ރިޔާސީ އިންތިޚާބުގައި އިލެކްޝަންސް ކޮމިޝަނާއި ކަމާ ގުޅުންހުރި އެހެނިހެން އިދާރާތަކުން ދީފައިވާ އިރުޝާދުތަކާ އެއްގޮތަށް އަމަލުކުރުމަށާއި ޢާންމު މަސްލަޙަތު ގެއްލޭ ފަދަ އެއްވެސް ކަމަކަށް އެއްވެސް ފަރާތަކުން އަރައިނުގަތުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން އިލްތިމާސްކޮށްފިއެވެ.
ކޮމިޝަނުން ނެރުު ނޫސް ބަޔާނެއްގައި ވަނީ މި އިންތިޚާބަކީ މިނިވަން، އިންސާފުވެރި އަދި ދެފުށްފެންނަ އިންތިޚާބަކަށް ހެދުމަށް ކުރަންޖެހޭ އެންމެހާ މަސައްކަތް ކުރުމަށް ކަމާ ގުޅުންހުރި ހުރިހާ އިދާރާތަކުގެ ކިބައިން އެދިފައެވެ. އަދި އިންތިޚާބުގައި ވޯޓުލުމުގެ ޙައްޤު ލިބިފައިވާ އެންމެހާ ފަރާތްތަކުން މި ޙައްޤުގެ ބޭނުން ފުރިހަމަ ގޮތުގައި ހިފައި، ނުފޫޒުން އެއްކިބާވެ ތިބެ ވޯޓު ލުމުގެ މުހިއްމުކަން ހަނދާންކޮށްދީފައެެވެ.
އެޗްއާރްސީއެމް އިން ބުނީ 2023 ވަނަ އަހަރުގެ ރިޔާސީ އިންތިޚާބުގެ ކަންކަން މޮނިޓަރ ކުރުމަށްޓަކައި އިންތިޚާބާގުޅޭ ޙާލަތު ބެލުމަށާއި އިންތިޚާބުގެ ކުރީ ދުވަހާއި އިންތިޚާބު އޮންނަ ދުވަހު ވޯޓުލާ މަރުކަޒުތައް އޮބްޒާވް ކުރުމާއި އަދި ވޯޓުގެ ވަގުތީ ނަތީޖާ އިޢުލާނުކުރުމާ ހަމައަށް ހިނގަމުންދާ ކަންކަން ކޮމިޝަނުން މޮނީޓާ ކުރާނެކަމަށެވެ.
އިންތިޚާބުގެ ކުރީގެ ޙާލަތު ދެނެގަތުމަށްޓަކައި މިހާތަނަށް ކޮމިޝަނުން ގިނަގުނަ މަސައްކަތްތަކެއް ކުރިއަށް ގެންގޮސްފައިވާނެކަން ހާމަކުރަމުން އެޗްއާރްސީއެމް އިން ބުނީ އިންތިޚާބާ ގުޅޭ ޤާނޫނުތަކާއި ގަވާއިދުތަކާއި އުޞޫލުތައް ރިވިއުކުރުމުގެ މަސައްކަތާއި، އިލެކްޝަންސް ކޮމިޝަނާއި ކަމާގުޅުންހުރި އެހެނިހެން މުއައްސަސާތަކުން އިންތިޚާބާ ގުޅުންހުރި އިންތިޒާމްތައް ހަމަޖައްސާފައިވާ ގޮތް ދެނެގަތުމުގެ މަސައްކަތް ކޮށްފައިވާނެކަމަށެވެ.
އަދި ކޮމިޝަނާއެކު މަސައްކަތްކުރަމުންދާ އޮބްޒާވަރުން މެދުވެރިކޮށް ޖުލައި 26 އިން ފެށިގެން ސެޕްޓެމްބަރު 7 ވަނަ ދުވަހާ ހަމައަށް، އޮންލައިން ފޯމެއް މެދުވެރިކޮށް ރާއްޖޭގެ 16 ރަށަކުން ކޮންމެ ހަފްތާއަކު އެއްފަހަރު އިންތިޚާބުގެ ހާލަތާ ގުޅޭ މައުލޫމާތު ހޯދާފައިވާނެކަމަށެވެ. އެކޮމިޝަނުން ބުނީ މީގެ އިތުރުން، ކޮމިޝަނުގެ ފަރާތުން ރާއްޖޭގެ 14 ރަށަކަށް ޒިޔާރަތްކޮށް ރަށު ފެންވަރުގައި ގާއިމުކޮށްފައިވާ މުއައްސާތަކާއި، އިލެކްޝަންސް ކޮމިޝަނުން އެރަށްރަށަށް ކަނޑައަޅާފައިވާ ފޯކަލް ޕޮއިންޓުންނާއި، މަދަނީ ޖަމިއްޔާތަކާއި ޢާންމު ރައްޔިތުންގެ ފަރާތުން މައުލޫމާތު ހޯދާފައި ވާނެ ކަމަށެވެ.
