މިއަދު ކުރިއަށް ދިޔަ ރިޔާސީ އިންތިޚާބުގައި ވޯޓުލުން ކުރިއަށް ދިޔަ ބައެއް ވޯޓު ފޮށިތައް ބަންދުކޮށް ގުނުމަށް ތައްޔާރު ވެއްޖެއެވެ.
މިއަދު ހެނދުނު 8 ޖެހުމާއެކު މާލެއާއި އަތޮޅުތަކުގައި ވޯޓުލުމުގެ ކަންކަން ވަނީ ފަށާފައެވެ. ރިޔާސީ އިންތިޚާބުގެ ވޯޓުލުން މިއަދު ހެނދުނު 8 ފެށިގެން ހަވީރު 4 ޖެހުމާއި ހަމައަށް ކުރިއަށްދިޔައީ ވަރަށް އަމާން ކަމާއިއެކުގައެވެ.
ހަވީރު 4 ޖަހާއިރު ވޯޓުލުމަށް ކިއޫގައި މީހަކު ނެތްނަމަ، ކިޔޫ ބަންދުކުރުމަށްފަހު 30 މިނެޓްފަހުން ވޯޓު ގުނަން ފަށާނެކަމަށް އިލެކްޝަންސް ކޮމިޝަނުން ވިދާޅުވެއެވެ. މިހާރު ވަނީ ކިއުތައް ބަންދުކޮށް، 4 ޖެހުމާއި ހަމައަށް ވޯޓުލާން ބޭނުންވާ މީހުންނަށް ވޯޓުލުމަށް ފުރުސަތު ދީފައެވެ. ނަމަވެސް އިތުރު ބަޔަކަށް ދެން ކިއުއަކަށް ނޭރޭނެއެވެ.
މިއިންތިޚާބުގެ ނަތީޖާއަށް ގިނަ ބަޔަކު އިންތިޒާރު ކުރަމުންދާއިރު، އިންތިޚާބުގައި 2 ޖެހުމާއި ހަމައަށް ވޯޓުލީ މީހުންގެ ނިސްބަތަކީ 58 އިންސައްތައެވެ. އެހެންކަމުން މިއިންތިޚާބުގައި ވޯޓުލީ މީހުންގެ ޖުމްލަ އަދަދު މަދުވުމަކީ ވުން ގާތްކަމެކެވެ.
މިއަހަރުގެ ރިޔާސީ އިންތިޚާބުގައި ޖުމްލަ 282،395 މީހަކަށް ވޯޓުލުމުގެ ހައްޤު ލިބިފައިވެއެވެ. މީގެ ތެރޭގައި އަލަށް ވޯޓުލާ 27000 އަށްވުރެ ގިނަ މީހުން ހިމެނެއެވެ. އަދި ޤާނޫނަށް ގެނެވުނު އިސްލާޙާއެކު މިފަހަރުގެ އިންތިޚާބުގައި ލޯފަން މީހުންނަށް އިތުރު މީހެއްގެ އެހީއަކާއި ނުލާ، އަމިއްލައަށް ވޯޓުލުމުގެ ފުރުޞަތު ވަނީ ލިބިގެންގޮސްފައެވެ.
މި އިންތިޚާބުގައި ރާއްޖެއާއި ރާއްޖޭން ބޭރުގައި ވޯޓުލުމަށްޓަކާ ޖުމްލަ 574 ފޮށްޓެއް ވަނީ ބަހައްޓާފައެވެ. މިފަހަރުގެ ރިޔާސީ އިންތިޚާބުގައި ރާއްޖޭން ބޭރުގެ 5 ޤައުމެއްގައި ވަނީ ވޯޓު ފޮށި ބަހައްޓާފައެވެ. އެއީ ސްރީލަންކާގެ ކޮލަމްބޯއާއި، އިންޑިއާގެ ޓްރެވެންޑްރަމާއި، މެލޭޝިއާގެ ކުއަލަލަމްޕޫރުގެ އިތުރުން އިނގިރޭސިވިލާތުގެ ލަންޑަނާއި، ދުބާއީގައެވެ. އަދި 65 ރިސޯޓަކާއި 5 ޖަލެއްގައި ވޯޓު ފޮށި ބަހައްޓާފައިވެއެވެ.
