މިއަދު ކުރިއަށްދާ ރިޔާސީ އިންތިޚާބުގެ ވޯޓުލުމުގެ ކަންކަން ކުރިއަށްދަނީ އަމާން އޮމާންކޮށް ކަމަށާއި ވޯޓުލުމުގެ ޝަރުތު ހަމަވާ މީހުންގެ ބޮޑު އިންސައްތައެއް ވޯޓު ލާން ނުކުންނާނެ ކަމަށް ބެލެވޭ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.
އެމްޑީޕީގެ ރިޔާސީ ކެނޑިޑޭޓްގެ ގޮތުގައި ދެވަނަ ދައުރަކަށް ކުރިމަތިލައްވައިގެން ހުންނެވި ރައީސް ސޯލިހް މިހެން ވިދާޅުވީ ރިޔާސީ އިންތިޚާބުގައި ވޯޓުލެއްވުމަށްފަހު ނޫސްވެރިންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސް ސޯލިހް ވިދާޅުވީ މިހާރު ފެންނަމުންދާ މަންޒަރުތަކަށް ބަލާއިރު މި ފަަހަރުގެ އިންތިހާބުގައި 80 ޕަސެންޓާއި 90 ޕަސެންޓް މީހުން ވޯޓު ލާނެ ކަމަށް ބެލެވޭ ކަމަށެވެ. އެގޮތުން މިފަހަރުގެ އިންތިހާބުގައި ވޯޓު ލާން ކުރިން އިންތިހާބެއްގައި ނުނިކުންނަހާ މީހުން ނިކުންނާނެ ކަން ޔަގީންކުރާ ކަމަށް ރައީސް ވިދާޅުވިއެވެ.
ހަމަ އެހެންމެ މިއީ މިހާތަނަށް ރާއްޖޭގައި ބޭއްވޭ އެންމެ ފުރިހަމަ އެއް އިންތިހާބު ކަމަށް ރައީސް ވިދާޅުވިއެވެ. އެގޮތުން މިނިވަން ކަމާ އެކީ ހުރިހާ ކެނޑިޑޭޓުން ކެމްޕެއިން ކުރަން ލިބުނު ކަމާއި އިންތިހާބުގެ ވޯޓު ލުން ފެށިގެން ދަނީ މާ ބޮޑު ހަމަޖެހުމެއް ނެތި ކަން ރައީސް އުފަލާ އެކު ފާހަގަކުރެއްވި އެެވެ.
އެހެންނަމަވެސް ގާނޫނު އަސާސީން ލިބިދީފައި އޮތް ވޯޓު ދިނުމުގެ ހައްގު އެންމެ އަމާނާތްތެރިކަމާއެކު ބޭނުން ހުރިހާ ބޭފުޅުން ވެސް ހިއްޕަވައި ފަހުވަގުތަށް މަޑުނުކޮށް އެންމެ ބޭފުޅުންވެސް އަވަހަށް ވޯޓުލުމަށް ރައީސް އިލްތިމާސް ކުރެއްވިއެވެ.
މިހާތަނަށް އިލެކްޝަންސް ކޮމިޝަނުން އާއްމު ކުރި ހިސާބުތަކަށް ބަލާއިރު، މިއަދު ހެނދުނު 10 ޖެހުމާ ހަމައަށް 36،163 މީހުން ވަނީ ވޯޓު ލައިފައެވެ. އެއީ 22،403 ފިރިހެނުންނާއި 13،760 މީހުންކަން ފާހަގަކޮށްލެވެއެވެ.
މިފަހަރުގެ އިންތިހާބުގައި ވޯޓުލުމުގެ ހައްގު ލިބެނީ 282،395 މީހަކަށެވެ. އެއީ މިހާތަނަށް ރާއްޖޭގައި ވޯޓުުލުމުގެ ހައްގު ލިބިފަވާ މީހުން އެންމެ ގިނަ އިތިޚާބެވެ. އޭގެތެރޭގައި މުޅިން އަލަށް ވޯޓުލެވޭ 27,006 ޒުވާނުން ހިމެނެއެވެ.