އަދި ދައުލަތުގެ މުއައްސަސާތަކާއި، ސިޔާސީ ޕާޓީތަކާއި، އަމިއްލަ ގޮތުން ބައިވެރިވާ ކެންޑިޑޭޓުންގެ މަންދޫބުންނާއި އަދި މަދަނީ ޖަމިއްޔާތަކާ ބައްދަލުކޮށްގެންވެސް ކޮމިޝަނުން މައުލޫމާތު ހޯދާފައިވާނެކަމަށާއި އިންތިޚާބަށް އިޢުލާންކުރި ތާރީޚުގެ ފަހުން ރާއްޖޭގެ އެކި ކަންކޮޅުތަކުގައި ކޮށްފައިވާ މުޒާހަރާތަކާއި، ޢާންމު އެއްވުންތަކާއި، އިހުތިޖާޖުތައް މޮނީޓާކޮށް ޙާލަތު ބަލާފައިވާނެކަން ކޮމިޝަނުންވަނީ ފާހަގަކޮށްފައެވެ.
މީގެ އިތުރުންވެސް މީޑިއާތަކުން ރިޕޯޓުކުރާ އިންތިޚާބާ ގުޅުންހުރި ޚަބަރުތަކާއި މަޢުލޫމާތު 2023 ޖޫން 1 ވަނަ ދުވަހުން ފެށިގެން ކޮމިޝަނުން މޮނިޓަރކުރަމުން ގެންގޮސްފައިވާނެކަން ކޮމިޝަނުގެ ނޫސްބަޔާނުގައިވަނީ ހާމަކޮށްފައެވެ.
ކޮމިޝަންގެ މޮނީޓަރިންގެ މަސައްކަތްތަކުން ފާހަގަވަމުންދިޔަ ކަންކަމަށް ރިޢާޔަތްކޮށް، އަވަސް ޙައްލެއް ގެންނަން ފެންނަ ކަންކަން މިހާތަނަށް ކުރިއަށް ގެންގޮސްފައިވާ ރިޔާސީ އިންތިޚާބުގެ ޤައުމީ ލަފާދޭ ކޮމިޓީގެ ބައްދަލުވުންތަކުގައްޔާއި މުއައްސަސާތަކާއެކު ކުރިއަށް ގެންދިޔަ ބައްދަލުވުންތަކުގައި ހިއްސާކޮށް މިހާތަނަށް ކޮމިޝަނުން ރިވިއުކޮށްފައިވާ ކަންކަމާއި، ޙާލަތު ބެލުމުގެ މަސައްކަތްތަކުން ފާހަގަވެފައިވާ ކަންކަމާއި އަދި ވޯޓުލާ ދުވަހުން ފެށިގެން ވޯޓުގެ ވަގުތީ ނަތީޖާ އިޢުލާނުކުރުމާ ހަމައަށް ކުރިއަށް ގެންދަން ހަމަޖެހިފައިވާ އޮބްޒަވޭޝަން މަސައްކަތްތަކަށް ބިނާކޮށް އެކުލަވާލާ ތަފްޞީލީ ރިޕޯޓެއް ސެޕްޓެމްބަރު މަހުގެ 20 ވަނަ ދުވަހު ޢާންމުކޮށް، ކަމާ ގުޅުންހުރި އިދާރާތަކާ ހިއްސާކުރުމަށް ރާވާފައިވާކަންވެސް އެޗްއާރްސީއެމްއިން ވަނީ ނިންމާފައެވެ.
އެހެންނަމަވެސް ރިޔާސީ އިންތިޚާބުގެ ދެވަނަ ބުރެއް ކުރިއަށް ގެންދަން ޖެހިއްޖެ ޙާލަތެއްގައި މި ރިޕޯޓު ޢާންމުކޮށް، ގުޅުންހުރި އިދާރާތަކާ ހިއްސާކުރާނީ 2023 އޮކްޓޫބަރު 10 ވަނަ ދުވަހުގައި ކަމަށް ކޮމިޝަނުން ހާމަކުރެއެވެ.
