މިހާރު ކުރިއަށްދާ ރިޔާސީ އިންތިޚާބުގައި ވީހާ ވެސް އަވަހަކަށް ވޯޓުލައި، ހައްގު އަދާކުރުމަށް އިލެކްޝަންސް ކޮމިޝަނުން އިލްތިމާސްކޮށްފިއެވެ.
އެ ކޮމިޝަނުގެ ނައިބު ރައީސް އިސްމާއީލް ޙަބީބް ދާޅުވީ، ރިޔާސީ ވޯޓަކީ ކޮންމެ ފަސް އަހަރަކުން އެއްފަހަރު ރައްޔިތުންނަށް ލިބޭ މުހިއްމު ފުރުސަތެއް ކަމަށެވެ. އެހެންކަމުން ކޮންމެ ރައްޔިތަކުވެސް ވީހާވެސް އަވަހަށް ވަޑައިގެން ވޯޓު ދިނުމުގެ ޒިންމާ އަދާކުރެއްވުމަށް ވަނީ އިލްތިމާސް ކުރައްވާފައެވެ.
އޭނާ ވަނީ ވޯޓުލުމުގައި އެއްވެސް ނުފޫޒަކަށް ބެލުމެއް ނެތި، އަމިއްލަ ވިސްނުމާ ފިކުރަށް ވޯޓުލުމަށް އިލްތިމާސް ކުރައްވާފައެވެ. އޭނާ ވިދާޅުވީ ވޯޓުގެ ސިއްރުކަން އިލެކްޝަންސްއިން ކަށަވަރުކޮށްދޭނެ ކަމަށެވެ.
ރިޔާސީ އިންތިޚާބު 2023ގެ ވޯޓުލުން މިއަދު 08:00އިން ފެށިގެން ރާއްޖޭގެ ހުރިހާ ސަރަހައްދެއްގައި ކުރިއަށް އެބަދެއެވެ. މި އިންތިޚާބުގައި ވޯޓުލުމުގެ ހައްގު ލިބިގެންވާ މީހުންގެ އަދަދު 282،395އަށް އަރައެވެ. އޭގެ ތެރޭގައި އަލަށް ވޯޓުލާ 27,000އަށް ވުރެ ގިނަ މީހުން ހިމެނެއެވެ.
ވޯޓުފޮށިތައް ބަންދުކުރަން ހަމަޖެހިފައިވަނީ ހަވީރު 04:00ގައެވެ.
