500 ރުފިޔާގެ ވަގު ނޫޓެއް ކަމަށް ބުނެ، މީސް މީޑިއާގައި ދައުރުވަމުންދާ ފޮޓޯގައި ފެންނަ ނޫޓަކީ ސައްހަ ނޫޓެއް ކަމަށް އެމްއެމްއޭ އިން ބުނެފިއެވެ.
އެމްއެމްއޭ އިން ވިދާޅުވީ އެ ނޫޓު އެމްއެމްއޭ އަށް ގެނެސް ބެލިބެލުމުން އޭގެ ސައްހަކަން ކަށަވަރުވެފައިވާ ކަމަށެވެ. ފާއިތުވި ދެދުވަހު މީސް މީޑިއާގައި ދައުރުވަމުންދަ ޕޯސްޓެއްގައި ބުނެފައި ވަނީ ފޮޓޯ އިން ފެންނަ 500 ރުފިޔާގެ ދެ ނޫޓަކީ ދެ ސައިޒެއްގެ ދެ ނޫޓު ކަމަށެވެ.
އޭގެތެރެއިން ކުޑަ ނޫޓަކީ ވަގު ނޫޓެއް ކަމަށާއި، އޭޓީއެމުން އެ ނޫޓު ބަލައި ނުގަންނަ ކަމަށް ވެސް ބުނެފައިވެއެވެ. ނަމަވެސް އެކަން ދޮގުކޮށް އެމްއެމްއޭއިން ވިދާޅުވީ ވަކި ބެޗުތަކުގެ ނޫޓުތަކުގެ ސައިޒު ތަފާތުވުމަކީ އެކަށީގެންވާ ކަމެއް ކަމަށެވެ.
"ރަންދިހަ ފަހެއް" ނަމުގައި ރާއްޖޭގައި މިހާރު ބޭނުން ކުރަމުން މިއަންނަ ފައިސާގެ ނޫޓްތައް 2015 ވަނަ އަހަރު ނެރުނު ފަހުން ވަގު ނޫޓެއް ދައުރުވެފައެއް ނުވެއެވެ. މިހާރު ރާއްޖޭގައި ބޭނުން ކުރާ ފައިސާގެ ނޫޓަކީ ޕޮލިމާ ނޫޓެވެ. ފައިސާގެ ނޫޓްގައި ގިނަ ސަލާމަތީ ފީޗާތަކެއް ހިމަނާފައި ހުރެއެވެ.
