުގެ މަޑަވެލި ދާއިރާގެ ޑިމޮކްރެޓްސް މެމްބަރު ހުސެއިން ފިރުޝާން ވިދާޅުވެއްޖެއެވެ.
އޭނާ މިހެން ވިދާޅުވީ ރައްޔިތުންގެ މަޖިލިހުގެ ރައީސް މުހައްމަދު ނަޝީދާއި މަޖިލިހުގެ ނައިބު ރައީސް އީވާގެ އިތުބާރު ނެތްކަމުގެ މައްސަލަ މާދަމާގެ ޖަލްސާ އަށް އެޖެންޑާ ކޮށްފައި ވަނިކޮށް އެ މައްސަލަ އަނބުރާ ގެންނަން އެމްޑީޕީގެ ޕާލަމެންޓްރީ ގުރޫޕުން މިރޭ ނިންމުމާއި ގުޅިގެން ކުރެއްވި ޓުވީޓުގައެވެ.
ފިރުޝާން ވިދާޅުވީ މަޖިލިސް މިހާތަނަށް ހުއްޓުވައި މަޖިލީހުގެ މަސައްކަތް ނުކުރެވޭ ގޮތަށް އަމަލު ކުރީ ކޮންބައެއްކަން މިރޭގެ މިނިންމުމުން ސާފުވާނެކަމަށެވެ. ކުއްލިއަކަށް މަޖިލީހުގެ ރައީސާއި، ނައިބް ރައީސްގެ އިތުބާރު ނެތްކަމުގެ މައްސަލަ ނަގައި ރައްޔިތުންނަށް ކަން ހިނގައިދިޔަގޮތުން އޮޅުވާލަން އުޅުނަސް އެކަމެއް ނުވާނެކަމަށް ފިރުޝާން ވިދާޅުވިއެވެ.
ދިވެހި ރައްޔިތުން ނިކަން ބައްލަވާ! ރައްޔިތުންގެ މަޖްލިސް ހުއްޓުވާލީ އެމްޑީޕީން ކަން ސާފެއް ނުވޭތޯ؟ ޕްރޮޕެގެންޑާ ހިންގަން ނޫސްތައް ގަނެލައިގެން އޮޅުވާލީ ރައްޔިތުންނަށް. އިއްޔެގެ އިންތިޚާބުން ސާފުވާ އެއް ކަމަކީ މައިނޯރިޓީގެ އަޑު ކަނޑުވާނުލެވޭނެކަން.
– ފިރުޝާން ވިދާޅުވިއެވެ.
މަޖިލިސް ރައީސާއި، ނައިބް ރައީސްގެ މައްސަލަ ނަގަން އެމްޑީޕީން ނިންމީ މަޖިލިސް ހިންގަން ޖާގަ ދިނުމުގެ ގޮތުންކަމަށް ވަނީ ބުނެފައެވެ. އަދި މިހާރު ކަންކަން އޮތް ގޮތުން ސްމޫތުކޮށް ކުރިއަށްދާން ބޭނުންވާތީކަމަށްވެސް އެމްޑީޕީގެ ޕީޖީ ގްރޫޕުން ވަނީ ބުނެފައެވެ.
މަޖިލީހުގެ ރައީސާއި ނައިބް ރައީސްގެ އިތުބާރު ނެތްކަމުގެ މައްސަލަ ނަގާފައިވަނީ ރިޔާސީ އިންތިޚާބު ދެވަނަ ބުރަކަށްގޮސް ޑިމޮކްރެޓްސްގެ އެހީއާއި ނުލައި އެމްޑީޕީއަށް ކުރިއަށް ދެވޭނެ އެއްވެސް ގޮތެއް ނެތުމުންނެވެ.
